மேன் ஆப் தி மேட்ச் டாப் ஸ்டார் பிரசாந்த்! காலத்தை வென்ற 1998-ம் ஆண்டு தமிழ் திரைப்படங்கள்!

பிரசாந்தின் அசுரப் பாய்ச்சல்: ஜீன்ஸ் படத்தின் பிரம்மாண்டம்

ஒரு நாயகன் ஒரே ஆண்டில் எப்படிப்பட்ட படங்களைக் கொடுக்க முடியும் என்பதற்கு 1998-ல் பிரசாந்த் காட்டிய மாயாஜாலம் ஒரு மிகச்சிறந்த உதாரணம். பிரம்மாண்டத்தின் உச்சமாக, இயக்குநர் ஷங்கரின் கற்பனையில் உதித்த 'ஜீன்ஸ்' திரைப்படம் இந்த ஆண்டில்தான் வெளியானது. அன்றைய காலகட்டத்தில் தொழில்நுட்பத்தின் விஸ்வரூபமாகப் பார்க்கப்பட்ட இந்தப் படம், பிரசாந்த் மற்றும் ஐஸ்வர்யா ராய் ஆகியோரின் திரை வாழ்வில் ஒரு இமாலயத் திருப்புமுனையை ஏற்படுத்தியது.

ஒரே பாடலில் உலகத்தின் ஏழு அதிசயங்களைக் கண்முன் நிறுத்தியதும், ஏ.ஆர்.ரஹ்மானின் இசையில் எலும்புக்கூடு உருவத்தை நடனமாட வைத்ததும் எனத் தியேட்டர்களில் ரசிகர்கள் கண்கொட்டாமல் பார்த்த பிரம்மிப்புகள் ஏராளம். பிரசாந்தின் இரட்டை வேட நடிப்பும், ஐஸ்வர்யா ராயின் பேரழகும், கம்ப்யூட்டர் கிராபிக்ஸ் காட்சிகளும் இணைந்து ஜீன்ஸ் திரைப்படத்தை ஒரு சர்வதேசத் தரத்திலான படைப்பாக மாற்றின. இன்று வரை ஜீன்ஸ் படத்திற்கும், அதன் பாடல்களுக்கும் இருக்கும் ரசிகர்கள் பட்டாளம் கொஞ்சமும் குறையவில்லை.

காதல் ரசம் சொட்டும் கண்ணெதிரே தோன்றினாள்

ஜீன்ஸ் படத்தின் பிரம்மாண்ட வெற்றிக்குப் பிறகு, பிரசாந்த் அடுத்ததாகத் தேர்ந்தெடுத்தது ஒரு பக்கா கமர்ஷியல் மற்றும் எமோஷனல் பேக்கேஜான 'கண்ணெதிரே தோன்றினாள்'. ரவிச்சந்திரன் இயக்கத்தில் வெளியான இந்தப் படம், பிரசாந்த் திரைப்பயணத்தில் இன்னொரு வைரக்கல்.

காதல் வேண்டுமா காதல் இருக்கிறது, நட்பு வேண்டுமா நட்பு இருக்கிறது, வயிறு குலுங்கச் சிரிக்க நகைச்சுவை வேண்டுமா விவேக் இருக்கிறார், இன்னிசை பாடல் வேண்டுமா தேனிசை தென்றல் தேவாவின் உச்சகட்ட உழைப்பு இருக்கிறது, அதிரடி வேண்டுமா ஆக்‌ஷன் இருக்கிறது என "என்ன இல்லை இந்தப் படத்தில்?" என்று அனைவரையும் கேட்க வைத்த ஒரு முழுமையான பொழுதுபோக்குப் படமாக இது அமைந்தது.

பிரசாந்த், கரண் மற்றும் சிம்ரன் ஆகியோர் நடிப்புப் போட்டியில் வெளுத்து வாங்கியிருந்தனர். குறிப்பாகப் பிரசாந்த் மற்றும் கரண் இடையேயான அந்த ஆழமான நட்பும், நண்பனின் தங்கை மீதே காதல் வயப்படும் நாயகனின் தவிப்பும் மிக நேர்த்தியாகத் திரையில் வடிக்கப்பட்டிருந்தன.

இன்றைய 2026-ம் ஆண்டிலும் இந்தப் படத்தைத் திரும்பத் திரும்பப் பார்க்கத் தூண்டுவது அதிலிருக்கும் அந்த 'பிரெஷ்னெஸ்' (Freshness) மற்றும் 'ரிச்னெஸ்' (Richness) தான். தேவா இசையில் படத்தின் பாடல்கள் அனைத்தும் டாப் கிளாஸ் ஹிட்டடித்தன.

