ஸ்டீல்மேன் 2015... ஆணழகன் போட்டியில் அசத்திய பாடி பில்டர்கள்.. பரிசளித்தார் "ஐ" விக்ரம்!

Published: Tuesday, January 27, 2015, 10:19 [IST]

சென்னை: சென்னையில் ஸ்டீல்மேன் 2015 என்ற ஆணழகன் போட்டி நடந்தது. இதில் ஐ படத்தில் பாடி பில்டராக நடித்து அனைவரையும் அசத்திய நடிகர் விக்ரம் கலந்து கொண்டு வெற்றி பெற்றவர்களுக்குப் பரிசுகளை வழங்கினார்.

குடியரசு தினத்தையொட்டி சென்னை மாவட்ட அமெச்சூர் ஆணழகன்கள் சங்கம் சார்பில் நேற்று மாநில அளவிலான ஆணழகன் போட்டி நடந்தது. இதில் ஏராளமான ஆணழகன்கள் கலந்து கொண்டு தங்களது உடல் கட்டமைப்பை வெளிப்படுத்தி அசத்தினர்.

இந்தப் போட்டியில் சென்னை ரயில் பெட்டி இணைப்புத் தொழிற்சாலையில் பணியாற்றும் ஜெயப்பிரகாஷ் வெற்றி பெற்று ஸ்டீல்மேன் 2015 பட்டத்தைத் தட்டிச் சென்றார். அவருக்கு நடிகர் விக்ரம் பரிசினை வழங்கினார். ஐ படத்தில் இதேபோல பாடி பில்டராக வந்து கலக்கியிருந்தார் விக்ரம் என்பது நினைவிருக்கலாம்.

இந்த நிகழ்ச்சியில் காமன்வெல்த் போட்டியில் பளு தூக்குதலில் தங்கப் பதக்கம் வென்ற தமிழக வீரர் சதீஷ் குமார், தமிழ்நாடு ஒலிம்பிக் சங்கத் துணைத் தலைவர் ஐசரி கணேஷ், உள்ளிட்ட பலரும் கலந்து கொண்டனர்.