ஓவர் டூ கிள்ளியூர், விளவங்கோடு.. இங்கும் திமுக, அதிமுக ஒரு முறை கூட ஜெயித்ததில்லை பாஸ்!
சென்னை: கர்நாடக மாநில எல்லைப் பகுதியையொட்டியுள்ள ஓசூர் தொகுதியில் ஒருமுறை கூட திமுக, அதிமுக ஜெயித்ததில்லை. அதேபோல கேரள எல்லைப் பகுதியை ஒட்டியுள்ள கன்னியாகுமரி மாவட்டத்தின் கிள்ளியூர், விளவங்கோடு தொகுதிகளிலும் இதுவரை திமுக, அதிமுக வெற்றி பெற்றதில்லை.
கிள்ளியூர், விளவங்கோடு தொகுதிகளை காங்கிரஸ், தமாகா, பாஜக, சிபிஎம் கட்சிகளே இதுவரை வென்றுள்ளன. அங்கு ஒருமுறை கூட திமுக, அதிமுக வெற்றிக் கனியைச் சுவைத்ததில்லை.
இந்த சுவாரஸ்யமான விவரத்தை விரிவாகப் பார்க்கலாம்.
விளவங்கோடு சிபிஎம் - காங்கிரஸ்
விளவங்கோடு தொகுதியை சிபிஎம் மற்றும் காங்கிரஸ் கட்சிகள் மாறி மாறிக் கைப்பற்றி வந்துள்ளன. அங்கு 1967ல் நடந்த தேர்தலில் காங்கிரஸின் ஆர்.பி. நாடார் வெற்றி பெற்றார்.
71 டூ 1980
71ல் என்சிஓவின் ரோணப்பன் நாடார் வென்றார். 77ல் சிபிஎம்மின் ஞானசிகாமணி வெற்றி பெற்றார். 80ல் சிபிஎம்மின் மோனி வெற்றி பெற்றார். அதே ஆண்டு நடந்த இடைத் தேர்தலில் சிபிஎம்மின் பாக்கியதாஸ் வெற்றி பெற்றார்.
84 டூ 2001
84ல் நடந்த தேர்தலில் காங்கிரஸின் சுந்தரதாஸ், 89ல் காங்கிரஸின் சுந்தரதாஸ், 91ல் காங்கிரஸின் சுந்தரதாஸ், 96ல் சிபிஎம்மின் மோனி, 2001ல் சிபிஎம்மின் மோனி வெற்றி பெற்றனர்.
2006 டூ 2011
2006 தேர்தலில் சிபிஎம்மின் ஜான் ஜோசப் வென்றார். 2011 தேர்தலில் காங்கிரஸின் விஜயதாரணி வெற்றி பெற்றார்.
அதிமுக 1- திமுக 4.. தோல்வி!
இங்கு அதிமுக ஒருமுறை மட்டும் போட்டியிட்டு தோல்வியுற்றது. திமுகவோ 4 முறை போட்டியிட்டுத் தோல்வியைத் தழுவியுள்ளது.
கிள்ளியூர்
இதேபோல கிள்ளியூர் தொகுதியிலும் இதுவரை திமுக, அதிமுக வென்றதில்லை. அங்கு காங்கிரஸ், தமாகா மாறி மாறி வென்றுள்ளன.
காங்கிரஸ் 3 - தமாகா 2
இங்கு காங்கிரஸ் கட்சி 3 முறை வென்றுள்ளது. தமாகா 2 முறை வெற்றி பெற்றுள்ளது. மற்ற சமயங்களில் ஜனாத, சுயேச்சை, என்சிஓ ஆகியவை வெற்றி பெற்றுள்ளன.
பாஜக 4 .. திமுக 3 தோல்வி
இங்கு பாஜக 4 முறை 2வது இடம் வரை முன்னேறி வந்து தோல்வியைத் தழுவியுள்ளது. அதிமுக ஒருமுறை கூட இங்கு போட்டியிட்டதில்லை. திமுக 3 முறை இங்கு 2வது இடத்தைப் பிடித்துள்ளது.