தலைமைச் செயலகத்தில் ‘செல்பி’ மோகம்.. விஜய் காட்டிய மெத்தனம்? முடங்கும் பணிகள், திணறும் அதிகாரிகள்!

செல்பி விவகாரம்

தலைமைச் செயலகத்தில் பணிபுரியும் அரசு ஊழியர்கள் பலரும், முதலமைச்சர் விஜய்யுடன் ஒரு 'செல்ஃபி' எடுப்பதற்கான வாய்ப்பை ஏற்படுத்தித் தருமாறு தங்களது துறை உயர் அதிகாரிகளைத் தொடர்ந்து நச்சரித்து வருவதாகத் தகவல்கள் வெளியாகியுள்ளன.

ஊழியர்களின் இந்த திடீர் செல்ஃபி ஆர்வத்தால் தலைமைச் செயலகத்தின் அன்றாட நிர்வாகப் பணிகள் கடுமையாகப் பாதிக்கப்பட்டு, அரசு கோப்புகள் தேங்கி நிற்கும் சூழல் உருவாகியுள்ளது.

குடும்பத்தினரின் நச்சரிப்பு

தலைமைச் செயலக ஊழியர்களின் குடும்ப உறுப்பினர்கள் மற்றும் பிள்ளைகள், "முதலமைச்சர் விஜய் வளாகத்திற்கு வரும்போது எப்படியாவது அவரை நெருங்கி ஒரு செல்ஃபி எடுத்து வாருங்கள்" என்று வீட்டில் கடுமையான அழுத்தம் கொடுத்து வருவதாகக் கூறப்படுகிறது. குடும்பத்தினரின் இந்தத் தொடர் வற்புறுத்தலால் வேறு வழியின்றி, அரசு ஊழியர்கள் தங்களது துறை சார்ந்த உயர் அதிகாரிகளுக்கு நெருக்குதல் கொடுக்கத் தொடங்கியுள்ளனர். எப்படியாவது தங்களை முதலமைச்சருக்கு அருகில் கொண்டு சேர்க்க வேண்டும் என்பதே இவர்களின் கோரிக்கையாக உள்ளது.

மரத்தடிகளில் காத்திருக்கும் ஊழியர்கள்

முதலமைச்சர் விஜய் தலைமைச் செயலக வளாகத்திற்குள் நுழையும்போதோ அல்லது அங்கிருந்து புறப்படும்போதோ, அவரைக் கண் இமைக்காமல் பார்த்துவிட வேண்டும் என்ற நோக்கத்தில் ஊழியர்கள் ஆங்காங்கே குழுமி விடுகின்றனர். வேலை நேரத்தில்கூட தங்களின் இருக்கைகளைப் புறக்கணித்துவிட்டு, வாகனங்கள் நிறுத்துமிடம், மரத்தடிகள் மற்றும் நுழைவாயில் பகுதிகளில் ஊழியர்கள் மணிக்கணக்காகக் காத்திருக்கின்றனர். கீழ்நிலை ஊழியர்கள் இப்படிப் பணிகளைப் போட்டுவிட்டு வெளியே சுற்றுவதால், துறை அதிகாரிகள் பெரும் தர்மசங்கடத்திற்கு ஆளாகியுள்ளனர். பணி நேரத்தில் வெளியே சுற்றும் ஊழியர்களைக் கண்டித்து வேலை வாங்க முடியாமல் அதிகாரிகள் கைகளைக் கட்டிக்கொண்டு திணறி வருகின்றனர்.

அப்படி என்னதான் நடக்கிறது? - முதலமைச்சர் அலுவலகத்தின் மெத்தனம்

இந்த விவகாரத்தில் முதலமைச்சர் அலுவலகம் பெரிய அளவில் ஆர்வம் காட்டாமல், அலட்சியமாக இருப்பதாகக் குற்றச்சாட்டு எழுந்துள்ளது. முதலமைச்சர் வரும்போது ஆங்காங்கே மக்கள் கூட்டமாக நின்று வரவேற்பது அவரது அரசியல் பிம்பத்திற்கு நல்லதுதான் என்ற கணக்கில், இந்தத் தன்னிச்சையான கூட்டத்தை முதலமைச்சர் அலுவலகம் கண்டுகொள்ளாமல் விட்டுவிடுவதாகத் தெரிகிறது.

முதலமைச்சர் தரப்பில் காட்டப்படும் விருப்பம் இன்மை

முதலமைச்சர் தரப்பில் காட்டப்படும் இந்த மெத்தனப் போக்கைப் பயன்படுத்திக் கொண்டு, ஊழியர்கள் தங்களது கடமைகளில் இருந்து தவறி வருகின்றனர். இதன் நேரடி விளைவாக, தலைமைச் செயலகத்தில் பல்வேறு மக்கள் நலத்திட்டங்கள் மற்றும் துறைகள் சார்ந்த முக்கியக் கோப்புகள் ஆமை வேகத்தில் நகரத் தொடங்கியுள்ளன. ஊழியர்களின் இந்தச் செல்ஃபி மோகத்திற்கு முற்றுப்புள்ளி வைக்காவிட்டால் நிர்வாகம் முற்றிலும் முடங்கும் என சமூக ஆர்வலர்கள் கவலை தெரிவித்துள்ளனர்.