மூன்றாவது போட்டி
நியூசிலாந்து அணி தற்போது தென் ஆப்பிரிக்காவில் சுற்றுப் பயணம் செய்துள்ளது. முதல் இரு ஒருநாள் போட்டிகளில் இரு அணிகளும் தலா ஒரு போட்டிகளில் வெற்றி பெற்ற நிலையில், வெற்றியை நிர்ணயிக்கும் 3வது போட்டி டர்பனில் நேற்று நடைபெற்றது.
தென் ஆப்பிரிக்கா வெற்றி
இப்போட்டியில், தென் ஆப்பிரிக்கா, 62 ரன்கள் வித்தியாசத்தில் நியூசிலாந்தை வீழ்த்தி கோப்பையை கைப்பற்றியது. அந்த அணி கேப்டன் டிவில்லியர்ஸ் 48 பந்துகளில் 64 ரன்கள் குவித்து அணியின் வெற்றிக்கு தன் பங்களிப்பையாற்றினார்.
டிவில்லியர்ஸ் சாதனை
டிவில்லியர்ஸ் இப்போட்டியில் 8 ஆயிரம் ரன்களை கடந்தார். இதற்காக அவருக்கு 182 இன்னிங்சுகள் தேவைப்பட்டன. டிவில்லியர்ஸ் 19 ரன்களை கடந்தபோது, ஒருநாள் போட்டிகளில் 8 ஆயிரம் ரன்களையும் கடந்து அசத்தினார். இதன்மூலம், குறைந்த போட்டிகளில் 8 ஆயிரம் ரன்களை கடந்த வீரர் என்ற பெருமையை டிவில்லியர்ஸ் பெற்றார்.
கங்குலி சாதனை தகர்ப்பு
முன்னதாக, இந்தியாவின் சவுரவ் கங்குலி 200 இன்னிங்சுகளில் 8 ஆயிரம் ரன்களை கடந்தார். 2002 முதல் இந்த சாதனை அப்படியே இருந்துவந்தது. 13 ஆண்டுகளுக்கு பின்னர் டிவில்லியர்ஸ் அச்சாதனைக்கு சொந்தக்காரர் ஆகியுள்ளார்.
ஆண்டு கணக்கு
டிவில்லியர்ஸ் 2005ம் ஆண்டு பிப்ரவரி 2ம் தேதி ஒருநாள் போட்டியில் களமிறங்கினார். 8 ஆயிரம் ரன்களை கடக்க அவருக்கு 10 ஆண்டு மற்றும் 205 நாட்கள் தேவைப்பட்டுள்ளன. அதேநேரம் 1992ம் ஆண்டு களமிறங்கிய கங்குலிக்கு 10 ஆண்டு மற்றும் 302 நாட்கள் தேவைப்பட்டன.
டாப்-5 பேட்ஸ்மேன்கள்
டிவில்லியர்ஸ்-182 இன்னிங்சுகளிலும், சவுரவ் கங்குலி 200 இன்னிங்சுகளிலும், சச்சின் டெண்டுல்கர் 210 இன்னிங்சுகளிலும், வெஸ்ட் இண்டீசின் லாரா 211 இன்னிங்சுகளிலும், டோணி 214 இன்னிங்சுகளிலும் 8 ஆயிரம் ரன்களை கடந்த டாப்-5 பேட்ஸ்மேன்களாகும். இதில் மூவர் இந்திய பேட்ஸ்மேன்கள் என்பது சிறப்பு.