சசிகலா நடராஜனுக்கு எதிராக சசிகலா புஷ்பாவுடன் கை கோர்க்கும் 5 தமிழக அமைச்சர்கள்
சசிகலா நடராஜன் அதிமுகவில் ஆதிக்கம் செலுத்துவதற்கு எதிராக சசிகலா புஷ்பாவுடன் 5 தமிழக அமைச்சர்கள் இணைந்து செயல்படுவதாக அக்கட்சி வட்டார தகவல்கள் தெரிவித்துள்ளன.
சென்னை: சசிகலா நடராஜனுக்கு எதிராக அதிமுகவில் இருந்து நீக்கப்பட்ட ராஜ்யசபா எம்பி சசிகலா புஷ்பாவுடன் 5 தமிழக அமைச்சர்கள் கைகோர்த்திருப்பது பரபரப்பை ஏற்படுத்தியுள்ளது.
அதிமுகவில் இருந்து தாம் நீக்கப்பட்டதற்கு காரணமே சசிகலா நடராஜன் கோஷ்டிதான் என குற்றம்சாட்டியிருந்தார் சசிகலா புஷ்பா. பின்னர் முதல்வர் ஜெயலலிதா உடல்நலம் பாதிக்கப்பட்டதற்கும் சசிகலா நடராஜனே காரணம் என்றார் சசிகலா புஷ்பா.
சசிகலா புஷ்பாவுடன்....
தொடர்ந்து சசிகலா நடராஜனை குறிவைத்து தாக்கி வருகிறார் சசிகலா புஷ்பா. தற்போது அதிமுகவை தங்களுடைய கட்டுப்பாட்டில் வைத்திருக்கிறது சசிகலா தரப்பு. ஆனால் அவர்களது ஆதிக்கத்தை விரும்பாத அமைச்சர்கள் சசிகலா புஷ்பாவுடன் சேர்ந்து செயல்பட தொடங்கியுள்ளனராம்.
சசிகலா நடராஜனுக்கு என்ன தொடர்பு?
ஏற்கனவே அதிமுகவில் அதிருப்தியில் இருக்கும் எம்எல்ஏக்கள், அமைச்சர்கள் என்னுடன் பேசிவருவதாக பேட்டியளித்து வருகிறார் சசிகலா புஷ்பா. தற்போது சசிகலா நடராஜனுக்கும் அதிமுகவுக்கும் என்ன சம்பந்தம்? என்ற சசிகலா புஷ்பாவின் குரலை அமைச்சர்கள் சிலரும் வெளிப்படையாக பேசி வருகின்றனராம்.
தோற்கடிக்க சதி
அத்துடன் சசிகலா புஷ்பாவை தொடர்பு கொண்டு 3 தொகுதி தேர்தலில் ஒரு அதிமுக வேட்பாளரையாவது தோற்க வைக்க வேண்டும் என்றும் சதி ஆலோசனை நடத்தியிருக்கிறார்கள் சில அமைச்சர்கள். ஆனால் அப்படி செய்ய வேண்டாம்... ஜெயலலிதா உடல்நிலையை முன்வைத்தே பஞ்சாயத்தை கிளப்பலாம் எனக் கூறியிருக்கிறார் சசிகலா புஷ்பா.
புதிய அணி
அதிமுகவில் பாஜக ஆதரவு அணி, சசிகலா நடராஜன் அணி வரிசையில் தற்போது சசிகலா புஷ்பா அணியும் உதயமாக தொடங்கியுள்ளதாம்.