இந்தியாவின் மிகப்பெரிய தனியார் துறை வங்கியான ஹெச்டிஎப்சி வங்கி (HDFC Bank), தற்போது ஒரு பெரும் கார்ப்பரேட் நிர்வாகச் சிக்கலில் சிக்கியுள்ளது. மகாராஷ்டிர மாநில சாலை மேம்பாட்டுக் கழகத்திற்கு (MSRDC) வழங்கப்பட்ட ரூ.45 கோடி தொகையில் முறைகேடு நடந்துள்ளதாக எழுந்த புகாரும், அதனைத் தொடர்ந்து வங்கியின் பங்குகள் சரிவைச் சந்தித்ததும் ஒட்டுமொத்தப் பங்குச் சந்தையையே உலுக்கியுள்ளது.
இது குறித்து சென்னையைச் சேர்ந்த பிரபல ஆப்ஷன் வர்த்தகர் (Option Trader) பி.ஆர்.சுந்தர் தனது எக்ஸ் (X) தளத்தில், "45 கோடி ரூபாய் முறைகேடு புகார், 24,000 கோடி ரூபாய் சந்தை மதிப்பை இழக்கச் செய்துள்ளது" எனப் பதிவிட்டுள்ளது முதலீட்டாளர்கள் மத்தியில் பெரும் அதிர்ச்சியை ஏற்படுத்தியுள்ளது.
மகாராஷ்டிர அரசு நிறுவனமான MSRDC, ஹெச்டிஎப்சி வங்கியில் டெபாசிட் செய்திருந்த பெரிய அளவிலான தொகைக்கு, ரிசர்வ் வங்கியின் விதிமுறைகளைத் தாண்டி கூடுதல் வட்டி (Differential Interest) வழங்கப்பட்டதாகப் புகார் எழுந்துள்ளது. வங்கியின் தணிக்கைக் குழு (Audit Committee) நடத்திய உள் நிர்வாக விழிப்புணர்வு விசாரணையில் (Internal Vigilance Investigation), இந்த கூடுதல் வட்டித் தொகையான ரூ.45 கோடியை, நேரடியாக வட்டி கணக்கில் காட்டாமல், வங்கியின் விளம்பரம் மற்றும் மார்கெட்டிங் செலவு (Marketing Expenses) போல கணக்குக் காட்டி மறைக்க முயன்றது அம்பலமாகியுள்ளது. இதற்காக போலியான விளம்பர ஒப்பந்தங்கள் மற்றும் முறையற்ற இன்வாய்ஸ்கள் பயன்படுத்தப்பட்டதாகத் தணிக்கை அறிக்கையில் சுட்டிக்காட்டப்பட்டுள்ளது. இந்த விவகாரம் கடந்த நிதியாண்டுகளில் நடந்துள்ள நிலையில், வங்கியின் விளம்பரத் துறையின் செயல்பாடுகள் "திருப்திகரமாக இல்லை" என உள் தணிக்கையில் மதிப்பிடப்பட்டது. இதனைத் தொடர்ந்து, கடந்த மார்ச் 12-ம் தேதியன்று வங்கியின் தணிக்கைக் குழு முறையான விழிப்புணர்வு விசாரணைக்கு உத்தரவிட்டது. இந்த அதிரடி உத்தரவு பிறப்பிக்கப்பட்ட சில நாட்களிலேயே, அதாவது மார்ச் 18 அன்று, ஹெச்டிஎப்சி வங்கியின் முன்னாள் தலைவர் அடானு சக்ரவர்த்தி தனது பதவியை திடீரென ராஜினாமா செய்தார். வங்கியில் நடைபெறும் சில நடைமுறைகள் தனது தனிப்பட்ட நெறிமுறைகளுக்கு உகந்ததாக இல்லை என்று அவர் குறிப்பிட்டிருந்த நிலையில், இந்த ரூ.45 கோடி விவகாரமே அவரது வெளியேற்றத்திற்குக் காரணம் என்ற தகவல் தற்போது வெளியாகியுள்ளது. இந்த முறைகேடு தொடர்பான தகவல் கசிந்த உடனே, பங்குச் சந்தையில் ஹெச்டிஎப்சி வங்கியின் பங்குகளை முதலீட்டாளர்கள் போட்டிப்போட்டுக் கொண்டு விற்கத் தொடங்கினர். புதன்கிழமை வர்த்தகத்தில், ஹெச்டிஎப்சி வங்கியின் பங்கு விலை சுமார் 2.45 சதவீதம் வரை சரிந்து, ஒரு பங்கின் விலை ரூ.759.80 என்ற நிலைக்குத் தள்ளப்பட்டது. முதலீட்டாளர்கள் மத்தியில் ஹெச்டிஎப்சி வங்கியின் கார்ப்பரேட் நிர்வாகத் தரம் மற்றும் கணக்கு வழக்குகளின் நம்பகத்தன்மை குறித்த கவலைகளால், முதலீட்டாளர்களுக்கு ஒரே நாளில் சுமார் ரூ.24,000 கோடிக்கும் அதிகமான சந்தை மதிப்பு (Market Capitalization) இழப்பு ஏற்பட்டுள்ளது. பங்குச்சந்தையிலும், முதலீட்டு சந்தையிலும் ஏற்பட்டுள்ள இந்த பரபரப்பான சூழ்நிலைக்கு மத்தியில், ஹெச்டிஎப்சி வங்கியின் செய்தித் தொடர்பாளர் அதிகாரப்பூர்வ விளக்கம் ஒன்றை அளித்துள்ளார். அதில், "முழுமையற்ற சில தகவல்களின் அடிப்படையில் வங்கி மீது சுமத்தப்படும் தவறான குற்றச்சாட்டுகளையும், அனுமானங்களையும் நாங்கள் வன்மையாக மறுக்கிறோம். வங்கியின் அனைத்து உள் நிர்வாக ஆய்வுகளும், நடைமுறைகளும் நிறுவப்பட்ட விதிமுறைகளின்படியே மிகக் கடுமையான சட்டத் திட்டங்களுக்கு உட்பட்டு நடத்தப்படுகின்றன. இறுதி முடிவு எட்டப்படும் வரை அனைத்து விதிகளும் முறையாகப் பின்பற்றப்படும்" என்று வங்கித் தரப்பில் தெரிவிக்கப்பட்டுள்ளது. ஹெச்டிஎப்சி போன்ற ஒரு முன்னணி வங்கியில் நிலவும் இந்த உள்கட்டமைப்பு மற்றும் நிர்வாகச் சர்ச்சை, நடுத்தர மற்றும் சிறிய நகரங்களில் உள்ள சாமான்ய முதலீட்டாளர்கள் மத்தியிலும் தற்போது உன்னிப்பாகக் கவனிக்கப்பட்டு வருகிறது.விளம்பரச் செலவாக மாற்றப்பட்ட வட்டிப் பணம்
முன்னாள் தலைவரின் திடீர் ராஜினாமா
பங்குச் சந்தையில் அதிர்ச்சி
புகார்களை மறுத்த ஹெச்டிஎப்சி வங்கி நிர்வாகம்