டெல்லியில் 16 வயது சிறுவனை நிர்வாணமாக்கி தாக்கிய 'குடி'மகன்கள்: பதற வைக்கும் வீடியோ
டெல்லி: டெல்லியில் 4 பேர் குடிபோதையில் 16 வயது சிறுவனை நிர்வாணமாக்கி அடித்து உதைத்து ஊர்வலமாக அழைத்துச் சென்றுள்ளனர்.
தென்மேற்கு டெல்லியில் உள்ள இந்தர்புரியில் இருக்கும் காலனி ஒன்றை சேர்ந்த 4 பேர் குடிபோதையில் 16 வயது சிறுவனை நிர்வாணப்படுத்தி அவரின் கை, கால்களை கட்டிப்போட்டு அடித்து நொறுக்கியுள்ளனர், பீர் பாட்டிலாலும் தாக்கியுள்ளனர்.
மேலும் சிறுவனை காலனி முழுவதும் நிர்வாணமாகவே ஊர்வலமாக அழைத்துச் சென்றுள்ளனர். இந்த செயலை அந்த 4 பேரில் ஒருவர் தனது செல்போனில் வீடியோ எடுத்து வெளியிட்டுள்ளார். சிறுவன் திருடியதாக அவர் மீது குற்றம் சுமத்தி அவரை தாக்கியுள்ளனர்.
இந்த சம்பவத்தால் மனமுடைந்த சிறுவன் தற்கொலைக்கு முயன்றுள்ளார். திங்கட்கிழமை நடந்த இந்த சம்பவம் குறித்து இரண்டு நாட்கள் கழித்து தான் போலீசில் புகார் அளிக்கப்பட்டது. அதன் பிறகு வழக்குப்பதிவு செய்த போலீசார் அந்த 4 பேரையும் கைது செய்து விசாரணை நடத்தி வருகிறார்கள்.
இது குறித்து பாதிக்கப்பட்ட சிறுவன் கூறுகையில்,
அவர்கள் நான் திருடியதாக கூறி என்னை பிடித்து அடித்தனர். அவர்கள் என்னை ஒரு அலுவலகத்தில் வைத்து பூட்டிவிட்டு நான் இருக்கும் இடத்தை என் பெற்றோருக்கு தெரிவிக்கவில்லை என்றார்.