பெங்களூர்: ஓசூர் வழியாக கர்நாடகாவிற்கு தற்போது கர்நாடகா மற்றும் தமிழக அரசு பேருந்துகள் இயக்கப்பட்டு வருகின்றன. கன்னட அமைப்புகள் சார்பில் பந்த் அறிவிக்கப்பட்ட நிலையில் இன்று காலையில் சாலை மறியல் காரணமாக தமிழக அரசு பேருந்துகள் ஓசூர் அடுத்த ஜுஜுவாடி எல்லையில் அனுமதிக்கப்படவில்லை. தற்போது, பேருந்துகள் அனுமதிக்கப்பட்டு வருகின்றன.
கர்நாடகாவில் மேகதாது அணை கட்ட வலியுறுத்தி இன்று ஒரு நாள் பந்த் நடத்தப்படும் என கன்னட அமைப்புகள் தெரிவித்து வந்த நிலையில் இன்று தமிழகத்தில் இருந்து ஓசூர் வழியாக தமிழக அரசு பேருந்துகள் இயக்கப்படுகின்றன. அதேபோல் கர்நாடக மாநில அரசு பேருந்துகளும் இயக்கப்படுகிறது. ஆனால் பேருந்துகளில் குறைந்த எண்ணிக்கையில் பயணிகள் உள்ளனர்.
காவிரி நதிநீர் பங்கீடு, மேகதாது அணை விவகாரம் ஆகியவற்றில் தமிழகத்தைக் கண்டித்தும், காவிரியில் நீர் திறந்துவிடக் கூடாது என வலியுறுத்தியும் கர்நாடகாவில் இன்று முழு அடைப்பு போராட்டம் நடைபெறும் என கன்னட கூட்டமைப்பின் தலைவர் வாட்டாள் நாகராஜ் தெரிவித்திருந்தார். போராட்டத்தை கைவிடுமாறு கர்நாடக முதல்வர் டிகே சிவகுமார் கோரிக்கை விடுத்தார். இதையடுத்து, முன்னதாக பந்த்துக்கு ஆதரவு தெரிவித்த கன்னட ரக்ஷன வேதிகே, கர்நாடக தனியார் பள்ளி, கல்லூரிகள் கூட்டமைப்பு, தனியார் பேருந்து உரிமையாளர்கள் சங்கம், ஆட்டோ ஓட்டுநர்கள் சங்கம் ஆகியவை தங்களது முடிவை மாற்றிக் கொண்டுள்ளன. இதனால், இன்று நடைபெறும் பந்த் போராட்டத்தால் கர்நாடகாவில் இயல்பு வாழ்க்கை பாதிக்கப்படாது என தெரிகிறது. அதேசமயம், கர்நாடகா, தமிழ்நாடு இடையே போக்குவரத்து பாதிப்பு ஏற்பட வாய்ப்பு உள்ளதாகத் தெரிகிறது. எல்லைப் பகுதிகளில் மறியல் நடத்தப்படும் என்பதால், தமிழக அரசு பேருந்துகள் பல நிறுத்தப்பட்டுள்ளன. மற்ற வாகனங்கள் வழக்கம்போல சென்று வருகின்றன. இன்று அதிகாலையில் இரு மாநிலங்களுக்கு இடையிலான போக்குவரத்து வழக்கம்போல் நடைபெற்றாலும், கன்னட ஜாக்ருதி வேதிகே என்ற கன்னட அமைப்பின் தலைவர் மஞ்சுநாத் தேவா தலைமையில் 50-க்கும் மேற்பட்டோர், தமிழ்நாடு - கர்நாடக எல்லையில் உள்ள கர்நாடக நுழைவுப் பகுதிக்கு அருகே திரண்டு திடீர் போராட்டத்தில் ஈடுபட்டனர். அசம்பாவித சம்பவங்கள் ஏற்படுவதைத் தவிர்க்கும் வகையில் முன்னெச்சரிக்கை நடவடிக்கையாக, அதிகாரிகள் உடனடியாக தமிழ்நாடு பகுதியிலுள்ள ஜூஜுவாடி எல்லையில் பேருந்துகள் மற்றும் கனரக, இலகுரக வாகனங்களின் போக்குவரத்தை நிறுத்தினர். இதன் காரணமாக தமிழ்நாட்டிலிருந்து பெங்களூர் மற்றும் கர்நாடகாவின் பிற பகுதிகளுக்குப் பயணம் செய்த பயணிகள் பெரும் சிரமத்திற்கு உள்ளாகினர். வாகனங்களால் எல்லையைக் கடக்க முடியாத சூழலில், பல பயணிகள் ஜூஜுவாடி சோதனைச் சாவடியிலிருந்து கர்நாடகப் பகுதிக்குள் நடந்தே சென்று, மாற்றுப் போக்குவரத்து வசதிகளை ஏற்பாடு செய்துகொள்ள வேண்டிய நிலை ஏற்பட்டது. இதற்கிடையே, சாலையில் அமர்ந்து மறியல் செய்து போக்குவரத்தை முடக்கிய மஞ்சுநாத் தேவா மற்றும் 50-க்கும் மேற்பட்ட போராட்டக்காரர்களை போலீசார் கைது செய்தனர். போராட்டக்காரர்கள் அப்பகுதியிலிருந்து அப்புறப்படுத்தப்பட்டதைத் தொடர்ந்து, எல்லைப் பகுதியில் நிலவிய பதற்றம் தணிந்தது. ஓசூர் வழியாக கர்நாடகாவிற்கு கர்நாடகா மற்றும் தமிழக அரசு பேருந்துகள் இயக்கப்பட்டு வருகின்றன. கன்னட அமைப்புகள் சார்பில் பந்த் அறிவிக்கப்பட்ட நிலையில் இன்று காலையில் சாலை மறியல் காரணமாக தமிழக அரசு பேருந்துகள் ஓசூர் அடுத்த ஜுஜுவாடி எல்லையில் அனுமதிக்கப்படவில்லை. மறியலில் ஈடுபட்டவர்கள் கைது செய்யப்பட்டதை அடுத்து தற்போது, பேருந்துகள் அனுமதிக்கப்பட்டு வருகின்றன.