ஐசியூவில் தயாளு அம்மாள்.. நேற்று மாலை என்ன நடந்தது? எப்படி இருக்கிறார்?

வயது முதிர்வு காரணமாக தயாளு அம்மாள் உடல் உபாதைகளால் பாதிக்கப்பட்டு வருகிறார். அவ்வப்போது அவருக்கு வீட்டில் மருத்துவ பரிசோதனை மேற்கொள்ளப்பட்டு மருந்து, மாத்திரைகள் வழங்கப்பட்டு வருகிறது.

இந்நிலையில் தான் நேற்று தயாளு அம்மாளுக்கு திடீர் உடல்நலக்குறைவு ஏற்பட்டது. இதையடுத்து அவர் சென்னை கிரீம்ஸ் சாலையில் உள்ள அப்போலோ மருத்துவமனையில் அனுமதிக்கப்பட்டார். ஐசியூவில் தயாளு அம்மாள் உள்ளார். அங்கு அவருக்கு டாக்டர்கள் தீவிர சிகிச்சை அளிக்கப்பட்டு வருகிறது. இதுபற்றி அறிந்தவுடன் திமுக தலைவர் முக ஸ்டாலின், சட்டசபை எதிர்க்கட்சி தலைவர் உதயநிதி ஸ்டாலின் மற்றும் குடும்பத்தினர் சென்று தயாளு அம்மாளுக்கு அளிக்கப்படும் சிகிச்சை பற்றி டாக்டர்களிடம் கேட்டறிந்தனர்.

தயாளு அம்மாளுக்கு என்ன பிரச்சனை? அவரது உடல்நலம் எப்படி உள்ளது? என்பது பற்றி இன்னும் மருத்துவமனை நிர்வாகம் விளக்கம் அளிக்கவில்லை. இதற்கிடையே தான் அவரது உடல்நல பிரச்சனை பற்றிய முக்கிய தகவல் வெளியாகி உள்ளது. அதாவது தயாளு அம்மாளுக்கு நேற்று காய்ச்சல் ஏற்பட்டுள்ளது. காலை முதல் காய்ச்சல் இருந்துள்ளது. இதனால் அவர் சோர்வாக இருந்துள்ளார்.

ஆனால் நேற்று மாலையில் காய்ச்சல் பாதிப்பு அதிகரித்துள்ளது. அடுத்த சில மணிநேரங்களில் அவர் மூச்சு விட முடியாமல் சிரமப்பட்டுள்ளார். இதனால் குடும்பத்தினர் தயாளு அம்மாளை அப்போலோ மருத்துவமனையில் அனுமதித்தனர். அங்கு அவருக்கு டாக்டர்கள் தீவிர சிகிச்சை அளித்து வருகின்றனர். தற்போது தயாளு அம்மாள் ஐசியூவில் இருந்தாலும் கூட டாக்டர்கள் கண்காணிப்புில் அவர் நலமாக உள்ளாராம். இதனால் தான் நேற்று மருத்துவமனை வந்த முன்னாள் முதல்வர் முக ஸ்டாலின், எதிர்க்கட்சி தலைவர் உதயநிதி ஸ்டாலின் ஆகியோர் அங்கிருந்து வீடு திரும்பியதாக தகவல்கள் வெளியாகி உள்ளது.

இதற்கிடையே தான் தயாளு அம்மாள் உடல்நலம் எப்படி உள்ளது? அவருக்கு ஏற்பட்ட பிரச்சனை என்ன? என்னென்ன சிகிச்சை அளிக்கப்பட்டது? என்பது பற்றி அப்போலோ மருத்துவமனை இன்று விளக்கம் அளிக்க வாய்ப்புள்ளது என்ற தகவல்கள் பரவி வருகிறது.