தாராபுரத்தில் தவெகவுக்கு காத்திருக்கும் ஆப்பு.. வெற்றி யாருக்கு? தேர்தலுக்கு பிந்தைய கருத்துக்கணிப்பு

திமுக வெற்றி பெற வாய்ப்பு

மாலைமலர் நாளிதழ் தேர்தலுக்கு பிந்தைய கருத்து கணிப்பு முடிவுகளை வெளியிட்டுள்ளது. அதன் அடிப்படையில், தாராபுரத்தில் திமுகவுக்கும் - தவெகவுக்கும் இடையே கடும் போட்டி நிலவும் என்று தெரியவந்துள்ளது. கருத்துக்கணிப்பு முடிவின் படி, தவெகவை திமுக முந்தி வெற்றி பெறும் என்று தெரிவிக்கப்பட்டுள்ளது.

அதிமுக மூன்றாம் இடத்திற்கு தள்ளப்படுமெனவும் கருத்துக்கணிப்பில் தெரிவிக்கப்பட்டுள்ளது. இந்த கருத்து கணிப்புப்படி பார்த்தால் தவெகவுக்கு தேர்தல் முடிவில் பெரும் அதிர்ச்சி காத்திருக்கிறது என்றே சொல்லலாம்.

மதுராந்தகத்தில் எப்படி?

மதுராந்தகம் தொகுதியை பொறுத்தவரை தவெக வேட்பாளர் வெற்றி பெறுவார் எனவும் இரண்டாவது இடத்தை பிடிப்பதில் திமுகவிற்கும் அதிமுகவிற்கும் இடையே கடும் போட்டி நிலவும் என்றும் கணிக்கப்பட்டுள்ளது. இரண்டு தொகுதிகளில் பதிவான வாக்குகள் வரும் 9 ஆம் தேதி எண்ணப்படுகின்றன.

மதுராந்தகம் தொகுதியில் நேற்று வாக்குப்பதிவு முடிந்த நிலையில் மொத்தம் 86.26 சதவீத வாக்குகள் பதிவானது. கடந்த 2026 சட்டசபை பொதுத்தேர்தலில் இந்த தொகுதியில் 93.36 சதவீத வாக்குகள் பதிவானது. தற்போது இடைத்தேர்தலில் பொதுத்தேர்தலை விட 7.1 சதவீத வாக்குகள் குறைவாக பதிவாகி இருக்கிறது.

5 முனை போட்டி

தாரபுரம் தொகுதியில் தவெக, திமுக, அதிமுக, நாம் தமிழர், கம்யூனிஸ்ட் கட்சி என ஐந்து முனை போட்டி நிலவியது. தவெக சார்பில் கடந்த முறை அதிமுகவில் போட்டியிட்டு வென்றுவிட்டு பின்னர் ராஜினாமா செய்த சத்யபமாவே மீண்டும் நிறுத்தப்பட்டார். அதிமுக சார்பாக கே. பானுமதி என்பவரும், திமுக சார்பாக எஸ். சுகன்யா என்பவரும், இந்திய கம்யூனிஸ்ட் கட்சி சார்பில் லட்சுமணன் என்பவரும், நாம் தமிழர் கட்சி சார்பில் கார்த்திகாவும் நிறுத்தப்பட்டனர்.

மின்வெட்டு, சட்டம் ஒழுங்கு பிரச்சினை

இளைஞர்களின் பெரும் ஆதரவுடன், பெருத்த எதிர்பார்ப்புடன் ஆட்சியில் அமர்ந்த தவெக, மக்களின் எதிர்பார்ப்பை நிறைவேற்றவில்லை என்ற குற்றச்சாட்டு அரசியல் கட்சிகளால் தொடர்ந்து முன்வைக்கப்பட்டு வருகிறது. அதேபோல, தவெக ஆட்சிக்கு வந்த பிறகு எங்கு பார்த்தாலும் மின்வெட்டு பிரச்சினை, சட்டம் ஒழுங்கு சீர்கெட்டு உள்ளது என தவெக அரசு மீது தொடர் குற்றச்சாட்டுகளை எதிர்க்கட்சிகள் முன்வைத்தன.

இன்னொரு பக்கம், அதிமுக எம்.எல்.ஏக்களை விலைக்கு வாங்கி வலுக்கட்டாயமாக இந்த தேர்தலை திணித்து இருப்பதாக குற்றச்சாட்டு எழுந்தது. இதையெல்லாம் தாண்டி த்வெக வெல்லுமா? அல்லது அதிமுக, திமுக ஆகியவற்றில் ஏதேனும் வெல்லுமா என்ற எதிர்பார்ப்பு நிலவி வரக்கூடிய நிலையில், தவெகவை திமுக முந்தி வெற்றி பெறும் என்று தெரிவிக்கப்பட்டுள்ளது.