பாசத்துக்குரிய உங்கள் பாரதிராஜா பேசுகிறேன்.. தமிழ் சினிமாவின் போக்கையே மாற்றிய மாபெரும் இயக்குநர்

"உங்கள் பாசத்திற்குரிய பாரதிராஜா பேசுகிறேன்"

'16 வயதினிலே' திரைப்படத்தின் மூலம் இயக்குநராக அறிமுகமான பாரதிராஜா, பல புதுமுகங்களை திரைத்துறைக்கு கொண்டு வந்தார். பல மெகா ஹிட் படங்களை கொடுத்த பாரதிராஜா, தயாரிப்பாளர், நடிகர் என பன்முகத் திறமைகளை கொண்டவர். "உங்கள் பாசத்திற்குரிய பாரதிராஜா பேசுகிறேன்" என்று தனது கந்தர்வக் குரலால் ரசிகர்கள் மனதில் நீங்கா இடம் பெற்றவர். அதனை தனது டிரேட்மார்க் போலவே பாரதிராஜா பயன்படுத்தி வந்தார்.

தமிழ் சினிமாத்துறையில் கிராமம் சார்ந்த படங்களுக்கு என்று இருந்த இலக்கணத்தை தனது படைப்பாற்றலால் மாற்றிக் காட்டினார். செயற்கையான ஸ்டுடியோ செட்களில் முடங்கிக் கிடந்த தமிழ் சினிமாவை, கிராமத்து மண்ணுக்கும் கருவேலங்காட்டு அழகிற்கும் அழைத்துச் சென்று அப்படியே படம் பிடித்துக் காட்டிய முதல் பெருமை பாரதிராஜாவையே சேரும்.

முழுவதும் கிராமத்துப் பின்னணியில் உருவான 'சப்பாணி' கதாபாத்திரத்தின் மூலம் இதை அப்படியே காணலாம். தனது முதல் படமான '16 வயதினிலே' மூலம் முதன்முதலாக படப்பிடிப்பை வெளிப்புறப் படப்பிடிப்புத் தளங்களுக்கு கொண்டு சென்றார்.

பக்கத்து வீட்டு பெண் தோற்றத்தில் கதாநாயகி

கிராமத்து அழகை செயற்கைத்தனம் இன்றி அப்படியே காட்டியது ரசிகர்களின் மனதை கவர்ந்த நிலையில், பின்னாள்களில் அதை பின்பற்றி பல படங்கள் உருவாகின. இயல்பான கதாபாத்திரங்கள், பக்கத்து வீட்டு பெண் தோற்றத்தில் கதாநாயகி என சினிமாவில் ரசிகர்களை தனது முதல் படத்திலேயே திருப்திப்படுத்திய பாரதிராஜா, பல படங்களில் இதனை பின்பற்றி தமிழ் சினிமாவின் இலக்கணத்தையே மாற்றி அமைத்தார்.

தமிழ், தெலுங்கு, இந்தி உள்ளிட்ட மூன்று மொழிகளிலும் படங்களை இயக்கியுள்ளார். 'பதினாறு வயதினிலே', 'சிகப்பு ரோஜாக்கள்', 'கிழக்கே போகும் ரயில்', 'நிறம் மாறாத பூக்கள்', 'நிழல்கள்', 'அலைகள் ஓய்வதில்லை', 'புதுமைப் பெண்', 'மண்வாசனை', 'முதல் மரியாதை', 'கடலோரக் கவிதைகள்', 'கொடி பறக்குது', 'புது நெல்லு புது நாத்து', 'கிழக்குச் சீமையிலே' உள்ளிட்ட பல ஹிட் படங்களை கொடுத்தவர் பாரதிராஜா.

திரையுலகம் அதிர்ச்சி

தமிழ் சினிமாவின் மகத்தான இயக்குநராக விளங்கிய பாரதிராஜாவின் மறைவு ஒட்டுமொத்த திரைத்துறையினரையும் ரசிகர்களையும் மீளாத சோகத்தில் ஆழ்த்தி உள்ளது. சுகாதார ஆய்வாளராக பணியாற்றிய பாரதிராஜா, சினிமா உலகில் 1977-ல் அறிமுகமானார். கடைசியாக 2022-ஆம் ஆண்டு வெளியான தனுஷ் நடித்த 'திருச்சிற்றம்பலம்' திரைப்படத்தில் நடித்து இருந்தார். 6 தேசிய விருதுகளும், பத்மஸ்ரீ விருதினையும் பெற்ற பாரதிராஜா இன்று மறைந்தாலும், அவரது புகழ் என்றென்றும் மறையாது..