சென்னை: 2026 தமிழக சட்டமன்றத் தேர்தலில் எதிர்பாராத பின்னடைவைச் சந்தித்த திராவிட முன்னேற்றக் கழகம் (திமுக) அடிமட்ட அமைப்பு முழுவதும் பெரும் மறுசீரமைப்புக்கு உள்ளாகியுள்ளது. கட்சித் தலைவர் மு.க.ஸ்டாலின் தலைமையில், தேர்தல் தோல்வியின் காரணங்களை ஆழமாக ஆராய்ந்து, உட்கட்டமைப்பில் மிகப்பெரிய அறுவை சிகிச்சைக்கு தயாராகி வருவதாக அறிவாலய வட்டாரங்கள் தெரிவிக்கின்றன.
தேர்தல் முடிவுகளுக்குப் பிறகு, கட்சியின் உள் புலனாய்வு அறிக்கைகள் மற்றும் உளவுத்துறை தகவல்கள் ஸ்டாலினுக்கு சமர்ப்பிக்கப்பட்டன. பல மாவட்டங்களில் உள்ளூர் தலைமைகளின் அலட்சியம், தொண்டர்களை ஒருங்கிணைக்கத் தவறியது, புதிய அரசியல் சக்திகளின் எழுச்சியை மதிப்பிடத் தவறியது, உட்கட்சி பூசல்கள் ஆகியவை தோல்விக்கு முக்கிய காரணமாகச் சுட்டிக்காட்டப்பட்டுள்ளன.
இதன் விளைவாக, சுமார் 30 முதல் 35 மாவட்ட செயலாளர்களை அதிரடியாக மாற்ற திமுக தலைமை திட்டமிட்டுள்ளது. மூத்த தலைவர்கள், செல்வாக்கு மிக்கவர்கள் என எந்த பாகுபாடும் இன்றி, தேர்தல் பணிகளில் சுணக்கம் காட்டிய அனைவரையும் மாற்றி, இளம், துடிப்பான தலைவர்களுக்கு மாவட்டப் பொறுப்புகளை வழங்க ஸ்டாலின் முடிவு செய்துள்ளார். தென் மாவட்டங்கள் மற்றும் கொங்கு மண்டலத்தில் கட்சிக்கு ஏற்பட்ட பலவீனங்களை சரிசெய்ய தனி குழுக்கள் அமைக்கப்பட உள்ளன. இந்த மாற்றங்கள் வெறும் கண்துடைப்பு அல்ல; அடுத்த நாடாளுமன்றத் தேர்தல் மற்றும் உள்ளாட்சித் தேர்தல்களை வெற்றிகரமாக எதிர்கொள்ளும் வகையில் முழுமையான 'மெகா ரீவாம்ப்' (Revamp) திட்டத்தின் பகுதியாகும். இந்த அடிமட்ட மாற்றங்களுடன், கட்சியின் உச்சத் தலைமையிலும் முக்கிய அதிகாரப் பகிர்வு நிகழவிருப்பதாக தகவல்கள் வெளியாகியுள்ளன. நாடாளுமன்றக் குழுத் தலைவரும், மாநிலங்களவை உறுப்பினருமான கனிமொழி கருணாநிதிக்கு "செயல் தலைவர்" (Working President) போன்ற வலுவான பொறுப்பு வழங்க ஸ்டாலின் திட்டமிட்டுள்ளதாக அறிவாலய மூத்த நிர்வாகிகள் கூறுகின்றனர். உதயநிதி ஸ்டாலின் ஏற்கனவே இளைஞரணியின் முகமாக முன்னிறுத்தப்பட்டுள்ள நிலையில், கனிமொழியின் அரசியல் முதிர்ச்சி, டெல்லி அரசியல் அனுபவம் மற்றும் பெண்கள் மத்தியிலான செல்வாக்கைப் பயன்படுத்தி கட்சியை வலுப்படுத்த தலைமை விரும்புகிறது. ஸ்டாலின் தற்காலிகமாக பின்னணியில் இருந்து வழிகாட்ட, உதயநிதி - கனிமொழி இணைந்து கட்சியை "இரட்டைக்குழல்" முறையில் நடத்தும் வியூகம் வகுக்கப்பட்டு வருகிறது. "கலைஞர் காலத்து அரசியல் முறை இப்போது மாறிவிட்டது. புதிய தலைமுறை வாக்காளர்களை ஈர்க்க புதிய முகங்கள், புதிய அணுகுமுறைகள் தேவை" என அறிவாலய வட்டாரங்கள் வலியுறுத்துகின்றன. இந்த மாற்றங்கள் திமுகவை மீண்டும் வலுவான எதிர்க்கட்சியாக அல்லது எதிர்கால ஆளும் கட்சியாக மாற்றும் என எதிர்பார்க்கப்படுகிறது. இந்த அதிரடி முடிவுகள் விரைவில் கூட்டப்படவிருக்கும் திமுக செயற்குழு அல்லது பொதுக்குழு கூட்டத்தில் அதிகாரப்பூர்வமாக அறிவிக்கப்படலாம். திமுகவின் இந்த மறுசீரமைப்பு தமிழக அரசியலில் புதிய திருப்பத்தை ஏற்படுத்துமா என்பதை காலம் தான் பதில் சொல்லும்.கனிமொழிக்கு 'செயல் தலைவர்' அந்தஸ்து?