டெல்லி: தொழிலாளர் வருங்கால வைப்பு நிதி (பிஎஃப்) பிடித்தம் செய்வதற்கான மாதாந்திர அடிப்படைச் சம்பள உச்சவரம்பை மத்திய அரசு ₹15,000-லிருந்து ₹25,000 ஆக உயர்த்தியுள்ளது. இது கடந்த செப்டம்பர் 17-ம் தேதி முதல் அமலுக்கு வந்துள்ளது. இதற்கு முன்பு அடிப்படைச் சம்பள உச்சவரம்பு ₹15,000 ஆக இருந்தபோது, ஊழியர்கள் தங்களின் பிஎஃப் சேமிப்பிற்காக மாதம் ₹1,800 வரை செலுத்தி வந்தனர். இனி ₹25,000 வரை சம்பளம் பெறுபவர்கள் ₹3,000 (சம்பளத்தில் 12%) பிஎஃப் கணக்கிற்குப் பங்களிப்பார்கள். இதுதவிர, வேலை வழங்கும் நிறுவனத்தின் பங்களிப்பு (3.67%) ₹550-லிருந்து ₹917 ஆக உயரும். இதன் மூலம் கட்டாய மாத பிஎஃப் பங்களிப்புத் தொகை ₹3,917 ஆக உயர்ந்துள்ளது.
வேலை வழங்கும் நிறுவனங்களின் பங்களிப்பிலிருந்து 8.33% பங்களிப்பான ₹2,083 இனி ஓய்வூதிய நிதியத்திற்கு (EPS) செல்லும் (இதற்கு முன்பு இது ₹1,250 ஆக இருந்தது). ஒரு ஊழியரின் மாத அடிப்படைச் சம்பளம் ₹20,000 ஆக இருந்தால், அவரது கட்டாய பிஎஃப் பங்களிப்பு ₹3,134 ஆக இருக்கும். இதில் ஊழியரின் பங்கு ₹2,400 மற்றும் வேலை வழங்கும் நிறுவனத்தின் பங்கு ₹734 ஆகும். மேலும், நிறுவனத்தின் பங்கிலிருந்து இனி ₹1,666 ஓய்வூதிய நிதியத்திற்குச் செல்லும்.
அதேவேளையில், ஒரு ஊழியர் மாதம் ₹35,000 சம்பாதித்தால், அவரது கட்டாய பிஎஃப் பங்களிப்பு ₹6,000 ஆக இருக்கும் (ஊழியர் மற்றும் வேலை வழங்குநர் இருவரிடமிருந்தும் தலா ₹3,000). ஓய்வூதியத் திட்டம் (EPS) என்பது EPFO ஊதிய உச்சவரம்பை மீறாதவர்களுக்கு மட்டுமே கிடைக்கும் என்பதால், உச்சவரம்பைத் தாண்டி ஊதியம் பெறுபவர்களுக்கு இதில் எந்தத் தொகையும் ஓய்வூதிய நிதியத்திற்குச் செல்லாது என்று அரசு வெளியிட்டுள்ள கேள்வி-பதில் தொகுப்பில் தெரிவிக்கப்பட்டுள்ளது. மத்திய அரசு கடந்த இரண்டு வாரங்களுக்கு முன்பு வெளியிட்ட அறிவிப்பில், மாத அடிப்படைச் சம்பளம் ₹15,000-க்கும் குறைவாக உள்ள தொழிலாளர்கள் பிஎஃப் அமைப்பில் சேருவதைக் கட்டாயமாக்கியுள்ளது. அதுபோல 20 அல்லது அதற்கு மேற்பட்ட ஊழியர்களைக் கொண்டு இயங்கும் நிறுவனங்களும் தொழிலாளர் வருங்கால வைப்பு நிதி அமைப்பில் தங்களைப் பதிவு செய்து கொள்ள வேண்டும் என்று அறிவுறுத்தியுள்ளது. முன்பு ₹15,000-க்கும் மேல் அடிப்படைச் சம்பளம் பெறும் தொழிலாளர்கள் பிஎஃப் அமைப்பில் கட்டாய உறுப்பினராகச் சேர்க்கப்படாமல் இருந்தனர். இந்த ₹15,000 ஊதிய உச்சவரம்பு என்பது கடந்த 2014-ம் ஆண்டு பிரதமர் மோடி தலைமையிலான பாஜக ஆட்சியில் கொண்டுவரப்பட்டது. அதற்கு முன்பு 2004-ம் ஆண்டிலிருந்து 2014-ம் ஆண்டு வரை இந்த உச்சவரம்பு உயர்த்தப்படாமல் இருந்தது. 2014-ல் ஊதிய உச்சவரம்பு உயர்த்தப்பட்டதிலிருந்து தற்போது வரை பல மாநிலங்களிலும், பல்வேறு தொழில்களிலும் குறைந்தபட்ச ஊதியமும் தற்போதைய வரம்பிற்கு நெருக்கமாக உயர்ந்தது. இதனிடையே, கடந்த 16-ம் தேதி பிரதமர் மோடி தலைமையில் நடைபெற்ற மத்திய அமைச்சரவைக் கூட்டத்தில், தொழிலாளர் வருங்கால வைப்பு நிதி அமைப்பின் ஊதிய உச்சவரம்பை ₹15,000-லிருந்து ₹25,000 ஆக உயர்த்த ஒப்புதல் அளிக்கப்பட்டது. இந்த ஒப்புதலின் மூலம் கூடுதலாக 51 லட்சத்திற்கும் மேற்பட்ட தொழிலாளர்கள் பிஎஃப் அமைப்பில் புதிய உறுப்பினர்களாகச் சேரவுள்ளனர்.