மாட்டிக்கிட்டாங்களே.. ஜெம் கிரானைட்ஸ் வீரமணியிடம் நிதி வாங்கிய தவெக.. பாயிண்டை பிடித்த திமுக!

ஜெம் கிரானைட்ஸ் வீரமணி பின்னணி என்ன?

சென்னையைச் சேர்ந்த 84 வயதான ஆர். வீரமணி, இந்தியாவில் உள்ள முன்னணி கிரானைட் ஏற்றுமதி நிறுவனங்களில் ஒன்றான 'ஜெம் கிரானைட்ஸ்' நிறுவனத்தின் நிறுவனர் ஆவார். பல தொழில்களை நடத்தி வந்த இவர், வர்த்தக ரீதியாக மிகவும் செல்வாக்கு மிக்கவராக இருந்து வந்தார்.

ஆனால், கடந்த சில வாரங்களுக்கு முன்பு இவர் மீது பதிவான ஒரு போக்சோ வழக்கு ஒட்டுமொத்த தமிழகத்தையும் உலுக்கியது.

புகாரும் கைது நடவடிக்கையும்: கடந்த 2025-ஆம் ஆண்டு, சிறுமி ஒருவர் பாலியல் தொல்லைக்கு ஆளாக்கப்பட்ட வீடியோ ஆதாரம் காவல்துறையிடம் ஒப்படைக்கப்பட்டது.

நீதிமன்ற உத்தரவு: முதலில் போதிய ஆதாரங்கள் இல்லை என இந்த வழக்கை முடிக்க காவல்துறை முயன்றது. ஆனால், போக்சோ சிறப்பு நீதிமன்றம் அதனை ஏற்க மறுத்து, வழக்கை மீண்டும் விசாரிக்கக் கடுமையான உத்தரவிட்டது.

கைது: இதனைத் தொடர்ந்து நடந்த தீவிர விசாரணையில், வீடியோவில் இருப்பது வீரமணிதான் என்பது உறுதி செய்யப்பட்டு, அவர் போக்சோ மற்றும் வன்கொடுமை தடுப்புச் சட்டத்தின் கீழ் கைது செய்யப்பட்டு சிறையில் அடைக்கப்பட்டார். தற்போது 8க்கும் மேற்பட்ட சிறுமிகள் இவர் மீது புகார் அளித்துள்ளனர்.

ஆர்.எஸ். பாரதி முன்வைக்கும் குற்றச்சாட்டு என்ன?

சென்னையில் செய்தியாளர்களைச் சந்தித்த திமுக மூத்த தலைவர் ஆர்.எஸ். பாரதி, தவெக மற்றும் அக்கட்சியின் தலைமை மீது அடுக்கடுக்கான குற்றச்சாட்டுகளை முன்வைத்தார்.

தேர்தல் நிதி சர்ச்சை

"தமிழக வெற்றிக் கழகம் தனது கட்சி செயல்பாடுகளுக்கும், மாநாடுகளுக்கும், தேர்தல் பணிகளுக்கும் பல கோடி ரூபாயை செலவு செய்து வருகிறது. இந்த நிதியின் பெரும்பகுதி எங்கிருந்து வருகிறது? சிறுமிகளை சீரழித்த வழக்கில் சிக்கியுள்ள ஜெம் கிரானைட்ஸ் வீரமணியிடம் இருந்து தவெக கட்சிக்கு பெரிய அளவில் நிதி கைமாறியுள்ளது. இது சாதாரண விஷயம் அல்ல" என்று குற்றம்சாட்டினார்.

"புதிய அரசியல், மாற்றத்திற்கான அரசியல் என்று மேடைகளில் அழகாகப் பேசினால் மட்டும் போதாது. கட்சிக்கு வரும் நன்கொடைகள் மற்றும் தேர்தல் நிதிகளின் உண்மைத் தன்மையை பொதுமக்களிடம் வெளிப்படையாக வைக்க வேண்டும். வீரமணியிடம் இருந்து நிதி வாங்கினீர்களா, இல்லையா என்பதை தவெக தலைமை நேரடியாக தெளிவுபடுத்த வேண்டும்" என்று அவர் சவால் விடுத்தார்.

"பெண்களின் பாதுகாப்பு, குழந்தைகள் பாதுகாப்பு பற்றி பேசும் தவெக, இதுபோன்ற கொடூர வழக்கில் சிறைக்குச் சென்ற ஒரு தொழிலதிபரிடம் இருந்து நன்கொடை பெறுவது அரசியல் நேர்மையா?" என்று ஆர்.எஸ். பாரதி காட்டமாகக் கேள்வி எழுப்பினார்.

தவெக தரப்பு சொல்வது என்ன?

திமுகவின் இந்த அதிரடி குற்றச்சாட்டுக்கு தவெக தரப்பில் இருந்து உடனடி மறுப்பு தெரிவிக்கப்பட்டு வருகிறது. தவெக நிர்வாகிகள் இது குறித்து பேசுகையில், தங்கள் கட்சியின் வளர்ச்சி மற்றும் மக்கள் ஆதரவைப் பொறுத்துக் கொள்ள முடியாமல் திமுக திட்டமிட்டு அவதூறு பரப்பி வருவதாகக் கூறியுள்ளனர். கட்சிக்கு வரும் அனைத்து நிதிகளும் சட்டப்படியான வழிகளிலேயே பெறப்படுகின்றன என்றும், எந்தவொரு சட்டவிரோத பணம் அல்லது குற்றப் பின்னணி கொண்டவர்களிடம் இருந்து தேர்தல் நிதி பெறப்படவில்லை என்றும் விளக்கமளித்துள்ளனர்.

இடைத்தேர்தல் நெருங்கும் நேரத்தில் மக்களின் கவனத்தை திசைதிருப்பவே இதுபோன்ற ஆதாரமற்ற குற்றச்சாட்டுகள் கிளப்பப்படுவதாக தவெக ஆதரவாளர்கள் சமூக வலைதளங்களில் பதிலடி கொடுத்து வருகின்றனர்.