முதல்வர் வேட்பாளரை கருணாநிதிதான் தீர்மானிப்பார்: மு.க.அழகிரி மீது ஐ. பெரியசாமி பாய்ச்சல்
திண்டுக்கல்: தி.மு.க.வில் முதல்வர் வேட்பாளரை கருணாநிதிதான் தீர்மானிப்பார் என்று மு.க. அழகிரிக்கு முன்னாள் அமைச்சர் ஐ. பெரியசாமி பதிலடி கொடுத்துள்ளார்.
தி.மு.க. பொருளாளர் மு.க. ஸ்டாலின் ஒரு போதும் முதல்வராக முடியாது என்று மு.க. அழகிரி செய்தியாளர்களிடம் கூறினார். இது தி.மு.க.வினர் இடையே கொந்தளிப்பையும், அதிர்ச்சியையும் ஏற்படுத்தி உள்ளது.
இதுகுறித்து தி.மு.க. நிர்வாகிகள் கண்டனம் தெரிவித்து வருகிறார்கள். மதுரையில் நேற்று கூடிய தி.மு.க. நிர்வாகிகள் அழகிரியை துரோகி என விமர்சித்திருந்தனர்.
இந்நிலையில் திண்டுக்கல்லில் முன்னாள் அமைச்சர் ஐ. பெரியசாமி செய்தியாளர்களிடம் கூறியதாவது:
தி.மு.க.வில் தற்போது அடிப்படை உறுப்பினராக இல்லாத ஒருவர் சொல்லும் கருத்துக்களை யாரும் ஏற்றுக்கொள்ள வேண்டிய அவசியம் இல்லை. கருத்துக்கணிப்புகளை நம்ப வேண்டாம் என்று கட்சி தலைவர் கருணாநிதி கூறிவிட்டார்.
தி.மு.க.வுக்கு யார் தலைவர்? தமிழகத்துக்கு முதல்வர் வேட்பாளர் யார்? என்பதை அவர்தான் முடிவு செய்ய வேண்டும். அதனை முடிவு செய்யும் அதிகாரம் கருணாநிதியை தவிர வேறு யாருக்கும் கிடையாது.
இவ்வாறு ஐ. பெரியசாமி கூறினார்.