சென்னை: "நாங்கள் ஆட்சிக்கு வந்தால் நேர்மையான, வெளிப்படையான நிர்வாகம் தருவோம்" என்று கூறி மக்கள் ஆதரவுடன் ஆட்சிக்கு வந்த தமிழக வெற்றிக் கழக அரசு மீது, தற்போது மிகக் கடுமையான குற்றச்சாட்டுகள் எழுந்துள்ளன. தமிழகத்தில் தவெக ஆட்சி பொறுப்பேற்றதில் இருந்தே கிராமங்கள் முதல் நகரங்கள் வரை அறிவிக்கப்படாத கடுமையான மின் வெட்டு பொதுமக்களை வாட்டி வதைத்து வருகிறது.
தொடக்கத்தில் கோடைக்காலம், பருவமழை மாற்றம், பராமரிப்புப் பணி என அரசுத் தரப்பில் காரணங்கள் சொல்லப்பட்டாலும், உண்மை நிலவரம் வேறு என்ற அதிர்ச்சித் தகவல் தற்போது வெளிவந்துள்ளது. தமிழகத்தில் வேண்டுமென்றே செயற்கையாக கடுமையான மின் தடையை ஏற்படுத்தி, "அவசரக் கால மின் பற்றாக்குறை" என்ற மாயத் தோற்றத்தை உருவாக்கி, அதன் மூலம் கொள்ளை விலைக்கு தனியார் நிறுவனங்களிடம் இருந்து மின்சாரம் வாங்க திட்டமிடப்பட்டதா என்ற விவாதம் தமிழ்நாடு முழுவதும் காட்டுத்தீயாகப் பரவி வருகிறது.
எதிர்க்கட்சிகள் முன்வைக்கும் குற்றச்சாட்டின் படி, தவெக அரசு அமைந்ததும் ஏற்கனவே முந்தைய ஆட்சிக் காலத்தில் நடைமுறையில் இருந்த அல்லது குறைந்த விலைக்குப் பேசப்பட்டு வந்த பல குறுகிய கால மின் கொள்முதல் ஒப்பந்தங்கள் பல்வேறு காரணங்களைச் சொல்லி மெதுவாக ஓரங்கட்டப்பட்டன அல்லது முடக்கப்பட்டன. குறைந்த விலையில் மின்சாரம் கிடைப்பதற்கான வழிகள் அடைக்கப்பட்டதால், மாநிலத்தின் மின் உற்பத்தி அமைப்புகள் முழு வீச்சில் இயங்காமல் வைக்கப்பட்டதால், மாலை நேரங்களில் 1,500 முதல் 2,000 மெகாவாட் மின் பற்றாக்குறை உருவானது. உற்பத்தி சரிந்ததால் தமிழகத்தின் பல மாவட்டங்களில் தொடர் மின் தடை ஏற்பட்டது. மக்கள் கொதித்தெழுந்து வீதிக்கு வந்து போராடும் நிலைக்கு தள்ளப்பட்டனர். மக்கள் ஆத்திரத்தில் இருக்கும்போது, "மின் வெட்டை உடனே சரி செய்ய வேண்டும்; வேறு வழியில்லை" என்ற சாக்குப்போக்கை கூறி, வெளிச்சந்தையில் இருந்து ஒரு யூனிட் மின்சாரத்தை சராசரியாக 35 ரூபாய்க்கு (ரூ. 31.99 முதல் ரூ. 37 வரை) வாங்க அவசர அவசரமாக டெண்டர் விடப்பட்டது. சாதாரண சந்தை விலையை விட நான்கு முதல் ஐந்து மடங்கு அதிக விலைக்கு டெண்டர் போட்டு, அதில் பல நூறு கோடி ரூபாய் கமிஷன் அடிப்பதற்காகவே இந்த "மின்வெட்டு நாடகம்" அரங்கேற்றப்பட்டதா என்ற கேள்விதான் தற்போது பொதுமக்கள் மத்தியில் பெரும் புயலைக் கிளப்பியுள்ளது. ஒரு யூனிட் மின்சாரம் ₹35 என்பது எவ்வளவு பெரிய சுமை என்பதை எளிமையாகப் புரிந்து கொள்ளலாம்: தமிழகத்தில் பொதுமக்களுக்கு ஒரு யூனிட் மின்சாரம் குறைந்த கட்டணத்தில் (சராசரியாக 5 முதல் 7 ரூபாய்க்கு) வழங்கப்படுகிறது. ஆனால் அரசு தனியார் நிறுவனங்களிடம் வாங்குவதோ ஒரு யூனிட்டுக்கு 35 ரூபாய். அதாவது, ஒவ்வொரு யூனிட் மின்சாரத்திற்கும் அரசுக்கு 28 முதல் 30 ரூபாய் வரை நேரடி இழப்பு ஏற்படுகிறது. ஏற்கனவே இரண்டரை லட்சம் கோடி