நடிகர் அம்பரீசுக்கு திடீர் மூச்சு திணறல்.. பெங்களூர் மருத்துவமனையில் அனுமதி!
பெங்களூர்: நடிகரும், கர்நாடக அமைச்சருமான அம்பரீஷ் மூச்சு திணறல் காரணமாக பெங்களூரிலுள்ள மருத்துவமனையில் சிகிச்சைக்காக அனுமதிக்கப்பட்டுள்ளார்.
கன்னட நடிகரும், தற்போதைய சித்தராமையா அமைச்சரவையில் வீட்டுவசதி அமைச்சருமாக பதவி வகிப்பவருமான அம்பரீஷ் கடந்த ஆண்டு திடீர் உடல் நலக்குறைவால் பாதிக்கப்பட்டார்.
பெங்களூரிலுள்ள பிரபல மருத்துவமனையில் சிகிச்சை பெற்றும் அவரது மூச்சு திணறல் பிரச்சினை சரியாகாததால், கவலையில் இருந்த அவரது குடும்பத்தாருக்கு, நடிகர் ரஜினிகாந்த் அபயம் கொடுத்தார்.
ரஜினிகாந்த், உடல் நலக்குறைவால் சிங்கப்பூரில் சிகிச்சை பெற்ற மவுண்ட் எலிசபெத், மருத்துவமனையை பரிந்துரைத்து அம்பரீஷை அங்கு சிகிச்சைக்கு சேர்க்குமாறு அறிவுறுத்தினார். ரஜினி அறிவுரையை ஏற்ற அம்பரீஷ் மனைவியான நடிகை சுமலதா, சிங்கப்பூரில் ரஜினி சிகிச்சை பெற்ற மருத்துவமனைக்கு அம்பரீஷை அழைத்து சென்று சிகிச்சையளித்தார்.
சிகிச்சை நல்லபடியாக நடந்து அம்பரீஷ் நலமுடன் வீடு திரும்பினார். வழக்கம்போல அமைச்சர் பணியாற்றி வருகிறார். இந்நிலையில் நேற்றிரவு அம்பரீஷ் மீண்டும் மூச்சு திணறலால் பாதிக்கப்பட்டார். அவர், விக்ரம் என்ற தனியார் மருத்துவமனையில் சிகிச்சைக்காக சேர்க்கப்பட்டுள்ளார். சுமலதா உடனிருந்து கவனித்து வருகிறார்.
இருப்பினும் அம்பரீஷ் உடல்நிலை சீராக இருப்பதாகவும், ரசிகர்கள் கவலையடைய வேண்டாம் என்றும் மருத்துவமனை வட்டாரங்கள் தெரிவித்தன.