சென்னை: தமிழகத்தில் புதிய ஆட்சி அமைந்ததில் இருந்தே, மத்திய அரசுடனான உறவை மாநில அரசு எவ்வாறு கையாளப் போகிறது என்ற எதிர்பார்ப்பு அரசியல் வட்டாரங்களில் பரவலாக இருந்து வருகிறது. கூட்டாட்சித் தத்துவத்தை முன்னிறுத்தி நிர்வாக ரீதியாக மத்திய அரசுடன் மோதல் போக்கை முற்றிலும் தவிர்த்து, சுமுகமான நட்புறவை நிலைநிறுத்துவதில் விஜய் மிகுந்த முனைப்பு காட்டி வருவதாக தலைமைச் செயலகத் தகவல்கள் தெரிவிக்கின்றன.
சமீபத்தில் தென்மண்டல முதலமைச்சர்கள் மாநாட்டில் பங்கேற்பதற்காக மத்திய உள்துறை அமைச்சர் அமித் ஷா சென்னைக்கு வருகை தந்திருந்தார். அப்போது முதலமைச்சர் விஜய் அவரை நேரில் சந்தித்துப் பேசினார். மரியாதை நிமித்தமாக நடைபெற்ற இந்தச் சந்திப்பின்போது, தமிழகத்தின் பாரம்பரிய முறைப்படி தயாரிக்கப்பட்ட வீட்டு மசாலாப் பொடிகளை அமித் ஷாவுக்கு முதலமைச்சர் விஜய் பரிசாக வழங்கியுள்ளார். முற்றிலும் தனிப்பட்ட முறையிலான இந்த அன்புப் பரிசு, இரு தலைவர்களிடையேயான இணக்கமான சூழலை வெளிப்படுத்தும் விதமாக அமைந்தது.
மத்திய அரசுடன் தனிப்பட்ட அளவிலும், நிர்வாக ரீதியிலும் உருவாகியுள்ள இந்த நல்லுறவை எக்காரணம் கொண்டும் பாழாக்கிவிடக் கூடாது என்பதில் முதலமைச்சர் விஜய் மிகத் தீவிரமாக இருக்கிறார். அதன் எதிரொலி சமீபத்தில் நடைபெற்ற தமிழக சட்டப்பேரவைக் கூட்டத்தொடரிலும் நேரடியாக எதிரொலித்தது. சட்டப்பேரவை விவாதத்தின்போது, சட்டமன்ற உறுப்பினர் வன்னி அரசு பிரதமர் நரேந்திர மோடி மற்றும் மத்திய உள்துறை அமைச்சர் அமித் ஷா ஆகியோரின் செயல்பாடுகள் குறித்து மிகக் கடுமையான சில விமர்சனங்களை முன்வைத்துப் பேசினார். அவரது பேச்சு அவையில் பெரும் சலசலப்பை ஏற்படுத்திய நிலையில், உடனடியாகத் தலையிட்ட அமைச்சர் ஆதவ் அர்ஜுனா, வன்னி அரசு பேசிய சர்ச்சைக்குரிய கருத்துகளை அவை விதிகளின்படி அவைக் குறிப்பிலிருந்து நீக்குவதற்கு உரிய நடவடிக்கைகளை மேற்கொண்டார். மத்திய தலைவர்கள் மீதான கடுமையான விமர்சனங்களை அவைக் குறிப்பில் இருந்து நீக்கிய இந்த நடவடிக்கை அரசியல் களத்தில் பெரும் விவாதத்தை ஏற்படுத்தியது. மத்திய பாஜக அரசைத் தேவையின்றி அரசியல் ரீதியாகத் தாக்கவோ, கடுமையான வார்த்தைகளால் விமர்சிக்கவோ கூடாது எனத் தனது அமைச்சரவை சகாக்களுக்கு முதலமைச்சர் விஜய் திட்டவட்டமாக அறிவுறுத்தியுள்ளதாகக் கூறப்படுகிறது. மாநிலத்தின் நிதி தேவைகள், திட்டங்களுக்கான ஒப்புதல்கள் மற்றும் கட்டமைப்பு வளர்ச்சி போன்ற விவகாரங்களில் மத்திய அரசின் ஒத்துழைப்பு தடையின்றி கிடைக்க வேண்டும் என்பதே இந்த அணுகுமுறைக்கு முக்கியக் காரணமாகப் பார்க்கப்படுகிறது. அமைச்சர்களிடம்.. நீங்கள் உங்கள் கோரிக்கையை வையுங்கள். ஆனால் மத்திய அரசை விமர்சனம் செய்ய வேண்டாம். அமித் ஷா - மோடியை விமர்சனம் செய்ய வேண்டாம். நீங்கள் மத்திய அரசுடன் நெருக்கடியாக இருந்து அவர்களிடம் இருந்து நல்ல திட்டங்களை மாநில அரசுக்கு பெற்றுக்கொடுக்க வேண்டும்., என்று விஜய் கூறி உள்ளாராம். முந்தைய காலங்களைப் போல அரசியல் காரணங்களுக்காக மத்திய அரசுடன் தொடர் மோதல் போக்கைக் கடைப்பிடிப்பது மாநில நலன்களுக்குப் பின்னடைவை ஏற்படுத்தும் என்பதால், கொள்கை அளவிலான முரண்களைத் தவிர்த்து, நிர்வாக ரீதியில் டெல்லியுடன் சுமுகப் பாதையைத் தேர்ந்தெடுப்பதே தற்போதைய ஆட்சியின் வியூகமாக அமைந்துள்ளது. முதலமைச்சர் விஜயின் இந்த வியூகம் தமிழக அரசியலில் ஒரு புதிய அணுகுமுறையை உருவாக்கியுள்ளது.சட்டப்பேரவையில் அரங்கேறிய திடீர் திருப்பம்
அமைச்சர்களுக்குப் பறந்த நோ அட்டாக்