சென்னை: டெல்லியில் தேர்தல் ஆணையத்திற்கு எதிராகவும், தலைமை தேர்தல் ஆணையரின் பதவி விலகலைக் கோரியும் போராட்டங்கள் வெடித்துள்ள சூழலில், இந்திய தேர்தல் ஆணையம் (ECI) வெளியிட்டுள்ள ஒரு முக்கிய அறிவிப்பு அரசியல் களத்தில் மிகப்பெரிய சலசலப்பை ஏற்படுத்தியுள்ளது.
உத்தரப் பிரதேசம், பஞ்சாப், உத்தரகாண்ட், கோவா, மணிப்பூர் உள்ளிட்ட 2027-ல் சட்டசபைத் தேர்தல் நடைபெறவுள்ள 5 மாநிலங்கள் மற்றும் தமிழ்நாடு, கேரளா, மேற்கு வங்கம் உட்பட மொத்தம் 17 மாநிலங்கள் மற்றும் யூனியன் பிரதேசங்களில் "சிறப்பு சுருக்கமுறை வாக்காளர் பட்டியல் திருத்தம்" (Special Summary Revision - SSR) நடத்தப்படும் என்று தேர்தல் ஆணையம் அறிவித்துள்ளது. இதற்கான தகுதி நாளாக 2027 ஜனவரி 1-ம் தேதி நிர்ணயிக்கப்பட்டுள்ளது. அதாவது SIR மூலம் உருவாக்கப்பட்ட பட்டியலை திருத்த போகிறார்கள்.
டெல்லியில் SIR (Special Intensive Revision) நடவடிக்கைக்கு எதிராக வலுவான போராட்டங்கள் நடக்கும் அதே வேளையில், இந்த SSR அறிவிப்பு வந்திருப்பது சாதாரண மக்களிடமும் எதிர்க்கட்சிகளிடமும் பல கேள்விகளையும் சந்தேகங்களையும் கிளப்பியுள்ளது. சாதாரண மக்களுக்குப் புரியும் வகையில் சொல்ல வேண்டுமென்றால், தேர்தல் ஆணையம் வாக்காளர் பட்டியலைச் சரிபார்க்க இரண்டு முறைகளைப் பயன்படுத்துகிறது: SIR (தீவிர வாக்காளர் சரிபார்ப்பு): அதிகாரிகள் வீடு வீடாகச் சென்று ஆய்வு செய்து, பழைய பட்டியலை முழுமையாக மறுசீரமைக்கும் மிகத் தீவிரமான நடவடிக்கை. SSR (சுருக்கமுறை வாக்காளர் திருத்தம்): ஆண்டுதோறும் வழக்கமாக நடைபெறும் ஒரு நடைமுறை. இதில் பொதுமக்கள் அல்லது புதிய வாக்காளர்கள் தங்களின் பெயர் சேர்த்தல், நீக்கல், முகவரி திருத்தம் போன்றவற்றுக்கு விண்ணப்பிக்கலாம். டெல்லியில் தற்போது நடக்கும் போராட்டத்தின் மையப் புள்ளியே இந்த SIR நடவடிக்கைதான். "தீவிர சரிபார்ப்பு" என்ற பெயரில் லட்சக்கணக்கான தகுதியான வாக்காளர்களின் பெயர்கள் ஆளும் கட்சிக்கு சாதகமாக, உரிய முன்னறிவிப்பின்றி நீக்கப்படுவதாக எதிர்க்கட்சிகளும் பல்வேறு அமைப்புகளும் குற்றம் சாட்டுகின்றன. தேர்தல் ஆணையம் நடுநிலையாகச் செயல்படவில்லை என்றும், உண்மையான குடிமக்களின் வாக்குரிமை பறிக்கப்படுவதாகவும் கூறி ஜந்தர் மந்தர் உள்ளிட்ட இடங்களில் பெரும் போராட்டங்கள் வெடித்துள்ளன. SIR விவகாரம் பூதாகரமாக வெடித்து, நாடு முழுவதும் விவாதத்தை ஏற்படுத்தியுள்ள நிலையில் தேர்தல் ஆணையம் SSR என்ற வழக்கமான நடைமுறையை 17 மாநிலங்களில் அறிவித்துள்ளது. SIR குறித்த கடுமையான கேள்விகளுக்குப் பதிலளிக்காமல், SSR அட்டவணையை வெளியிட்டு இயல்பான நிலை இருப்பது போன்ற தோற்றத்தை உருவாக்க ஆணையம் பார்க்கிறதா என்ற சந்தேகம் எழுகிறது. தேர்தல் ஆணையத்தின் இந்த புதிய சுற்றறிக்கையின்படி, வாக்குச்சாவடி நிலை அலுவலர்கள் (BLO) வீடு வீடாகச் சரிபார்த்து வரைவுப் பட்டியலை வெளியிடுவார்கள். பெயர் விடுபட்டவர்கள் படிவம் 6 மூலமும், திருத்தங்களுக்குப் படிவம் 8 மூலமும் விண்ணப்பிக்கலாம். ஆனால், ஏற்கனவே