ஸ்டாலினுடன் அதிமுக ஆதரவு எம்எல்ஏக்கள் மீண்டும் சந்திப்பு!
திமுக செயல்தலைவர் ஸ்டாலினை அதிமுக ஆதரவு எம்எல்ஏக்கள் கருணாஸ், தமிமுன் அன்சாரி, தனியரசு ஆகியோர் திடீரென சந்தித்தனர்.
சென்னை: திமுக செயல்தலைவர் ஸ்டாலினை அதிமுக ஆதரவு எம்எல்ஏக்கள் கருணாஸ், தமிமுன் அன்சாரி, தனியரசு ஆகியோர் திடீரென சந்தித்தனர். அப்போது அவர்கள் ஸ்டாலினை நலம் விசாரித்ததாக தெரிகிறது.
எதிர்க்கட்சித் தலைவரும் திமுக செயல்தலைவரும் ஸ்டாலின் கடந்த 2 நாட்களுக்கு முன்பு கண் சிகிச்சைக்காக சென்னை நுங்கம்பாக்கத்தில் உள்ள சங்கரநேத்ராலயா கண்மருத்துவமனையில் அனுமதிக்கப்பட்டார். அங்கு அவருக்கு கண்ணில் லென்ஸ் பொருத்தப்பட்டது.
இதன் காரணமாக ஸ்டாலின் இரண்டு நாட்கள் சட்டசபைக்கு வராமல் இருந்தார். இந்நிலையில் இன்று சட்டசபைக்கு வந்த அவரை முதல்வர் எடப்பாடி பழனிச்சாமி, அமைச்சர்கள் மற்றும் அதிமுக எம்எல்ஏக்கள் நலம் விசாரித்தனர்.
இதைத்தொடர்ந்து சட்டசபை வளாகத்தில் ஸ்டாலினை அதிமுக ஆதரவு எம்எல்ஏக்கள் ஆன கருணாஸ், தனியரசு, தமிமுன் அன்சாரி ஆகியோர் சந்தித்தனர். அப்போது ஸ்டாலினிடம் அவர்கள் நலம் விசாரித்ததாக தெரிகிறது.
சசிகலா அணி ஆட்சியமைக்க கோடிக் கணக்கில் எம்எல்ஏக்கள் பணம் பெற்றதாக எழுந்த புகாருக்கு பின் 3 எம்எல்ஏக்களும் ஸ்டாலினுடன் அதிக நெருக்கம் காட்டி வருகின்றனர் என்பது குறிப்பிடத்தக்கது.