பூட்டி கிடக்கும் பனையூர் கட்சி ஆபீஸ்! தவெகவில் இணைய காத்துக் கிடக்கும் விஜயதாரணி டூ பாலகங்கா வரை!

பனையூரில் உள்ள தவெக தலைமை அலுவலகத்தின் கதவுகள் இன்னும் திறக்கப்படவில்லை. ஆனால், வாசலில் காத்துக் கிடக்கும் கார்களின் அணிவகுப்பும், கையில் பூங்கொத்துகளுடன் நிற்கும் அரசியல் முகங்களும் தமிழக அரசியலில் ஏதோ ஒரு பெரிய மாற்றம் நிகழப் போவதை உரக்கச் சொல்கின்றன.

விஜயதாரணி: இரும்புப் பெண்மணி

இந்த வரிசையில் முதன்மையான பெயராக அடிபடுவது விஜயதாரணி.
கவிமணி தேசிக விநாயகம் பிள்ளையின் கொள்ளுப் பேத்தியான இவர், ஒரு வழக்கறிஞர்.
அரசியல் பயணம்: இந்திய தேசிய காங்கிரஸில் தனது பயணத்தைத் தொடங்கியவர். கன்னியாகுமரி மாவட்டம் விளவங்கோடு தொகுதியில் இருந்து 2011, 2016 மற்றும் 2021 எனத் தொடர்ந்து மூன்று முறை எம்.எல்.ஏ-வாகத் தேர்ந்தெடுக்கப்பட்டவர்.

பதவிகள்: தமிழக மகிளா காங்கிரஸ் தலைவியாகச் செயல்பட்டவர். சட்டப்பேரவையில் காங்கிரஸின் குரலாக ஒலித்தவர்.

திருப்பம்: கடந்த பிப்ரவரி மாதம் (2024) காங்கிரஸில் இருந்து விலகி பாஜாகவில் இணைந்தார். அவர் இணைந்து 2 ஆண்டுகளாகியும் அவருக்கு பதவிகள் ஏதும் தரப்படாமல் இருந்தது. இந்த நிலையில் சட்டசபை தேர்தலில் விளவங்கோடு தொகுதி ஒதுக்கப்பட்டது. அந்த தேர்தலில் தோல்வி அடைந்தார். இதனால் எந்த பதவியும் இல்லாமல் இருந்து வந்த விஜயதாரணி தற்போது அங்கிருந்து விலகி, விஜய்யின் தவெகவில் இணைகிறார். விஜயதாரணியின் வருகை தவெக-விற்கு தென் தமிழகத்தில் ஒரு வலுவான பெண் முகத்தையும், அனுபவம் வாய்ந்த ஒரு பேச்சாளரையும் பெற்றுத் தரும் என எதிர்பார்க்கப்படுகிறது.

அதிமுகவின் தூண்கள் தவெக பக்கம்?

அதிமுகவின் கோட்டையாகக் கருதப்படும் பகுதிகளில் இருந்து முக்கியத் தலைவர்கள் பனையூர் நோக்கி வருவது எடப்பாடி பழனிசாமி தரப்பை யோசிக்க வைத்துள்ளது.

என். பாலகங்கா

அதிமுகவின் மிக முக்கியமான பழைய முகங்களில் ஒருவர். முன்னாள் ராஜ்யசபா எம்.பி (2008-2014). வடசென்னை மாவட்டச் செயலாளராக நீண்ட காலம் பணியாற்றியவர். சென்னை அரசியலில் அடிமட்டத் தொண்டர்கள் வரை செல்வாக்கு மிக்கவர். இவரின் தவெக வருகை சென்னையில் விஜய்க்குப் பெரிய பலமாக அமையும்.

பச்சை மால்

கன்னியாகுமரி மாவட்டத்தைச் சேர்ந்த அதிமுகவின் மூத்த புள்ளி. முன்னாள் முதல்வர் ஜெயலலிதா அமைச்சரவையில் வனத்துறை மற்றும் தொழிலாளர் நலத்துறை அமைச்சராகப் பணியாற்றியவர். 2011-ல் கன்னியாகுமரி தொகுதியில் இருந்து எம்.எல்.ஏ-வாகத் தேர்ந்தெடுக்கப்பட்டவர். குமரி மாவட்டத்தில் அதிமுகவின் முகமாக இருந்த இவர், இப்போது தவெக-வில் இணையக் காத்திருப்பது தென் மாவட்ட அரசியலில் அதிர்வலைகளை ஏற்படுத்தியுள்ளது.

பாண்டி ரவி

நடிகர் பாண்டி ரவி, பாஜகவில் இருந்தார். அங்கு தனக்கு முக்கியத்துவம் தரவில்லை என கருதிய அவர் தவெகவில் இணைகிறார். இவர்களுடன் அமமுகவின் முக்கிய நிர்வாகிகள் சிலரும் பனையூர் வாசலில் தவம் கிடக்கிறார்கள்.

கதவு திறக்காத அலுவலகம்... குறையாத ஆர்வம்!

தற்போது வரை தவெக தலைமை அலுவலகத்தின் கதவுகள் அதிகாரப்பூர்வமாகத் திறக்கப்படவில்லை. ஆனாலும், அதிமுக, அமமுக மற்றும் பாஜகவில் இருந்து அதிருப்தியில் உள்ளவர்களும், புதிய மாற்றத்தை விரும்புபவர்களும் பனையூரில் குவிந்து வருகின்றனர்.

காலை 11 மணிக்கு கட்சி இணைப்பு விழா என சொல்லப்பட்ட நிலையில் காலை 9 மணிக்கே பனையூர் கட்சி அலுவலகத்தில் கூட்டம் களை கட்டி வருகிறது. காலை 11 மணிக்கு மேல் முன்னாள் எம்எல்ஏக்களை மட்டும் அலுவலகத்தில் அழைத்து சென்று இணைப்பு விழா நடத்தப்படும் என சொல்லப்படுகிறது.

கடந்த சில தினங்களுக்கு முன்புதான் அதிமுகவில் இருந்து முன்னாள் அமைச்சர்கள் உடுமலை ராதாகிருஷ்ணன், சிவபதி, கடம்பூர் ராஜு உள்ளிட்டோர் தவெகவில் இணைந்தனர் என்பது குறிப்பிடத்தக்கது.

பழைய முகங்கள்... புதிய கட்சி... தமிழக அரசியலில் 'தளபதி'யின் ஆட்டம் ஆரம்பமாகிவிட்டது!