அதிலும் குறிப்பாக, "ஈஸ்வரா... வானும் மண்ணும் பிரண்ட்ஷிப் ஆனதே" என்ற பாடல் நட்புக்கு எழுதப்பட்ட இன்னொரு தேசிய கீதமாகவே இன்றும் கொண்டாடப்படுகிறது.

ஜீன்ஸ், கண்ணெதிரே தோன்றினாள் என மெகா ஹிட் படங்களைக் கொடுத்துவிட்டு, அதே ஆண்டில் 'காதல் கவிதை' என்ற மெல்லிய தென்றல் போன்ற ஒரு காவியத்தையும் பிரசாந்த் கொடுத்தார். அகத்தியன் இயக்கத்தில், இசைஞானி இளையராஜாவின் தேனிசையில் உருவான இந்தக் காதல் காவியம், பிரசாந்தின் மென்மையான நடிப்பாற்றலை வெளிப்படுத்தி அவரது திறமைக்கு தீனி போட்டது. மூன்று படங்கள், மூன்றும் கிளாஸ். பிரசாந்த் ஃபேன்ஸ் ஹேப்பி.

கார்த்திக்கின் மாபெரும் மறுமலர்ச்சி!

பிரசாந்த் ஒருபுறம் இளைஞர்களின் நாடித் துடிப்பை எகிற வைத்துக்கொண்டிருக்க, நவரச நாயகன் கார்த்திக் 1998-ல் குடும்ப ஆடியன்ஸின் இதயங்களை ஒட்டுமொத்தமாகக் கொள்ளையடித்தார். விக்ரமன் இயக்கத்தில் கார்த்திக், ரோஜா நடிப்பில் வெளியான 'உன்னிடத்தில் என்னை கொடுத்தேன்' திரைப்படம், ஒரு மேஜிக் போலப் பட்டிதொட்டியெங்கும் ஹிட் அடித்தது.

கார்த்திக்கின் 100-வது படமாக அமைந்த இப்படம், ஒரு சாதாரணத் திருடன் எப்படி ஒரு பெண்ணின் தூய்மையான அன்பால் திருந்தி, ஒரு நேர்மையான மனிதனாக உயர்கிறான் என்ற உணர்வுப்பூர்வமான கதையைச் சொல்லியது. எந்தவித ஆர்ப்பாட்டமும் இல்லாத இந்தப் படம் 250 நாட்களுக்கு மேல் திரையரங்குகளில் ஓடி வசூல் சாதனை படைத்தது. இதில் நடிகர் அஜித் ஒரு கௌரவத் தோற்றத்தில் வந்து, ரோஜாவை ஒருதலைப்பட்சமாகக் காதலிக்கும் கதாபாத்திரத்தில் அனைவரது மனதையும் கவர்ந்தார்.

அதே ஆண்டில் கார்த்திக் மற்றும் கௌசல்யா நடிப்பில் வெளியான 'பூவேலி' திரைப்படமும் ஒரு புதுவகையான கதை அம்சத்தைக் கொடுத்துப் பெரிய அதிர்வுகளை ஏற்படுத்தியது. கார்த்திக் மற்றும் கௌசல்யா இடையேயான அந்த அழகான கெமிஸ்ட்ரி, பரத்வாஜின் இசையில் அமைந்த இனிமையான பாடல்கள் என இப்படம் ரசிகர்களுக்கு ஒரு சிறந்த குடும்பப் பொழுதுபோக்காக அமைந்தது.

விஜய்யின் தைரியமான பரிசோதனை முயற்சி!

1996, 1997 எனத் தொடர்ந்து காதல் நாயகனாகவே வலம் வந்த விஜய், 1998-ல் தனது முத்திரையை முற்றிலும் மாற்றியமைக்க ஒரு மிகப்பெரிய ரிஸ்க் எடுத்தார். வின்சென்ட் செல்வா இயக்கத்தில் வெளியான 'பிரியமுடன்' திரைப்படம், விஜய்யை ஒரு நெகட்டிவ் ஷேட் (Negative Shade) கொண்ட ஆண்டி-ஹீரோவாக (Anti-hero) அறிமுகப்படுத்தியது. தான் விரும்பிய பெண்ணை (கௌசல்யா) அடைவதற்காக எந்த எல்லைக்கும் செல்லும் ஒரு பணக்கார இளைஞனின் தவிப்பையும், அதீத காதலையும் விஜய் மிகச் சிறப்பாக வெளிப்படுத்தியிருந்தார். சாக்லேட் பாய் இமேஜை உடைத்து, தனது நடிப்புத் திறனுக்குத் தீனி போட்ட இந்தப் படம், விஜய்யின் திரைப்பயணத்தில் மிகவும் வித்தியாசமான மற்றும் தைரியமான ஒரு கல்ட் படமாக இன்றும் பார்க்கப்படுகிறது.

