'19' பேரையும் மிரட்சியுடன் பார்த்த புதுவை ரிசார்ட் ரிசப்ஷனிஸ்டுகள்.. எல்லாம் கூவத்தூர் பாடம்
புதுச்சேரி: புதுச்சேரியில் உள்ள விண்ட்பிளவர் ரிசார்ட்டில் வந்து தங்கியுள்ள தினகரன் ஆதரவு எம்எல்ஏக்களால் அந்த ரிசார்ட்டே ஒரு விதமான அசாதாரண சூழலில் உள்ளதாக கூறப்படுகிறது.
தமிழக அரசியலில் மீண்டும் அனல் பறக்க ஆரம்பித்துள்ளது. முன்பு அதிமுக ஓபிஎஸ், அதிமுக சசிகலா என உடைந்தபோது இதுபோலத்தான் கூவத்தூரில் உள்ள ரிசார்ட்டில் கொண்டு போய் தனது ஆதரவு எம்எல்ஏக்களை சசிகலா தங்க வைத்து பரபரப்பை ஏற்படுத்தினார்.
இப்போது அதே பாணியில் தினகரனும் தனது ஆதரவு எம்எல்ஏக்கள் 19 பேரை புதுச்சேரிக்குக் கொண்டு போயுள்ளார்.
புதுச்சேரி ரிசார்ட்
தமிழகத்தில் எங்கு தங்கினாலும் பாதுகாப்பு கிடையாது என்பதால் இந்த முறை புதுச்சேரிக்குக் கூட்டிக் கொண்டு போய் விட்டனர். இங்கு காங்கிரஸ் ஆட்சி நடந்து வருகிறது. எனவே இங்கு பிரச்சினை வராது என்பதால் இங்கு வந்துள்ளனர் போலும்.
எங்கும் பிரம்மாண்டம்
பூலோக சொர்க்கம் போல காணப்படுகிறது இவர்கள் தங்கியுள்ள விண்ட்பிளவர் ரிசார்ட். எங்கு பார்த்தாலும் பிரமாண்டம்தான். அதிமுக என்றாலே பிரம்மாண்டம் என்பதற்குப் பொருத்தமாக இந்த பிரமாண்ட ரிசார்ட்டும் காணப்படுகிறது. அப்படி ஒரு பிரமாண்டமாக காணப்படுகிறது இந்த ரிசார்ட்.
ரிசப்சனிஸ்ட்கள் மிரட்சி
இங்கு தங்க வந்த 19 எம்எல்ஏக்களின் பெயர் விவரங்களை ரிசப்ஷனில் உள்ளவர்கள் முறைப்படி பதிந்த பிறகுதான் உள்ளே அனுப்பியுள்ளனர். அப்போது எடுக்கப்பட்ட புகைப்படம்தான் செம காமெடியாக இருக்கிறது.
அந்த ரிசப்ஷனில் உள்ளவர்கள் பெயர்களைப் பதிவு செய்தபோது முகமே இறுகிப் போய்க் காணப்பட்டது. ஒரு வித மிரட்சி அவர்களது முகத்தில் பரவிக் கிடந்தது தெரிய வருகிறது.
பீதியுடன் வரவேற்பு
ஒருவேளை கூவத்தூர் களேபரங்களை நினைத்தும், அதிமுகவின் அதகளத்தை நினைத்துப் பார்த்தும் இவர்கள் பீதியுடன் காணப்படுகிறார்களா என்று தெரியவில்லை. ஆனால் முகம் மலர இவர்கள் அதிமுக எம்எல்ஏக்களை வரவேற்றது போலவே தெரியவில்லை.
கூவத்தூர் கதை
பீதி இருக்கத்தானே செய்யும். கூவத்தூரில் கொஞ்ச நஞ்ச கூத்துக்களா நடந்தது. அதிமுகவினர் அனைவரும் வெளியேறிய பின்னர் ரிசார்ட்டையே தற்காலிகமாக மூடி விட்டு ஓனர் ஓடிய கதை இன்னும் கூட பேசப்படுகிறதே.