கர்நாடகாவிடம் தமிழக முதல்வர் மண்டியிட தேவையில்லை! மேகதாது விவகாரத்தில் சிபிஎம் எம்எல்ஏ திட்டவட்டம்

அதில் பல்வேறு கட்சிகளை சேர்ந்தவர்களும் பேசினர். அப்போது சிபிஎம் சார்பில் பேசிய செல்லசாமி எம்எல்ஏ, தமிழ்நாடு முதல்வர் எந்தவொரு காரணத்திற்காகவும் கர்நாடகாவிடம் மண்டியிட தேவையில்லை என்றும் தமிழக முதல்வருக்கு ஏற்படும் அவமானம் ஒட்டுமொத்த தமிழகத்திற்கும் ஏற்படும் அவமானம் என குறிப்பிட்டார்.

இது தொடர்பாக அவர் மேலும் கூறுகையில், "மேகதாது அணையை கட்டக்கூடாது என்று ஏற்கனவே உச்ச நீதிமன்றமும், நடுவர் மன்றமும் ஏற்கனவே முடிவு செய்த பிறகும், அந்த அணையை கட்டியே தீருவேன் என கர்நாடகா சொல்வதை ஒருபோதும் ஏற்க முடியாது. அதேநேரம் இதை நாம் சட்டரீதியாக எதிர்கொள்ள வேண்டுமே தவிர. அவர்களிடம் போய் மண்டியிட தேவையில்லை. காவிரி என்பது கர்நாடகாவுக்கு மட்டுமானது இல்லை. அதில் பல்வேறு மாநிலங்களும் உரிமை இருக்கிறது.

எனவே, தமிழக முதல்வர் அங்கே சென்று அவர்களிடம் மண்டியிட தேவையில்லை. அப்படியொரு அவமானம் ஏற்பட்டால் அந்த அவமானத்தை தாங்க தயார் என்று முதல்வர் குறிப்பிட்டார். ஆனால், அது சரி இல்லை. முதல்வர் பதவியில் இருக்கும் அவருக்கு ஒரு அவமானம் ஏற்பட்டால்.. அது ஒட்டுமொத்த தமிழகத்திற்கும் ஏற்பட்ட அவமானமாகவே கருதப்படும். எனவே, இதுபோல கர்நாடகாவிடம் சென்று மண்டியிட தேவையில்லை.

இந்த விவகாரம் தொடர்பாக அனைத்து கட்சி கூட்டத்தை கூட்ட வேண்டும். அனைத்து தரப்பினரின் கருத்தையும் நாம் அறிய வேண்டும். அனைத்து மக்களையும் அனைத்து கட்சியினரையும் ஒருங்கிணைத்து, நாம் ஒருமித்த முடிவை எடுக்க வேண்டும்.

காவிரி சார்ந்து இருக்கும் மக்களால் குருவை சாகுபடி கூட செய்ய முடியாத நிலை ஏற்பட்டுள்ளது. அவர்களுக்கு தேவையான நிவாரணத்தை தர வேண்டும். மொத்தத்தில் இந்த விவகாரம் தொடர்பாக விவாதிக்க அனைத்து கட்சி கூட்டத்தை கூட்ட வேண்டும்" என்றார்.