தாராபுரத்தில் நிலவரம் ரொம்ப கலவரம்! தவெகவுக்கு கடும் சவால்! சத்யபாமாவுக்கு எகிறிய பிரஷர்! கள நிலவரம்

கட்சி மாறி வந்தவருக்கு முக்கியத்துவம் கொடுக்கப்பட்டது, உள்ளூர் தொண்டர்களுக்கும் மக்களுக்கும் இடையே இருந்த இடைவெளி போன்ற காரணங்கள் கிராமப்புற மக்களிடையே சலிப்பை ஏற்படுத்தியுள்ளதாகக் கூறப்படுகிறது. நகர்ப்புற வாக்காளர்கள் ஒருபுறம் இருந்தாலும், ஒரு தொகுதியின் தேர்தல் வெற்றியைத் தீர்மானிப்பதில் கிராமப்புற மக்களின் வாக்குகளே மிக முக்கியப் பங்கு வகிக்கின்றன. அந்த வகையில், தவெகவின் அஸ்திவாரமாக அமைய வேண்டிய ஊரகப் பகுதிகளிலேயே வேட்பாளருக்கு எதிர்ப்பு கிளம்பியிருப்பது தலைமைக்கு அதிர்ச்சியை ஏற்படுத்தியுள்ளது.

கூட்டத்திற்கு பணம் கொடுத்து ஆட்கள் திரட்டலா? வெடிக்கும் சலசலப்பு

முதல்வர் விஜய் பிரச்சாரத்திற்கு வரும் இடங்களில் பெரிய அளவில் இளைஞர் கூட்டம் கூடுவது வழக்கமான ஒன்றாக பார்க்கப்பட்டாலும், தாராபுரத்தில் நடந்த பொதுக்கூட்டங்கள் குறித்து உள்ளூர் அளவில் சில சலசலப்புகள் எழுந்துள்ளன.

பக்கத்து மாவட்டங்களில் இருந்து வேன்கள் மற்றும் பேருந்துகள் மூலம் ஆட்கள் அழைத்து வரப்பட்டதாக உள்ளூர் தகவல்கள் தெரிவிக்கின்றன. ஒரு நபருக்கு ₹200 முதல் ₹500 வரை வழங்கி கூட்டத்திற்காக அழைத்து வரப்பட்டனர் என்ற பேச்சுகளும் தொகுதி வட்டாரத்தில் பரவலாக அடிபடுகின்றன. பொதுக்கூட்டங்களில் தென்படும் ஆரவாரமும் கைதட்டல்களும் உண்மையில் வாக்குகளாக மாறுமா, அல்லது அது வெறும் செயற்கையான திரட்டலா என்ற சந்தேகம் அரசியல் நோக்கர்களிடையே எழுந்துள்ளது. உண்மையான உள்ளூர் வாக்காளர்கள் மத்தியில் இந்த திரட்டல் அணுகுமுறை எடுபடவில்லை என்ற கருத்துகளும் வலுத்து வருகின்றன.

சுதாரித்துக் கொண்டு சுழன்றடிக்கும் திமுக - அதிமுக

தவெகவின் இந்தத் தடுமாற்றத்தை நன்கு உணர்ந்து கொண்ட பிரதான எதிர்க்கட்சிகளான திமுக மற்றும் அதிமுக, தாராபுரத்தில் தங்களின் பிரச்சார வேகத்தை இரட்டிப்பாக்கியுள்ளன.

கிராமங்கள் தோறும் வீதி வீதியாக இறங்கி, உள்ளூர் பிரச்னைகளை முன்னிறுத்தி இரு கட்சிகளும் தீவிர பிரச்சாரத்தை முன்னெடுத்து வருகின்றன. தவெகவின் வேட்பாளர் தேர்வு மற்றும் கள எதார்த்தத்தை சுட்டிக்காட்டி, எதிர்க்கட்சிகள் நேரடியாக மக்களை அணுகி வருவது களத்தில் கூடுதல் அழுத்தத்தை உருவாக்கியுள்ளது. இதனால், எளிதாக முடிந்துவிடும் என்று கணக்கு போட்ட தவெகவுக்கு, திமுக மற்றும் அதிமுகவின் அதிரடி வியூகம் எதிர்பாராத கடுமையான சவாலாக உருவெடுத்துள்ளது.

கணிக்க முடியாத களமும் விஜய்யின் அடுத்த ரோட்ஷோவும்

இந்த கடுமையான சவாலை முறியடிக்க, தவெக தலைமை மீண்டும் முதலமைச்சர் விஜய்யின் செல்வாக்கையே முழுமையாக நம்பியுள்ளது. விரைவில் தாராபுரம் ஊரகப் பகுதிகளை மையப்படுத்தி நடைபெறவிருக்கும் விஜய்யின் இரண்டாவது ரோட்ஷோ மீதுதான் தற்போது ஒட்டுமொத்த தவெக கூடாரத்தின் பார்வையும் பதிந்துள்ளது.

கிராமப்புறங்களில் நிலவும் அதிருப்தியை முதல்வர் விஜய்யின் நேரடி வருகை மாற்றுமா? அல்லது வேட்பாளர் மீதான உள்ளூர் அதிருப்தி வாக்குப் பதிவில் எதிரொலிக்குமா? என்பதுதான் தற்போதைய முக்கிய விவாதம். தாராபுரம் தொகுதியின் களம் இதுவரை இல்லாத அளவிற்கு முற்றிலும் கணிக்க முடியாத புதிராக மாறியுள்ளது.