நகைச்சுவைச் சரவெடியும், நட்பின் இலக்கணமும்!

1998-ம் ஆண்டு சிறந்த காமெடி படங்களின் லிஸ்ட்டை எடுத்தால், அதில் முதல் இடத்தைப் பிடிப்பது கமல்ஹாசன் மற்றும் பிரபுதேவா இணைந்து நடித்த 'காதலா காதலா'. சிங்கீதம் சீனிவாசராவ் இயக்கத்தில், கிரேசி மோகனின் வசனங்களில் உருவான இந்தப் படம், முதல் காட்சி முதல் கிளைமேக்ஸ் வரை ரசிகர்களைச் சிரிப்பு மழையில் நனைய வைத்தது.

கமல், பிரபுதேவா, சௌந்தர்யா, ரம்பா, எம்.எஸ். விஸ்வநாதன் என ஒரு பெரிய நட்சத்திரப் பட்டாளமே இந்த நகைச்சுவைக் கூத்தில் போட்டிப் போட்டு நடித்திருந்தனர். எந்த லாஜிக்கும் பார்க்காமல், வார்த்தைக்கு வார்த்தை கவுண்ட்டர் கொடுக்கும் கிரேசி மோகனின் மேஜிக் இப்படத்தில் உச்சத்தைத் தொட்டிருந்தது.

இந்தச் சிரிப்பலைகளுக்கு மத்தியில், நட்பின் ஆழத்தை கிராமத்துப் பின்னணியில் மிக அழுத்தமாகப் பதிவு செய்த படமாக கே.எஸ். ரவிக்குமாரின் 'நட்புக்காக' வெளியானது. சரத்குமார் தந்தை, மகன் என இரட்டை வேடங்களில் அசத்திய இந்தப் படம், எஜமானனுக்கும் வேலையாளுக்கும் இடையிலான விசுவாசத்தையும், நட்பையும் மையமாகக் கொண்டிருந்தது.

விஜயகுமார் மற்றும் சரத்குமார் இடையேயான அந்த எமோஷனல் காட்சிகள் பார்வையாளர்களைக் கண்கலங்க வைத்தன. சிம்ரனின் துள்ளலான நடிப்பும், தேவாவின், சின்னச் சின்ன முந்திரியாம் மாதிரியான, இசையும் படத்திற்குப் பெரும் பலம் சேர்த்தன. வணிக ரீதியாக மாபெரும் வெற்றி பெற்ற இப்படம், அந்த ஆண்டின் சிறந்த திரைப்படத்திற்கான தமிழக அரசின் மாநில விருதையும் தட்டிச் சென்றது.

ஒரு பொற்காலத்தின் சுவடுகள்

1998-ம் ஆண்டு என்பது தமிழ் சினிமா ரசிகர்களுக்கு ஒரு முழுமையான விருந்து படைத்த ஆண்டு. பிரசாந்த் என்ற ஒரு நாயகன் பிரம்மாண்டம், கமர்ஷியல், மெலடி என அனைத்திலும் சிக்ஸர் அடித்துத் தனது ராஜ்ஜியத்தை நிறுவியதும், கார்த்திக் தனது 100-வது படத்தில் குடும்பங்களின் நாயகனாக அவதாரம் எடுத்ததும், விஜய் நெகட்டிவ் ரோலில் மிரட்டியதும், கமல் நகைச்சுவையில் அதகளம் செய்ததும் என இந்த ஆண்டு கொடுத்த சினிமா அனுபவங்கள் அலாதியானவை.

ஏறக்குறைய முப்பது ஆண்டுகள் நெருங்கும் இன்றைய சூழலில், ஓடிடி (OTT) மற்றும் பான்-இந்தியா (Pan-India) எனச் சினிமா தொழில்நுட்பம் எவ்வளவோ மாறிவிட்டாலும், 1998-ல் வெளியான இந்தப் படங்களின் ஆன்மாவும், அதில் இடம்பெற்ற பாடல்களும் இன்றும் நம் பிளேலிஸ்ட்களிலும், டிவி சேனல்களிலும் உயிர்ப்போடு இருக்கின்றன. "என்ன இல்லை இந்தப் படங்களில்?" என்று கேட்கும் அளவுக்கு, அத்தனை சுவாரசியங்களையும் தன்னகத்தே கொண்ட 1998-ம் ஆண்டு, தமிழ் சினிமாவின் அசைக்க முடியாத ஒரு திரைச் சரித்திரம்!