எம்.பியாக தேர்ந்தெடுக்கப்பட்ட 20 முன்னாள் முதல்வர்கள்
டெல்லி: லோக்சபா தேர்தலில் போட்டியிட்ட 24 முன்னாள் முதல்வர்களில் 20 பேர் வெற்றி பெற்று எம்.பியாகியுள்ளனர்.
ஜார்க்கண்ட், கர்நாடகத்திலிருந்து மட்டும் தலா 4 முன்னாள் முதல்வர்கள் லோக்சபாவுக்கு செல்கின்றனர். அவர்கள் சிபு சோரன், பாபுலால் மரான்டி, அர்ஜூன் முன்டா, மது கோடா (நால்வரும் ஜார்க்கண்ட்), குமாரசாமி, வீரப்ப மொய்லி, தரம்சிங், தேவெ கெளடா (நால்வரும் கர்நாடகா).
ராம் விலாஸ் பாஸ்வானை வென்று முன்னாள் பீகார் முதல்வர் ராம் சுந்தர் தாஸ், லோக்சபாவுக்கு செல்கிறார்.
இன்னொரு பீகார் முன்னாள் முதல்வரான லாலு பிரசாத் யாதவ் சரன் தொகுதியில் வென்றார், பாடலிபுத்திராவில் தோல்வியுற்றார்.
டெல்லி முன்னாள் முதல்வர் சுஷ்மா சுவராஜ், இமாச்சலப் பிரதேச முன்னாள் முதல்வர் வீரபத்திர சிங், ஜம்மு காஷ்மீர் முன்னாள் முதல்வர் பரூக் அப்துல்லா, ஹரியானா முன்னாள் முதல்வர் பஜன் லால், உ.பி. முன்னாள் முதல்வர்களான முலாயம் சிங் யாதவ், கல்யாண் சிங் ஆகியோரும் லோக்சபாவுக்குத் தேர்ந்தெடுக்கப்பட்டுள்ளனர்.
31 குற்ற எம்.பிக்கள்...
உ.பி. மாநிலத்தைச் சேர்ந்த 80 எம்.பிக்களில் 31 பேர் குற்றப் பின்னணி கொண்டவர்கள். அதிலும் 22 பேர் மீது கொலை உள்ளிட்ட கடுமையான குற்றச்சாட்டுக்கள் உள்ளன என்பது குறிப்பிடத்தக்கது.
வழக்கமாக உ.பியிலிருந்து தேர்வாகும் எம்.பி்க்கள்தான் அதிக குற்றப் பின்னணி கொண்டவர்களாக இருப்பார்கள். அதை இம்முறையும் உ.பி. மாநிலம் தக்க வைத்துக் கொண்டுள்ளது.
கடந்த தேர்தலின்போது உ.பியிலிருந்து 28 எம்.பிக்கள் குற்றப் பின்னணி உடையவர்களாக இருந்தனர். தற்போது இது அதிகரித்துள்ளது.
நாடு முழுவதும் மொத்தம் 150 எம்.பிக்கள் குற்றப் பின்னணி உடையவர்களாக உள்ளனர். இது கடந்த லோக்சபாவில் 128 ஆக இருந்தது.
சாதாரண குற்றப் பின்னணி உடைய எம்.பிக்களின் எண்ணிக்கை 17.2 சதவீதம் உயர்ந்துள்ளது. கடுமையான குற்றப் பின்னணி கொண்டவர்களின் எண்ணிக்கை 30.9 சதவீதம் உயர்ந்துள்ளது.
குற்றப் பின்னணி கொண்ட எம்.பிக்களின் எண்ணிக்கையில், மகாராஷ்டிரா 2வது இடத்தில் உள்ளது. இங்கு 23 எம்.பிக்கள் கறை படிந்தவர்கள். இவர்களில் 9 பேர் மீது கடுமையான குற்றப் பின்னணி உள்ளது.
டாப் 10 'கேடி'களில் உ.பிக்கு முதலிடம்..
அதேபோல இந்தியாவின் டாப் 10 குற்றப் பின்னணி கொண்ட எம்.பிக்கள் பட்டியலில் 3 பேர் உ.பியைச் சேர்ந்தவர்கள் ஆவர்.
இதில் லாலு பிரசாத் யாதவின் பெயரும் இடம் பெற்றுள்ளது குறிப்பிடத்தக்கது.
குற்றப் பின்னணி கொண்ட எம்.பிக்களை அதிகம் கொண்டிருக்கும் கட்சி பாஜகதான். அக்கட்சியைச் சேர்ந்த எம்.பிக்களின் எண்ணிக்கை 42. இரண்டாவது இடத்தில் காங்கிரஸ் உள்ளது. இதன் பங்கு 41 ஆகும். சமாஜ்வாடி கட்சிக்கு 8, பகுஜன் சமாஜ் கட்சிக்கு 6 பேரும் உள்ளனர்.