வாரிசுகள் வலம் வரும் திண்டுக்கல் தேர்தல் களம்- திமுக வேட்பாளர்கள் பயோடேட்டா
ம.பஷீர்அகமது
திண்டுக்கல் தொகுதி திமுக வேட்பாளராக பஷீர் அகமது (வயது 60) நிறுத்தப்பட்டுள்ளார். திண்டுக்கல் நகர திமுக செயலராக பணியாற்றியுள்ளார். தற்போது திண்டுக்கல் கிழக்கு மாவட்ட அவைத் தலைவராக உள்ளார். தொழிலாளர் முன்னேற்ற சங்க பேரவையின் மாநில துணைத் தலைவர், திண்டுக்கல் மாவட்ட பஞ்சாலைத் தொழிலாளர் முன்னேற்ற சங்கத்தின் பொதுச் செயலர் உள்ளிட்ட பொறுப்புகளையும் வகித்து வருகிறார். 1996 முதல் 2006 வரை திண்டுக்கல் நகராட்சித் தலைவராக பதவி வகித்தார். 2001 தேர்தலில் திமுக சார்பில் போட்டியிட்டு தோல்வியடைந்தார்.
ஐ.பெரியசாமி
ஆத்தூர் தொகுதி திமுக வேட்பாளராக ஐ. பெரியசாமி (வயது 64) அறிவிக்கப்பட்டுள்ளார். இவர் சேர்வை சமூகத்தைச் சேர்ந்தவர். ஒருங்கிணைந்த திண்டுக்கல் மாவட்ட திமுக செயலராக பதவி வகித்த இவர், தற்போது மாநில துணைப் பொதுச் செயலராக உள்ளார். வத்தலகுண்டு ஒன்றியத் தலைவர், 1989, 1996, 2006, 2011 என 4 முறை ஆத்தூர் தொகுதி எம்.எல்.ஏவாக வென்றவர். இரு முறை தமிழக அமைச்சராகவும் பணியாற்றியுள்ளார்.
எம்.ஏ.ஆண்டி அம்பலம்
நத்தம் தொகுதி திமுக வேட்பாளராக எம்.ஏ.ஆண்டி அம்பலம் (வயது 60) நிறுத்தப்பட்டுள்ளார். இவர் அம்பலம் ஜாதியை சேர்ந்தவர். இவரது தந்தை ஆண்டி அம்பலம் காங்கிரஸ் கட்சியில் இருந்தபோது தொடர்ந்து நத்தம் தொகுதியில் பலமுறை வென்றார். நத்தம் எம்.எல்.ஏ.வாக இருந்த இவரது தந்தை ஆண்டி அம்பலம் கடந்த 1999 ஆம் ஆண்டு காலமானார். அப்போது நடைபெற்ற இடைத்தேர்தலில் தமாகா சார்பில் போட்டியிட்ட ஆண்டி அம்பலம் தோல்வி அடைந்தார். 2006-ல் திமுக சார்பிலும், 2011 தேர்தலில் சுயேட்சையாகவும் போட்டியிட்டு தோல்வியைத் தழுவியவர். இவர் தற்போது திண்டுக்கல் மேற்கு மாவட்ட பொருளாளராக பதவி வகித்து வருகிறார். நத்தம் ஒன்றிய கவுன்சிலராக பொறுப்பு வகித்துள்ளார்.
மு.அன்பழகன்
நிலக்கோட்டை (தனி) தொகுதி திமுக வேட்பாளராக மு. அன்பழகன் (வயது 53) அறிவிக்கப்பட்டுள்ளார். இவரது தந்தை ஏ.முனியாண்டி, 1967,1971-ல் நிலக்கோட்டை தொகுதி எம்.எல்.ஏ.வாக இருந்தார். நிலக்கோட்டை திமுக இளைஞர் அணி அமைப்பாளர், மாவட்ட இளைஞர் அணி துணை அமைப்பாளர் பொறுப்புகள் வகித்துள்ளார். நிலக்கோட்டை வழக்கறிஞர் அணி துணை அமைப்பாளர் ஆக தற்போது உள்ளார்.
இ.பெ.செந்தில்குமார்
பழனி தொகுதி திமுக வேட்பாளராக இ.பெ. செந்தில்குமார் (வயது 38) நிறுத்தப்பட்டுள்ளார். இவரது தந்தை முன்னாள் அமைச்சர் ஐ.பெரியசாமி. திமுக மாநில இளைஞரணி துணைத் தலைவராகவும் பொறுப்பு வகித்தவர். திண்டுக்கல் கிழக்கு மாவட்ட செயலாளராக தற்போது உள்ளார். கடந்த 2011 தேர்தலில் பழனி தொகுதியில் போட்டியிட்டு அதிமுக வேட்பாளர் வேணுகோபாலுவிடம் குறைந்த வாக்கு வித்தியாசத்தில் தோல்வியடைந்தார்.
அர.சக்கரபாணி
ஒட்டன்சத்திரம் தொகுதி திமுக வேட்பாளராக அர. சக்கரபாணி (வயது 55) நிறுத்தப்பட்டுள்ளார். இவர் கொங்கு வேளாள கவுண்டர் சமூகத்தைச் சேர்ந்தவர். 1993 இல் மாவட்ட விவசாய அணி துணை அமைப்பாளராகவும், 1997 ஆம் ஆண்டு தலைமை பொதுக்குழு உறுப்பினராகவும், 1999 முதல் 2003 வரை திண்டுக்கல் மேற்கு மாவட்ட செயலாளராகவும் திமுகவில் பணியாற்றியுள்ளார். 2006 முதல் 2011 வரை அரசு தலைமை கொறடா பதவி வகித்த இவர் 1996 முதல் 2016 வரை தொடர்ந்து 20 ஆண்டுகளாக எம்.எல்.ஏ.வாக ஒட்டன்சத்திரம் தொகுதியில் இருந்து தேர்வு செய்யப்பட்டுள்ளார். தற்போது கட்சியில் திண்டுக்கல் மேற்கு மாவட்ட செயலாளராகவும், திமுக சட்டசபை கொறடாவாகவும் உள்ளார்.