சென்னை: தமிழக அரசியல் களத்தில் மிகப் பெரிய ட்விஸ்ட்கள் அடுத்தடுத்து நடந்து வருகிறது. ஏற்கனவே அதிமுகவில் இருந்து நான்கு எம்எல்ஏக்கள் தவெகவுக்கு தாவிவிட்ட நிலையில், அதிமுகவின் டாப் மாஜி அமைச்சர்கள் மற்றும் முன்னாள் எம்எல்ஏக்கள் பலர் நாளை தவெகவில் இணையவுள்ளதாகத் தகவல் வெளியாகியுள்ளது.
தமிழ்நாட்டில் சட்டசபைத் தேர்தல் நடக்கும் முன்பு, தவெகவுடன் கூட்டணி அமைக்க அனைத்துக் கட்சிகளுமே தயக்கம் காட்டின. கூட்டாட்சி என தவெக தரப்பு வெளிப்படையாகவே அழைப்பு விடுத்த போதிலும், எந்தவொரு கட்சியும் கூட்டணி அமைக்கவில்லை. இதனால் தவெக தனித்துப் போட்டியிடும் நிலைக்குத் தள்ளப்பட்டது.
அதேநேரம் தேர்தல் முடிவுகள் வெளியான பிறகு, நிலைமை மொத்தமாக மாறியது. தவெக தனிப்பெரும் கட்சியாக உருவெடுத்த நிலையில் பல கட்சிகள் தவெகவுடன் இணைய ஆர்வம் காட்டின. காங்கிரஸ் முதல் கட்சியாகக் கூட்டணிக்குள் வந்தது. இப்போது தமிழகத்தில் தவெக ஆட்சி நடந்து வருகிறது. கூட்டணி கட்சிகள் மட்டுமின்றி, பல்வேறு அரசியல் தலைவர்களும் தவெகவில் ஐக்கியமாகி வருகிறார்கள். ஏற்கனவே 4 அதிமுக முன்னாள் எம்எல்ஏக்கள், தங்கள் பதவிகளை ராஜினாமா செய்துவிட்டு தவெகவில் இணைந்துவிட்டனர். இதற்கிடையே நாளை மேலும் பல தலைவர்கள் தவெகவில் இணையவுள்ளதாகக் கூறப்படுகிறது. சென்னை பனையூரில் உள்ள தவெக தலைமை அலுவலகத்தில் நாளை காலை 10 மணிக்கு இந்த நிகழ்ச்சி நடைபெறுகிறதாம். இதில் அதிமுகவில் முக்கிய தலைவர்களாக முகங்களாக வலம் வந்த முன்னாள் அமைச்சர்கள் விஜய் முன்னிலையில் தங்களை தவெகவில் இணைத்துக் கொள்ளவுள்ளனர். எம்.சி.சம்பத், கடம்பூர் ராஜூ, உடுமலைப்பேட்டை ராதாகிருஷ்ணன், எம்.எஸ்.எம். ஆனந்தன், பெஞ்சமின் ஆகிய ஐந்து முக்கியத் தலைவர்களும் நாளை நேராகப் பனையூர் அலுவலகத்திற்குச் சென்று விஜய்யைச் சந்தித்துத் தங்களை தவெகவில் இணைத்துக் கொள்ளவிருக்கிறார்கள். முன்னாள் அமைச்சர்கள் மட்டுமின்றி, மாவட்ட அளவில் அதிமுகவின் தூண்களாக இருந்த நிர்வாகிகளும் தவெக பக்கம் சாயவுள்ளனர். அதிமுகவின் தர்மபுரி கிழக்கு மாவட்டச் செயலாளரும், பாப்பிரெட்டிப்பட்டி முன்னாள் எம்எல்ஏவுமான கோவிந்தசாமி மற்றும் சிவன் ஆகியோர் தலைமையில் மேலும் 5 முன்னாள் எம்எல்ஏ-க்களும் நாளை தவெகவில் இணையவுள்ளதாகத் தகவல்கள் வெளியாகியுள்ளன.