சிக்கன் பிரியாணி வேண்டாம்.. வெஜ் மாணவர்கள் மனது புண்படும்.. திமுக டிகேஎஸ் இளங்கோவன் கருத்து

கார்த்தி சிதம்பரம்

இதற்கிடையே இந்த திட்டத்தை திமுக எதிர்ப்பதாக தனியார் செய்தி நிறுவனத்துக்கு கார்த்தி சிதம்பரம் அளித்த பேட்டியில் குறிப்பிட்டார். அதில் அவர், "வாரத்திற்கு ஒரு நாள் பள்ளி மாணவர்களுக்கு சிக்கன் பிரியாணி வழங்குவதை திமுக எதிர்ப்பது ஆச்சரியமாக இருக்கிறது. தேர்தலில் தோல்வியடைந்த அதிர்ச்சியில் இருந்து திமுக இன்னும் மீளவில்லை. எதிர்க்கட்சி என்ற மனநிலைக்கு அவர்கள் இன்னும் வரவில்லை. அதனால் ஏதாவது ஒரு காரணத்தைக் கூறி அரசை விமர்சிக்கிறார்கள்.

தமிழ்நாட்டில் 95 சதவீத மக்கள் அசைவம் சாப்பிடுகிறார்கள். இது நமது பாரம்பரிய உணவு பழக்கம். குழந்தைகளுக்கு கார்போஹைட்ரேட் மட்டும் கொடுத்தால் போதாது. அவர்களுக்கு புரதச்சத்து அதிகம் தேவை. குறிப்பாக விளையாட்டில் ஈடுபடும் குழந்தைகளுக்கு புரதம் மிகவும் அவசியம். எனவே பள்ளி மதிய உணவில் சிக்கன் வழங்கும் முடிவை நான் வரவேற்கிறேன்.

சிக்கன்

இந்த திட்டத்தால் சைவம் மட்டும் குழந்தைகள் சிக்கன் சாப்பிட நேருமே என்று திமுக கேட்பது எல்லாம் குழப்பமும் ஒரு வாதம். ஒருவர் சாப்பிடுவதால் மற்றொருவர் பாதிக்கப்பட மாட்டார். குழந்தைகளின் ஊட்டச்சத்தே முக்கியம். சில மாநிலங்களில் குழந்தைகளுக்கு முட்டை கூட வழங்க மறுக்கும் சூழலில், தமிழ்நாடு அரசு சிக்கன் வழங்க முன்வந்திருப்பது வரவேற்கத்தக்கது" என்று கூறினார்.

திமுக

இந்த வீடியோவை ரீட்வீட் செய்த திமுக செய்தி தொடர்பாளர் சரவணன் அண்ணாதுரை, "திமுக எப்போது இந்தத் திட்டத்தை எதிர்த்தது? உண்மையை சரிபார்க்காமல் இப்படிப் பேசுவது ஏன்? எம்பியாக இருந்துவிட்டு இதுபோல பேசலாமா? இந்தளவுக்கு வேலை இல்லாமலா இருக்கிறீர்கள் கார்த்தி பி. சிதம்பரம்?" என்று கேள்வி எழுப்பினார்.

பதிலடி

இதற்கு பதிலடி கொடுக்கும் வகையில் திமுக அமைப்புச் செயலாளர் டி.கே.எஸ். இளங்கோவன் அளித்த பேட்டியை கார்த்தி சிதம்பரம் பகிர்ந்துள்ளார். அந்த வீடியோவில் மதிய உணவுத் திட்டத்தில் சிக்கன் வழங்குவது குறித்த கேள்விக்கு பதிலளித்த டி.கே.எஸ். இளங்கோவன், "பல குடும்பங்களில் சைவ உணவுப் பழக்கம் உள்ளது. சில குடும்பங்களில் அசைவ உணவுப் பழக்கம் உள்ளது. பள்ளிக்கு வரும் குழந்தைகள் நண்பர்கள் சாப்பிடுவதை பார்த்து தாங்களும் சாப்பிடலாம். இது பெற்றோருக்கு தான் கவலையை ஏற்படுத்தும்

இதுபோன்ற விஷயங்களில் சைவ உணவையே வழங்குவது நல்லது. அது குடும்பங்களின் உணவு பழக்கத்தில் எந்த பாதிப்பையும் ஏற்படுத்தாது. குழந்தைகளுக்கு என்ன சாப்பிட வேண்டும், என்ன சாப்பிட கூடாது என்பது தெரியாது. எனவே சிக்கன் வழங்குவது அவசியமில்லை" என்று கூறியிருந்தார். இந்த வீடியோவை தான் சரவணனுக்கு பதிலடியாக கார்த்தி சிதம்பரம் தனது ட்விட்டரில் பகிர்ந்துள்ளார். இந்த வீடியோக்கள் சமூக வலைத்தளங்களில் விவாதத்தை கிளப்பி வருகிறது.