பெங்களூர்- சென்னை எக்ஸ்பிரஸ்வேயில்.. இப்படி ஒரு ராட்சச பகுதியா? பார்க்கவே வியப்பா இருக்கே!

காட்டுப் பகுதியில் சாலையைத் தரைமட்டமாக அமைக்காமல், பல கிலோமீட்டர் தூரத்திற்குத் தூண்கள் கொண்ட உயர்மட்டப் பாலமாக நெடுஞ்சாலை ஆணையம் அமைத்துள்ளது. இதனால் வாகனங்கள் அனைத்தும் பாலத்தின் மேலாக எந்தவிதத் தடையுமின்றி அதிவேகத்தில் சீறிப் பாய்கின்றன. அதே வேளையில், பாலத்திற்கு கீழே விலங்குகள் செல்வதற்காக மிகப்பெரிய அளவில் பரந்த வெளி விடப்பட்டுள்ளது. மோகிலி காட் பகுதியைச் சுற்றிலும் உள்ள கவுண்டின்யா வனவிலங்கு சரணாலயம் யானைகள் அதிகம் நடமாடும் முக்கிய பகுதியாகும். அந்த யானைக் கூட்டங்கள் சாலையைக் கடக்க சிரமப்படாமல் இருக்கவே இந்த பிரம்மாண்ட வழித்தடம் கட்டப்பட்டுள்ளது.

கீழே விலங்குகள் கடந்து செல்லும் சுரங்கப் பாதையின் உயரமும் அகலமும் பார்ப்போரை ஆச்சரியப்பட வைக்கிறது. குறிப்பாக, சுமார் 8 மீட்டருக்கும் அதிகமான உயரத்தில் தூண்கள் எழுப்பப்பட்டு, யானைகள் தங்களின் குட்டிகளோடு கூட்டமாகத் தாராளமாக நடந்து செல்லும் அளவிற்குத் திறந்தவெளி உருவாக்கப்பட்டுள்ளது.

தூண்களுக்கு இடையேயான இடைவெளியும் வழக்கத்தை விட மிக அதிகமாக ஒதுக்கப்பட்டுள்ளது. இதனால் இருள் சூழ்ந்த குகை போன்ற உணர்வு இல்லாமல், பகல் வெளிச்சமும் காற்றும் இயற்கையாகவே கீழே தாராளமாகக் கிடைக்கிறது. காட்டின் ஒரு பகுதியிலிருந்து மற்றொரு பகுதிக்குச் செல்வது போலவே யானைகளும் பிற வனவிலங்குகளும் எந்தவித அச்சமும் பயமும் இன்றி எளிதாகக் கடந்து செல்ல முடிகிறது.

இயற்கைக்கும் மனிதனின் வளர்ச்சிக்கும் இடையே சமநிலையை ஏற்படுத்தும் மிகச் சிறந்த திட்டமாக இது பார்க்கப்படுகிறது. வழக்கமாக காடுகளில் சாலை அமைத்தால் மரங்கள் வெட்டப்பட்டு, விலங்குகளின் வழித்தடங்கள் துண்டிக்கப்பட்டு விடும்.

அதனால் உணவுக்கும் தண்ணீருக்கும் ஊருக்குள் நுழையும் யானைகள் ரயில்களிலோ அல்லது அதிவேக வாகனங்களிலோ மோதி விபத்தில் சிக்கும் அவலங்கள் நடப்பதுண்டு. ஆனால் இங்கு காட்டின் இயற்கை தன்மை துளியும் கெடாமல், தரைப்பகுதியை விலங்குகளுக்கே முழுமையாக விட்டுவிட்டு, மனிதர்களின் வாகனப் பயணத்தை மட்டும் மேலெழும்பி செல்லும் பாலமாக மாற்றியிருப்பது பொறியியல் ரீதியாகப் பாராட்டுகளைப் பெற்றுள்ளது.

இந்த வழித்தடத்தின் கீழ் பகுதியில் செயற்கையான புல்வெளிகள், தேவையான இடங்களில் தடுப்பு வேலிகள் மற்றும் வன விலங்குகளுக்குத் தொந்தரவு இல்லாத ஒளிரும் அமைப்புகளும் ஒருங்கிணைக்கப்பட்டுள்ளன. இதன் மூலம் மோகிலி காட் பகுதியில் வாகனப் புகையோ, இரைச்சலோ காட்டுயிர்களை நேரடியாக பாதிக்காது.

சாலை பணிகளைப் பார்வையிடும் வாகன ஓட்டிகளும் உள்ளூர் மக்களும், பாலத்தின் கீழ் உள்ள இந்த பிரம்மாண்ட இடைவெளியைப் பார்த்து ஆச்சரியப்பட்டு வருகின்றனர்.

விரைவான பயண நேரம் என்ற ஒரே நோக்கத்திற்காக மட்டும் திட்டமிடாமல், காடுகளையும் அங்கு வாழும் வனவிலங்குகளையும் பாதுகாக்கும் அக்கறையோடு அமைக்கப்பட்டிருக்கும் இந்த மோகிலி காட் பகுதி உயர்மட்டச் சாலை, நாட்டின் நவீன உள்கட்டமைப்பு வளர்ச்சிக்கு ஒரு மிகச் சிறந்த முன்னுதாரணமாக நிற்கிறது.