ஆர்.கே.நகர் தொகுதி இடைத்தேர்தல்... நாம் தமிழர் கட்சி வேட்பாளர் யார் தெரியுமா?
ஆர்.கே. நகர் தொகுதி இடைத்தேர்தலில் நாம் தமிழர் கட்சி வேட்பாளராக கலைக்கோட்டுதயம் அறிவிக்கப்பட்டுள்ளார்.
சென்னை: ஆர்.கே.நகர் இடைத்தேர்தலில் நாம் தமிழர் கட்சி வேட்பாளராக கலைக்கோட்டுதயம் போட்டியிடுவார் என்று அக்கட்சியின் ஒருங்கிணைப்பாளர் சீமான் தெரிவித்தார்.
ஜெயலலிதாவின் மறைவுக்கு பின்னர் ஆர்.கே.நகர் தொகுதிக்கு ஏப்ரல் 12-ஆம் தேதி இடைத்தேர்தல் நடைபெறவுள்ளது. இந்நிலையில் 6 முனை போட்டி நிலவி வருகிறது. இந்தத் தேர்தலை கௌரவப் பிரச்சினையாகவே சில கட்சிகள் கருதுகின்றன.
பொதுவாக தேர்தல்களில் எதிரெதிர் கட்சிகளுக்கிடையே போட்டி நிலவக் கூடும். ஆனால் ஜெயலலிதா மறைவுக்கு பிறகு அதிமுக இரண்டாக பிளவுப்பட்டதால் இந்த இடைத்தேர்தலில் அந்த கட்சிகளுக்குள்ளேயே போட்டி நிலவுகிறது.
அந்த வகையில் சசிகலா அணியைச் சேர்ந்த டி.டி.வி.தினகரனுக்கும், ஓபிஎஸ் அணியைச் சேர்ந்த மதுசூதனனுக்கும் இடையே கடும் போட்டி நிலவுகிறது. அதற்கு அடுத்தபடியாக இந்த தேர்தலில் எப்படியாயினும் வென்று விட வேண்டும் என்று திமுகவும் துடிக்கிறது.
இந்த தேர்தலில் பாஜக, விடுதலைச் சிறுத்தைகள், மதிமுக, தமாக ஆகியன போட்டியிடப் போவதில்லை என்று அறிவித்துள்ளன. எனினும் தீபா பேரவை, இந்து மக்கள் கட்சி, சுயேச்சைகள் போட்டியிட உள்ளன.
இதில் சீமானின் நாம் தமிழர் கட்சியும் போட்டியிடவுள்ளது. அக்கட்சியின் வேட்பாளராக கலைக்கோட்டுதயம் என்பவர் அறிவிக்கப்பட்டுள்ளார்.