வாக்காளர் பட்டியல்களில் செய்யப்பட்ட முறைகேடுகளுக்கு தீர்வு காணாமல் அடுத்தடுத்த நடவடிக்கைகளுக்குச் செல்வது பொதுமக்களுக்கு குழப்பத்தையே தருகிறது. இப்போது மக்கள் மத்தியில் எழும் மிக முக்கியமான கேள்வி: "SIR நடைமுறையே வெளிப்படைத்தன்மை அற்றது, அதில் முறைகேடுகள் உள்ளன என்றால், ஏற்கனவே இந்த நடைமுறைகள் மூலம் உருவான வாக்காளர் பட்டியலைக் கொண்டு நடத்தப்பட்ட தேர்தல்களின் முடிவுகள் நியாயமானவைதானா?" தமிழ்நாடு, கேரளா, மேற்கு வங்கம், மகாராஷ்டிரா போன்ற பெரிய மாநிலங்களில் நடைபெற்ற சட்டமன்றத் தேர்தல்களில் SIR மற்றும் விரிவான திருத்தப் பணிகள் மேற்கொள்ளப்பட்டன. அப்போது பல தொகுதிகளில்: குறிப்பிட்ட சமுதாய அல்லது சிறுபான்மை மக்கள் வாழும் பகுதிகளில் ஆயிரக்கணக்கான பெயர்கள் விடுபட்டதாகப் புகார்கள் எழுந்தன. ஒரு வாக்குச்சாவடியில் இருக்க வேண்டிய பெயர்கள் வேறு இடத்திற்கு மாற்றப்பட்ட குழப்பங்கள் நிலவின. தேர்தல் ஆணையத்தின் சரிபார்ப்பு முறையாக நடக்கவில்லை என கள ஆய்வாளர்கள் சுட்டிக்காட்டினர். ஒரு தேர்தலில் சில நூறு அல்லது சில ஆயிரம் வாக்குகள் வித்தியாசத்தில் வெற்றி தோல்விகள் தீர்மானிக்கப்படுகின்றன. அப்படியிருக்க, வாக்காளர் பட்டியலிலேயே குளறுபடிகள் அல்லது திட்டமிட்ட நீக்கங்கள் நடந்திருந்தால், அந்தத் தேர்தல் முடிவுகள் மக்களின் உண்மையான தீர்ப்பைப் பிரதிபலித்தனவா என்ற நியாயமான சந்தேகம் எழுகிறது. முக்கியமாக தமிழ்நாடு, கேரளா, மேற்கு வங்கம், மஹாராஷ்டிரா தேர்தல் முடிவுகள் சரியா என்ற கேள்வி எழுந்துள்ளன. உத்தரப் பிரதேசம் (403 தொகுதிகள்), பஞ்சாப் (117 தொகுதிகள்), உத்தரகாண்ட் (70 தொகுதிகள்), மணிப்பூர் (60 தொகுதிகள்) மற்றும் கோவா (40 தொகுதிகள்) ஆகிய மாநிலங்களின் சட்டசபை ஆயுட்காலம் 2027 தொடக்கத்தில் முடிவடைகிறது. சட்டப்படி பதவிக்காலம் முடிவதற்கு 6 மாதங்களுக்கு முன்பே தேர்தல் நடத்த ஆணையத்திற்கு அதிகாரம் உண்டு. இந்த மாநிலங்களில் நடத்தப்படும் இந்த வாக்காளர் திருத்தப் பணி முழுமையாக ஒளிவுமறைவின்றி அமைய வேண்டும். அரசியல் கட்சிகளுக்குப் படிக்கக்கூடிய கணினி கோப்புகளாக (Readable PDF) பட்டியலை வழங்க வேண்டும் என்ற புதிய விதியை ஆணையம் கொண்டுவந்தாலும், களத்தில் உண்மை நிலவரம் என்ன என்பதை மக்கள் கூர்ந்து கவனிக்கத் தொடங்கியுள்ளனர். தேர்தல் ஆணையத்தின் மீதான நம்பகத்தன்மையே ஜனநாயகத்தின் அடித்தளம். ஆகவே, போராட்டங்களை ஒடுக்குவதையோ அல்லது வழக்கமான அறிவிப்புகளை வெளியிட்டு விவகாரத்தைக் கடந்து செல்வதையோ விட்டுவிட்டு, SIR மற்றும் வாக்காளர் பட்டியல் திருத்தங்கள் குறித்து எழுப்பப்படும் அனைத்து சந்தேகங்களுக்கும் தேர்தல் ஆணையம் வெளிப்படையான பதிலை அளிக்க வேண்டியது காலத்தின் கட்டாயம்.SIR என்றால் என்ன? மக்கள் ஏன் வீதியில் இறங்கி போராடுகிறார்கள்?
புதிய SSR அறிவிப்பு எதனால் சந்தேகத்தை ஏற்படுத்துகிறது?
தமிழ்நாடு, கேரளா, மேற்கு வங்கம், மகாராஷ்டிரா தேர்தல் முடிவுகள் நியாயமானவையா?
2027 மாநிலத் தேர்தல்கள்: இனி என்ன நடக்கும்?