பழம்பெரும் நடிகர் வி.எஸ்.ராகவன் உடலுக்கு நடிகர்,நடிகைகள் நேரில் அஞ்சலி
சென்னை: மறைந்த பழம்பெரும் நடிகர் வி.எஸ்.ராகவன் உடலுக்கு தமிழ்த் திரையுலகினர் பலர் நேரில் அஞ்சலி செலுத்தினர்.
சுமார் 1000 படங்களுக்கும் மேலே நடித்துள்ள பழம்பெரும் நடிகர் வி.எஸ்.ராகவன் நேற்று சென்னையில் மரணம் அடைந்தார். அவருக்கு வயது 90.
சிவாஜி, எம்.ஜி.ஆர்., ரஜினி, கமல் உள்ளிட்ட முன்னணி நாயகர்களுடன் நடித்துள்ள வி.எஸ்.ராகவன், சின்னத்திரை நாடகங்களிலும் நடித்துள்ளார்.
நாடகம் வாயிலாக தனது கலையுலகப் பயணத்தை தொடங்கிய வி.எஸ்.ராகவன், இளைய தலைமுறை நடிகர்களான கார்த்திக்குடன் ஆல் இன் ஆல் அழகுராஜா, விமலுடன் கலகலப்பு ஆகிய படங்களிலும் நடித்துள்ளார்.
வி.எஸ்.ராகவன் மறைவுக்கு அ.தி.மு.க பொது செயலாளர் ஜெயலலிதா இரங்கல் தெரிவித்துள்ளார். சென்னை மந்தைவெளியில் உள்ள வீட்டில் வி.எஸ்.ராகவன் உடல் பொதுமக்கள் அஞ்சலிக்காக வைக்கப் பட்டுள்ளது.
வி.எஸ்.ராகவன் உடலுக்கு நடிகர்கள் சிவகுமார், கார்த்தி, ராதாரவி, மன்சூர்அலிகான், சார்லி, செந்தில், டைரக்டர்கள் வாசு, சி.வி.ராஜேந்திரன், மனோபாலா, காற்றாடி ராமமூர்த்தி உள்பட பலர் அஞ்சலி செலுத்தினார்கள்.