ரூபாய் கடனில் தத்தளிக்கும் மின்சார வாரியம் ஆயிரக்கணக்கான மெகாவாட் மின்சாரத்தை இந்த விலைக்கு வாங்கினால் பல ஆயிரம் கோடி ரூபாய் கூடுதல் நஷ்டத்தைச் சந்திக்கும். இறுதியில் இந்த இழப்பை ஈடுகட்ட மக்கள் மீதுதான் மின்கட்டண உயர்வாக அரசு சுமையை ஏற்றும். அதிமுக பொதுச்செயலாளர் எடப்பாடி பழனிசாமி மற்றும் முன்னாள் மின்சாரத்துறை அமைச்சர் வி. செந்தில் பாலாஜி உள்ளிட்ட தலைவர்கள் இந்த விவகாரத்தில் சரமாரியான குற்றச்சாட்டுகளை அடுக்கியுள்ளனர். முன்பு 15 முதல் 20 ரூபாய்க்கு மின்சாரம் வாங்கியபோது அதை "ஊழல்" என்று கூச்சலிட்டவர்கள், இப்போது 35 ரூபாய்க்கு டெண்டர் விடுவது யாருடைய ஆதாயத்திற்காக என்று அவர்கள் கேள்வி எழுப்பியுள்ளனர். சொந்த மாநில அனல் மின் உற்பத்தி நிலையங்களை முழுமையாக இயக்காமல் முடக்கிப் போட்டுவிட்டு, தனியார் கேஸ் ஆலைகளுக்கு சிவப்பு கம்பளம் விரிப்பது மிகப்பெரிய "மெகா வசூல் வேட்டை" என்றும், சில குறிப்பிட்ட இடைத்தரகர்கள் மற்றும் தனியார் முதலாளிகளுக்கு பல கோடி ரூபாய் கமிஷன் கிடைக்கவே பழைய டெண்டர்களை புறந்தள்ளிவிட்டு இந்த புதிய டெண்டர் கொண்டுவரப்பட்டது என்றும் எதிர்க்கட்சிகள் ஆணித்தரமாகக் குற்றம்சாட்டுகின்றன. மின்சாரத்துறை அமைச்சர் சி.டி.ஆர். நிர்மல் குமார் இந்த குற்றச்சாட்டுகளை மறுத்து, "மின் தடையைத் தவிர்த்து மக்களுக்கு தடையில்லா மின்சாரம் தருவதே எங்கள் நோக்கம்; உச்சகட்ட தேவையின் போது மட்டுமே மின்சாரம் எடுக்கப்படும்" என்று சமாளிப்பு அறிக்கைகளை வெளியிடுகிறார். ஆனால் பொதுமக்கள் கேட்கும் எளிய கேள்வி ஒன்றுதான்: ஆட்சிக்கு வந்து இத்தனை மாதங்கள் ஆகியும் முன்கூட்டியே திட்டமிட்டு குறைந்த விலையில் மின்சாரம் வாங்காதது ஏன்? மாநிலத்தின் மின் தேவையை முன்கூட்டியே கணிக்க தவறியது தவெக அரசின் நிர்வாகச் சீர்கேடா அல்லது திட்டமிட்டு ஊழல் செய்வதற்காக மின்வெட்டை வரவழைத்தார்களா? "ஊழல் கட்சிகளுக்கு மாற்று நாங்கள் தான், மக்கள் நலனே எங்கள் கொள்கை" என்று சினிமா பாணியில் வசனம் பேசி ஆட்சிக்கு வந்த முதலமைச்சர் விஜய், ஆரம்பத்திலேயே மின்சாரத் துறையில் இவ்வளவு பெரிய முறைகேட்டுப் புகாரில் சிக்கியிருப்பது தமிழக மக்களிடையே பெரும் ஏமாற்றத்தை உருவாக்கியுள்ளது. மின்தடை மூலம் மக்களைத் தவிக்கவிட்டு, பின் அவசர டெண்டர் என்ற பெயரில் மக்கள் வரிப்பணத்தை தனியாருக்கு தாரைவார்க்கும் இந்த ₹35 டெண்டர் விவகாரம் குறித்து ஒரு சுதந்திரமான உயர்நீதிமன்ற ஓய்வுபெற்ற நீதிபதி தலைமையில் வெளிப்படையான விசாரணை நடத்தப்பட வேண்டும் என்பதே பொதுமக்களின் உடனடி கோரிக்கையாக உள்ளது.பழைய டெண்டர்கள் ரத்து... புதிய டெண்டரில் மர்மம்!
₹35 டெண்டர்: எளிய மக்களுக்கான நேரடி கணக்கு
கமிஷன் வேட்டைக்கான திட்டமா? எதிர்க்கட்சிகள் காட்டம்
அமைச்சர் அளிக்கும் விளக்கம் எடுபடுமா?
மாற்றத்தை நம்பிய மக்களுக்கு விழுந்த சவுக்கடி