சுவாரஸ்ய மோதல்
இன்றைய மோதல் மிக மிக சுவாரஸ்யமானது. கோஹ்லிக்கு டெல்லி சொந்த ஊர் என்றால், கடந்த தொடரில் கோஹ்லி தலைமையில் விளையாடிய யுவராஜ் சிங் இந்த முறை டெல்லிக்காக பேட் பிடித்துள்ளார்.
பெங்களூருக்கு 14.. டெல்லிக்கு 16
பெங்களூர் அணிக்காக ரூ. 14 கோடிக்கு வாங்கப்பட்ட யுவராஜ், டெல்லி அணிக்காக ரூ. 16 கோடிக்காக வாங்கப்பட்டவர் என்பது நினைவிருக்கலாம்.
சொதப்பல் ஆட்டம்
ஆனால் வாங்கின காசுக்கு சரியாக கூவாமல் இருக்கிறார் யுவராஜ். கடந்த தொடரில் பெரும் ஏமாற்றத்தைக் கொடுத்து, பெங்களூர் அணி உரிமையாளர் விஜய் மல்லையாவை புலம்ப வைத்து விட்டார். இந்த முறையும் இதுவரை பெரிய அளவிலான ஆட்டத்தை அவர் வெளிப்படுத்தாமல்தான் இருக்கிறார்.
மும்பையை வீழ்த்திய டெல்லி
டெல்லி அணி கடந்த போட்டியில் மும்பை இந்தியன்ஸை வீழ்த்தியிருந்தது. பெங்களூர் அணி, ராஜஸ்தானை வீழ்த்தியிருந்தது. எனவே இன்றைய போட்டி கடுமையானதாக இருக்கும் என்பதில் சந்தேகம் இல்லை.
இரவு 8 மணிக்கு
இப்போட்டி டெல்லி பெரோஸ்ஷா கோட்லா மைதானத்தில் இன்று இரவு 8 மணிக்கு நடைபெறும். டெல்லி மைதானம் சுழற்பந்து வீச்சுக்கும், பேட்டிங்குக்கும் உகந்தது.
தாஹிர் - கெய்ல்
டெல்லி அணியில் இம்ரான் தாஹிர், யுவராஜ் சிங், கேப்டன் டுமினி, ஷ்ரேயாஸ் அய்யர் ஆகியோர் முக்கிய வீரர்கள். மறுபக்கம் பெங்களூரு அணியில் கிறிஸ் கெய்ல், விராத் கோஹ்லி, ஏப் டிவில்லியர்ஸ், மிட்சல் ஸ்டார்க் ஆகியோர் முக்கியஸ்தர்கள் ஆவர்.
பெங்களூரே டாப்
இரு அணிகளும் இதற்கு முன்பு மோதிய போட்டிகளில் பெங்களூர் அணி 8 போட்டிகளில் வென்றுள்ளது. டெல்லி அணி 5 போட்டிகளில் மட்டுமே வெற்றி பெற்றுள்ளது.
இப்போதைய தொடரில்
இப்போதைய தொடரில் டெல்லி அணி 3 வெற்றிகள், 3 தோல்விகளுடன் 4வது இடத்தில் இருக்கிறது. ஆனால் பெங்களூர் அணியோ, 2 வெற்றி, 3 தோல்விகளுடன் 6வது இடத்தில் இருக்கிறது.