சென்னை: சர்வதேச சந்தையில் தங்கத்தின் விலை புதன்கிழமை கணிசமாக சரிந்துள்ளது. அமெரிக்கா மற்றும் ஈரான் இடையே மீண்டும் பதற்றம் அதிகரித்துள்ள நிலையில், கச்சா எண்ணெய் விலை உயர்ந்தது. இதன் விளைவாக பணவீக்கம் மற்றும் வட்டி விகித உயர்வு குறித்த அச்சம் முதலீட்டாளர்களிடையே அதிகரித்ததால் தங்கம் விற்பனை அழுத்தத்தை சந்தித்துள்ளது.
சர்வதேச சந்தையில் ஸ்பாட் தங்கத்தின் விலை அவுன்ஸ் ஒன்றுக்கு 1.4 சதவீதம் குறைந்து 4,203.20 அமெரிக்க டாலராக பதிவானது. கடந்த மார்ச் 23-ஆம் தேதிக்குப் பிறகு தங்கம் எட்டிய மிகக் குறைந்த நிலையாக இது பார்க்கப்படுகிறது.
அதேபோல், ஆகஸ்ட் மாத அமெரிக்க தங்க எதிர்கால ( gold futures) வர்த்தக ஒப்பந்தங்களும் 1.4 சதவீதம் சரிந்து 4,227 டாலராக காணப்பட்டன. அமெரிக்க டாலரின் மதிப்பு உயர்ந்ததே தங்கத்தின் விலை சரிவுக்கு முக்கிய காரணமாக கூறப்படுகிறது. டாலர் வலுவடைந்தால், பிற நாடுகளின் முதலீட்டாளர்களுக்கு தங்கம் வாங்குவது அதிக செலவாக மாறுகிறது. இதனால் தங்கத்திற்கான தேவை குறைந்து விலை சரிவடைகிறது. இதற்கிடையில், அமெரிக்க அதிபர் டொனால்ட் டிரம்ப் வெளியிட்ட தகவலின்படி, ஹார்முஸ் நீரிணைப் பகுதியில் அமெரிக்க ராணுவ ஹெலிகாப்டரை ஈரான் சுட்டு வீழ்த்தியதாக கூறப்படுகிறது. இதையடுத்து அமெரிக்கா ஈரான் மீது தாக்குதல் நடத்தியதாக தகவல்கள் வெளியாகியுள்ளன. இந்த சம்பவம் மேற்கு ஆசியாவில் நிலவி வந்த பதற்றத்தை மேலும் அதிகரித்துள்ளது. அமெரிக்கா-ஈரான் மோதல் காரணமாக உலகளாவிய எண்ணெய் விநியோகத்தில் பாதிப்பு ஏற்படலாம் என்ற அச்சம் எழுந்துள்ளது. இதன் காரணமாக கச்சா எண்ணெய் விலை சுமார் 1 சதவீதம் உயர்ந்துள்ளது. தங்கம் பணவீக்கத்திற்கு எதிரான பாதுகாப்பான முதலீடாக கருதப்பட்டாலும், வட்டி விகிதம் உயரும்போது வட்டி வருமானம் தராத தங்கம் மீதான முதலீட்டு ஆர்வம் குறைவது வழக்கம். இதுவும் விலை சரிவுக்கு காரணமாகியுள்ளது. இந்த வாரம் வெளியாக உள்ள அமெரிக்க நுகர்வோர் விலை குறியீட்டு (சிபிஐ) தரவுகள் மற்றும் உற்பத்தியாளர் விலை குறியீட்டு (பிபிஐ) அறிக்கைகள் மீது முதலீட்டாளர்கள் அதிக கவனம் செலுத்தி வருகின்றனர். இந்த தரவுகள் அமெரிக்க பெடரல் ரிசர்வின் அடுத்தகட்ட வட்டி விகித முடிவுகளை தீர்மானிக்கும் முக்கிய காரணிகளில் ஒன்றாக இருக்கும். பணவீக்கம் எதிர்பார்த்ததை விட அதிகமாக இருந்தால், வட்டி உயர்வு வாய்ப்பும் அதிகரிக்கலாம் என சந்தை நிபுணர்கள் கருதுகின்றனர். இந்தியாவில் தங்க இறக்குமதி வரி அதிகரிக்கப்பட்டுள்ளதால், சட்டவிரோத தங்க கடத்தல் மீண்டும் அதிகரித்து வருவதாக சர்வதேச சந்தை ஆய்வாளர்கள் எச்சரித்துள்ளனர். அதிக வரி காரணமாக வங்கி மற்றும் அங்கீகரிக்கப்பட்ட நிறுவனங்கள் மூலம் வாங்கப்படும் தங்கத்தை விட, கடத்தல் தங்கம் குறைந்த விலையில் கிடைப்பதாக கூறப்படுகிறது. இந்த ஆண்டு இந்தியாவில் 100 மெட்ரிக் டன்களை தாண்டி தங்க கடத்தல் நடைபெறக்கூடும் என்ற மதிப்பீடும் வெளியாகியுள்ளது. தங்கத்தைப் போலவே வெள்ளி விலையும் சரிவை சந்தித்துள்ளது. சர்வதேச சந்தையில் வெள்ளி அவுன்ஸ் ஒன்றுக்கு 1.4 சதவீதம் குறைந்து 64.48 டாலராக வர்த்தகமானது. பிளாட்டினம் 1.5 சதவீதம் குறைந்து 1,700.38 டாலராகவும், பல்லாடியம் 0.8 சதவீதம் சரிந்து 1,212.67 டாலராகவும் பதிவானது. தற்போதைய சூழலில் அமெரிக்கா-ஈரான் பதற்றம், கச்சா எண்ணெய் விலை உயர்வு, பணவீக்க அச்சம் மற்றும் வட்டி விகித உயர்வு எதிர்பார்ப்பு ஆகியவை தங்க சந்தையில் அதிக ஏற்ற இறக்கத்தை உருவாக்கியுள்ளன. வரும் நாட்களில் வெளியாகும் அமெரிக்க பொருளாதார தரவுகளே தங்கத்தின் தலையெழுத்து தீர்மானிக்கும் முக்கிய காரணியாக இருக்கும் என சந்தை வல்லுநர்கள் தெரிவிக்கின்றனர்.தங்கம் விலை
அமெரிக்கா ஈரான் மோதல்
எண்ணெய் விலை உயர்வு பொதுவாக பணவீக்கத்தை அதிகரிக்கும். பணவீக்கம் அதிகரித்தால் மத்திய வங்கிகள் வட்டி விகிதங்களை உயர்த்தும் வாய்ப்பு உருவாகிறது. தற்போது அமெரிக்க பெடரல் ரிசர்வ் இந்த ஆண்டு இறுதிக்குள் மீண்டும் வட்டி விகிதத்தை உயர்த்தும் வாய்ப்பு 70 சதவீதத்திற்கும் அதிகமாக இருப்பதாக சந்தை மதிப்பீடுகள் தெரிவிக்கின்றன.வட்டி விகிதம்
பணவீக்கம்
கடத்தல் தங்கம்
கச்சா எண்ணெய்