ஆரம்பமே இடிக்குதே.. திமுக லிஸ்ட்டில் வந்து சேர்ந்த தவெக.. அமித் ஷா சொன்னதை கேட்டீங்களா

அமித்ஷா சொன்ன வார்த்தை

ஏனென்றால், செய்தியாளர்களை சந்தித்த அமித்ஷா, தமிழகத்தில் தவெக இந்த அளவுக்கு ஒரு பிரம்மாண்ட வெற்றியைப் பெறும் என்று யாரும் எதிர்பார்க்கவில்லை எனத் தனது வியப்பை வெளிப்படையாகவே பதிவு செய்திருந்தார். இது அரசியல் வட்டாரத்தில் அப்போது மிகப்பெரிய விவாதத்தைக் கிளப்பியது.

பொதுவாக, ஒரு புதிய மாநில அரசுக்கும் மத்திய அரசுக்கும் இடையேயான உறவு ஆரம்பக் கட்டத்தில் சுமூகமாகவே இருக்கும் என்று எதிர்பார்க்கப்படுகிறது. புதிய முதலமைச்சர் விஜய்யும் மத்திய அரசுடன் தேவையற்ற மோதல்களைத் தவிர்த்து, மாநிலத்தின் வளர்ச்சித் திட்டங்களுக்கான நிதியைப் பெறுவதிலேயே அதிக கவனம் செலுத்துவார் என்றே தெரிகிறது.

அதேபோல், அமித்ஷா போன்ற மூத்த தலைவர்களும் தவெகவின் மக்கள் செல்வாக்கை மதித்து, ஆரம்பத்தில் சுமூகமான போக்கையே கடைப்பிடிப்பார்கள் என்று அரசியல் நிபுணர்கள் கணிக்கிறார்கள்.

ஆனால், இந்த இணக்கமான சூழலுக்குப் பின்னால் டெல்லியின் அசைக்க முடியாத அரசியல் கணக்குகளும், அழுத்தங்களும் ஒளிந்திருக்கின்றன என்பதை மறுப்பதற்கில்லை.

தவெக அரசு - அமித்ஷா

தவெக அரசு காங்கிரஸ் கட்சியுடன் கொண்டுள்ள மறைமுக மற்றும் நேரடித் தொடர்புகளும், ராஜ்யசபா சீட் பகிர்வு போன்ற சமீபத்திய அரசியல் நகர்வுகளும் டெல்லி மேலிடத்துக்கு அதிருப்தியையே தந்துள்ளதாம். காரணம், மத்தியில் காங்கிரஸைத் தங்களின் பிரதான எதிரியாகக் கருதும் பாஜக, தமிழகத்தில் தவெக - காங்கிரஸ் கூட்டணி வலுவடைவதை ஒருபோதும் விரும்பாது.

கடந்த வாரம் விஜய் டெல்லி சென்றபோது அமித்ஷாவைச் சந்திக்க முடியாமல் போனதன் பின்னணியிலும் இந்த அதிருப்தி இருந்திருக்கலாம் என்றே பரபரப்பாகப் பேசப்பட்டது. இதன் காரணமாக, காங்கிரஸ் கூட்டணியைக் காரணம் காட்டி தவெக அரசுக்கு ஆளுநர் மாளிகை மூலமான நிர்வாகக் கெடுபிடிகள், மத்திய உளவுத்துறை மற்றும் விசாரணை அமைப்புகளின் கண்காணிப்புகள் எனப் பல்வேறு வடிவங்களில் மறைமுக நெருக்கடிகள் வர வாய்ப்புகள் அதிகம் என்று அரசியல் திறனாய்வாளர்கள் யூகிக்கிறார்கள்.

இந்த சூழலில்தான், டெல்லியில் நேற்று நடந்த தமிழக பாஜகவின் மாநில மையக்குழு கூட்டத்தில் அமித்ஷா பேசிய பேச்சு ஒட்டுமொத்த அரசியல் பார்வையையும் தலைகீழாக மாற்றியிருக்கிறது.

திமுக - தவெக டார்கெட்

"உங்களின் கொள்கை எதிரிகள் திமுகவும், தமிழக வெற்றிக் கழகமும்தான். திமுக ஆட்சியில் நடந்த ஊழல்கள், தவெக ஆட்சியில் நடக்கும் தவறுகளைப் பற்றி மக்களிடம் பேச வேண்டும்" என்று அமித்ஷா மிக வெளிப்படையாகவே பாஜக நிர்வாகிகளுக்கு உத்தரவிட்டுள்ளாராம்.

இதன் மூலம், தமிழகத்தில் திமுகவுக்கு இணையான ஒரு பலமான அரசியல் சக்தியாகவே தவெகவை அமித்ஷா பார்க்கிறார் என்பதும், தவெகவை வெறும் ஒரு தற்காலிக சக்தியாக நினைக்காமல், தங்களின் முதன்மை எதிரியாக பாஜக பிரகடனப்படுத்தியுள்ளது என்பதும் உறுதியாகியுள்ளது.

அமித்ஷாவின் வியப்பும், வியூகமும்

அமித்ஷாவின் இந்த வியப்பும், வியூகமும் தமிழக அரசியலில் ஒரு புதிய திருப்பத்தை தந்துள்ளது. பாஜக தவெகவை ஆரம்பத்தில் நட்போடு அணுகுவது போல் காட்டிக் கொண்டாலும், பின்னணியில் தங்களின் அரசியல் அழுத்தங்களைத் தரத் தவறாது என்பதை அமித்ஷாவின் தற்போதைய பேச்சு நிரூபித்துள்ளது.

இந்த அரசியல் நெருக்கடிகளை, குறிப்பாக காங்கிரஸ் உடனான உறவையும் தக்கவைத்துக் கொண்டு, மத்திய அரசின் அழுத்தங்களையும் புதிய முதலமைச்சர் விஜய் எப்படி முதிர்ச்சியோடு எதிர்கொள்ளப் போகிறார் என்பதைப் பொறுத்தே தமிழகத்தின் எதிர்கால அரசியல் நகர்வுகள் அமையும்... பொறுத்திருந்து பார்ப்போம்..!!