திமுகவின் திடீர் வியூகம்.. அதிர்ச்சியில் உறைந்த தவெக! வேட்பாளர்களை பார்த்ததும் திணறும் விஜய்?

திமுக புறக்கணிக்கும் என தப்புக் கணக்கு போட்ட தவெக

தேர்தல் தேதி அறிவிக்கப்படுவதற்கு முன்பு வரை, இந்த இடைத்தேர்தலை திமுக நிச்சயமாகப் புறக்கணிக்கும் என்றே தவெக தலைமை உறுதியாக நம்பியது. பொதுவாக இடைத்தேர்தல்கள் ஆளும் கட்சிக்கு சாதகமாகவே அமையும் என்பதால், எதிர்க்கட்சியான திமுக தேவையின்றி இந்தத் தேர்தலில் போட்டியிட்டு பின்னடைவைச் சந்திக்க விரும்பாது என்று பனையூர் வட்டாரங்கள் கணக்குப் போட்டன.

மேலும், தொடக்கத்தில் திமுக தலைவர் மு.க. ஸ்டாலின் தேர்தல் குறித்து பெரிய அளவில் ஆர்வம் காட்டாமல் அமைதி காத்ததும் தவெகவின் இந்த எண்ணத்தை மேலும் வலுப்படுத்தியது. திமுக ஒதுங்கிவிட்டால், தேர்தல் களம் முழுக்க முழுக்க தவெகவிற்கும் அதிமுகவிற்கும் இடையிலான நேரடிப் போட்டியாக மாறிவிடும்; ஆளுங்கட்சி என்ற செல்வாக்கைப் பயன்படுத்தி மிக எளிதாக இரண்டு தொகுதிகளையும் கைப்பற்றிவிடலாம் என்பதே தவெக தலைவர்களின் முதற்கட்ட திட்டமாக இருந்தது.

உதயநிதியின் என்ட்ரி... தவெக போட்ட திட்டங்கள் தவிடுபொடி

ஆனால், தவெகவின் கணக்குகளை உதயநிதி ஸ்டாலின் ஒற்றை முடிவில் தலைகீழாக மாற்றிப் போட்டுவிட்டார். திமுக தேர்தல் களத்தை விட்டு ஓடாது என்று உறுதியாக நின்ற உதயநிதி, தானே முன்னின்று தொகுதி முழுக்க தீவிரப் பிரச்சாரம் மேற்கொள்வதாக அறிவித்தார். அதோடு நிற்காமல், மதுராந்தகத்தில் முன்னாள் எம்.எல்.ஏ. ஐ. பரந்தாமனையும், தாராபுரத்தில் களப்பணியாளர் எஸ். சுகன்யாவையும் வேட்பாளர்களாக உடனடியாக அறிவிக்க வைத்தார்.

திமுக போட்டியில் இறங்காது என நிம்மதியாக இருந்த தவெக தலைமைக்கு, அறிவிக்கப்பட்ட வேட்பாளர்களின் பலமும், உதயநிதி நேரடியாகக் களமிறங்கும் முடிவும் மிகப்பெரிய அதிர்ச்சியை ஏற்படுத்தியது. இதன் மூலம் தேர்தல் களம் பலமான மும்முனைப் போட்டியாக மாறி, தவெகவின் வெற்றி வாய்ப்புக்கு கடுமையான சவாலை உருவாக்கியுள்ளது.

வேட்பாளர் தேர்வில் தவெகவுக்கு ஏற்பட்டுள்ள சிக்கல் என்ன?

திமுகவின் இந்த அதிரடி களம் இறங்கலால், தவெக இப்போது வேட்பாளர்களை முடிவு செய்ய முடியாமல் திணறி வருகிறது. பனையூர் தலைமை அலுவலகத்தில் கடந்த இரண்டு நாட்களாக நடக்கும் ஆலோசனைகளில் இரண்டு முக்கிய சிக்கல்கள் பூதாகரமாக எழுந்துள்ளன:

மாஜி அதிமுக எம்.எல்.ஏ.க்களுக்கு சீட் தருவதா?

அதிமுகவில் இருந்து விலகி, தங்கள் பதவியை ராஜினாமா செய்துவிட்டு தவெகவில் இணைந்த மரகதம் குமரவேல் (மதுராந்தகம்) மற்றும் சத்யபாமா (தாராபுரம்) ஆகியோருக்கே மீண்டும் சீட் தர வேண்டும் என்பது ஒரு தரப்பின் வாதம். ஆனால், கட்சிக்கு வந்த உடனேயே அவர்களுக்கு மீண்டும் சீட் கொடுத்தால், "அதிமுகவினருக்கு அடைக்கலம் தரும் கட்சியா தவெக?" என்ற எதிர்க்கட்சிகளின் விமர்சனத்திற்கு ஆளாக நேரிடும் என்ற தயக்கம் தலைமைக்கு உள்ளது.

கட்சியின் பழைய விசுவாசிகளின் அதிருப்தி

கடந்த சட்டமன்றத் தேர்தலில் மதுராந்தகத்தில் தவெக சார்பில் நின்று 62,000-க்கும் அதிகமான வாக்குகளைப் பெற்ற எழில் கேத்தரின் போன்ற கட்சியின் பழைய முகங்களும், நிர்வாகிகளும் இந்த முடிவை எப்படி எடுத்துக்கொள்வார்கள் என்ற பயம் எழுந்துள்ளது. வெளியிலிருந்து வந்தவர்களுக்கு உடனே சீட் கொடுத்தால், ஆரம்பம் முதல் உழைத்த உள்ளூர் தவெக தொண்டர்கள் தேர்தல் பணிகளில் சுணக்கம் காட்டக்கூடும் என்ற அச்சம் நிலவுகிறது.

எதிர்கொள்ள வேண்டிய வாக்கு வங்கி கணக்கு

தாராபுரத்தில் அதிமுக மற்றும் திமுக என இரு கட்சிகளுக்குமே பலமான பாரம்பரிய வாக்கு வங்கி உள்ளது. மதுராந்தகத்திலும் திமுக வலுவான சட்ட வல்லுநரை முன்னிறுத்தி ஆளுங்கட்சியின் தவறுகளைத் தோலுரிக்கும் பிரச்சாரத்தைத் தொடங்கியுள்ளது. இந்நிலையில், வெறும் சினிமா கவர்ச்சியை மட்டும் நம்பி பலவீனமான வேட்பாளரை இறக்கினால் அது தவெக ஆட்சிக்கு ஆரம்பத்திலேயே பெரிய பின்னடைவாக முடிந்துவிடும் என்று கட்சியின் சீனியர்கள் விஜயிடம் எச்சரித்துள்ளனர்.

திமுக தங்களை நோக்கி வீசியுள்ள இந்த அரசியல் சவாலை எதிர்கொள்ள, பழைய முகங்களா அல்லது தவெகவின் சொந்தக் கட்சி விசுவாசிகளா என்ற இடியாப்பச் சிக்கலில் தவெக தலைமை தீவிர ஆலோசனையில் மூழ்கியுள்ளது.