பெட்டில் உச்சா போனதற்கு தண்டனை... மகனுக்கு பெண் வேடமிட்டு பேஸ்புக்கில் படம் போட்ட தாய் கைது
புளோரிடா: அமெரிக்காவில் தினமும் இரவு படுக்கையை நனைக்கும் தனது 10 வயது மகனுக்கு தண்டனை தரும் விதமாக அவனுக்கு பெண் உடை உடுத்தி, அப்போட்டோக்களை பேஸ்புக்கில் பதிவேற்றம் செய்த தாயை போலீசார் கைது செய்துள்ளனர்.
அமெரிக்காவின் புளோரிடா மாகாணத்தைச் சேர்ந்தவர் கிறிஸ்டில் ப்ராடோ. இவருக்கு இரண்டு மகள்களும், ஒரு மகனும் உள்ளனர். இவர்களில் 10 வயதாகும் அச்சிறுவனுக்கு தினமும் இரவு படுக்கையில் சிறுநீர் கழிக்கும் பழக்கம் இருந்துள்ளது.
இது தொடர்பாக கிறிஸ்டில் பலமுறை மகனைக் கண்டித்துள்ளார். ஆனால், அப்பழக்கத்தை அச்சிறுவனால் நிறுத்த முடியவில்லை. எனவே, மகனுக்கு தண்டனை தர தீர்மானித்தார் கிறிஸ்டில். அதன்படி, தனது நண்பர் கெய்த் டிரிஸ்கோல் என்பவரது ஐடியா படி தன் மகனுக்கு பெண் வேடமிட்டார். பின்னர் அதனை புகைப்படங்களாக எடுத்து பேஸ்புக்கில் வெளியிட்டார்.
பெண் வேடத்தில் அழுதபடி, அவமானத்துடன் நின்றிருக்கும் சிறுவனின் புகைப்படத்தைக் கண்ட கிறிஸ்டிலின் உறவினர்கள் ஆத்திரமடைந்தனர். இது தொடர்பாக போலீசுக்கு தகவல் அளிக்கப் பட்டது.
அதன்படி, சிறுவனை மனரீதியாக துன்புறுத்தியதற்காக கிறிஸ்டி மற்றும் அவரது நண்பர் கெய்த் இருவரும் கைது செய்யப்பட்டனர். தற்போது அச்சிறுவனும், அவனது சகோதரிகளும் பாட்டின் பராமரிப்பில் உள்ளனர்.