திரைப்படத் தயாரிப்பாளர் ஏ.எல்.அழகப்பன் கருணாநிதி முன்னிலையில் திமுகவில் இணைந்தார்
சென்னை: இயக்குநர் விஜய்யின் தந்தையும் திரைப்படத் தயாரிப்பாளருமான ஏ.எல். அழகப்பன் திமுக தலைவர் கருணாநிதி முன்னிலையில் மீண்டும் அக்கட்சியில் இணைந்தார்.
'கலகலப்பு,' 'படிக்கிற வயசுல', 'நியாயத் தராசு', 'இனியெல்லாம் சுகமே', 'நாட்டுப்புற நாயகன்' உள்பட பல படங்களைத் தயாரித்தவர், ஏ.எல்.அழகப்பன். தி.மு.க. தலைவர் கருணாநிதிக்கு நெருக்கமானவராக இருந்தார். இவருடைய மகள் திருமணத்தைச் சில ஆண்டுகளுக்கு முன்பு, கருணாநிதி நடத்தி வைத்தார். அதேபால் ஏ.எல்.அழகப்பனின் மகனும் இயக்குநருமான விஜயின் திருமண விழாவில் திமுக தலைவர் கருணாநிதி, ஸ்டாலின் உள்ளிட்டோர் கலந்துகொண்டனர். அந்த அளவுக்கு திமுகவுடன் நெருக்கமானவர் அழகப்பன்.
இந்நிலையில், தயாரிப்பாளர் சங்கத் தேர்தலில் முக்கிய பதவி வகித்து வந்த ஏ.எல். அழகப்பன் நீண்ட காலம் திமுகவில் இருந்தவர். கருணாநிதிக்கு நெருக்கமானவர். இவரும் சரத்குமார் பாணியில் திமுக என்னை அவமானப்படுத்திவிட்டது என்று கூறி அக்கட்சியில் இருந்து விலகினார். பின்னர் முல்வர் ஜெயலலிதா முன்னிலையில் கடந்த சில வருடங்களுக்கு முன்பு அதிமுகவில் இணைந்தார்.
அதிமுக பொதுச் செயலாளர் ஜெயலலிதா அவருக்கு அதிமுக உறுப்பினர் அட்டையை வழங்கினார். இந்நிலையில் அதிமுகவில் இருந்து விலகி திமுக தலைவர் கருணாநிதி முன்னிலையில் அண்ணா அறிவாலயத்தில் அக்கட்சியில் இணைந்தார். அப்போது திமுக பொருளாளர் மு.க.ஸ்டாலின், முன்னாள் அமைச்சர்கள் துரைமுருகன், பொன்முடி உள்ளிட்டோர் உடனிருந்தனர்.