மீண்டும் த.மா.கா உதயம்... மீண்டும் அதே சைக்கிள் சின்னம்- திருச்சியில் ஜி.கே.வாசன் அறிவிப்பு

By Mayura Akilan

Updated: Friday, November 28, 2014, 20:16 [IST]

திருச்சி: திருச்சியில் பெய்துவரும் தொடர் அடை மழையிலும் இன்று வாசனின் புதிய கட்சி அறிவிப்பு பொதுக்கூட்டம் சொன்னபடி தொடங்கியுள்ளது. 32 அடி உயர கொடிக்கம்பத்தில் புதிய கொடியை தியாகி அருணாசலம் ஏற்றி வைத்தார்.

மாநாட்டை தொடங்கி வைத்து பேசிய ஜி.கே.வாசன் தனது கட்சியின் பெயர் தமிழ் மாநில காங்கிரஸ் என்றும், கட்சியின் சின்னம் சைக்கிள் என்றும் கூறினார்.

காங்கிரஸ் கட்சியில் இருந்து 1996ஆம் ஆண்டு மூப்பனார் பிரிந்த போது தமிழ் மாநில காங்கிரஸ் கட்சி என்றுதான் பெயரிடப்பட்டது. கட்சியின் சின்னமாக சைக்கிள்தான் இருந்தது.

மூப்பனார் மறைவிற்குப் பின்னர் தமிழ் மாநில காங்கிரஸ் கட்சியை காங்கிரஸ் கட்சியுடன் இணைத்தார் ஜி.கே.வாசன். 10 ஆண்டுகள் மத்திய அமைச்சராகவும் இருந்த அவர், காங்கிரஸ் கட்சியிலிருந்து கடந்த மாதம் விலகி புதிய கட்சி தொடங்கப் போவதாக அறிவித்தார்.

கட்சியின் துவக்க விழா பொதுக்கூட்டம் நவம்பர் 28ல் திருச்சியில் நடைபெறுவதாக அறிவித்ததோடு இதற்காக பொன்மலை, ஜி.கார்னர் மைதானத்தில் பிரமாண்ட ஏற்பாடுகள் செய்யப்பட்டன.

விழாநாளான இன்று காலையிலிருந்தே விடாது மழைபெய்து கொண்டே இருக்கிறது. தொடர் மழையால் திருச்சி ஜி.கார்னர் மைதானம் சேறும் சகதியுமாக காட்சியளிக்கிறது. மழையால் மாநாட்டுப்பந்தல் மிதக்கிறது. மாநாடு நடைபெறும் இடம் உழுத நிலம் போல மாறிவிட்டது.

திருச்சின் முக்கிய சாலைகள் நெடுகிலும் பேனர்கள், தோரணங்கள், கட்சி கொடிகள் கட்டப்பட்டு திருவிழா போல் காட்சி அளிக்கிறது. ஆனால் மழை விடாது தொடர்ந்து பெய்துகொண்டே உள்ளது. இதனால் மாநாடு நடக்குமா என்ற சந்தேகம் எழுந்தது. ஆனாலும் தமிழகம் முழுவதிலும் இருந்தும் தொண்டர்கள் குவிந்தனர்.

விழா 3 மணிக்கு துவங்கும் என்று கூறப்பட்ட நிலையில் மழை காரணமாக 5 மணிக்கு தொடங்கியது. தனது புதிய கட்சியின் கொடியை வாசன் ஏற்றிவைத்தார்.

பின்னர் பேசிய ஜி.கே.வாசன் தனது கட்சியின் பெயர் தமிழ் மாநில காங்கிரஸ் கட்சி என்றும் கட்சியின் சின்னம் சைக்கிள் என்றும் அறிவித்தார்.

புதிய கட்சியின் அறிவிப்பு, முதல் கூட்டம் என்பதால் வாசன் ஆதரவு தொண்டர்கள் எழுச்சியுடன் பங்கேற்றுள்ளனர். மழை பெய்த நிலையிலும் பல்லாயிரக்கணக்கான தொண்டர்களும், குறிப்பாக அதிக அளவில் இளைஞர்களும் பங்கேற்றுள்ளனர்.