சென்னை: ஞாயிற்றுக்கிழமை வந்துவிட்டாலே பெரும்பாலான வீடுகளில் சிக்கன் சமையல் அவசியமாகி விட்டது.. எனினும் பிராய்லர் கோழிகள் மற்றும் முட்டைகள் குறித்து பொதுமக்கள் மத்தியில் பல்வேறு அச்சங்களும், சந்தேகங்களும் தொடர்ந்து சோஷியல் மீடியாவில் பரப்பப்பட்டு வருகின்றன. பிராயிலர் கோழி சாப்பிடுவது உண்மையிலேயே ஆபத்தானதா, இதற்குப் பின்னால் இருக்கும் மருத்துவ மற்றும் அறிவியல் பூர்வமான உண்மைகள் என்ன என்பது குறித்து இந்திய உணவு பாதுகாப்பு மற்றும் தர நிர்ணய ஆணையம் (FSSAI) மற்றும் மருத்துவ வல்லுநர்கள் சொல்வது என்ன? இங்கே சுருக்கமாக பார்ப்போம்.
பிராய்லர் கோழிகள் வெறும் 40 நாட்களில் 2 கிலோவிற்கும் அதிகமாக வளர்வதற்கு ஹார்மோன் ஊசிகளும் ஸ்டெராய்டுகளும்தான் காரணம் என்ற நம்பிக்கை பரவலாக உள்ளது. ஆனால் இதற்கு அறிவியல் ஆதாரங்கள் இல்லை என நிபுணர்கள் கூறுகின்றனர்.
கோழிகளுக்கு ஹார்மோன் கொடுப்பது இந்திய உணவுப் பாதுகாப்பு விதிகளின்படி முற்றிலும் தடை செய்யப்பட்டுள்ளது. மேலும் ஹார்மோன்கள் என்பவை புரோட்டீன்களால் ஆனவை என்பதால் அவற்றை தீவனத்தில் கலந்தால் கோழியின் செரிமான மண்டலம் அதை மொத்தமாக சிதைத்துவிடும், அது வேலை செய்யாது. அதுமட்டுமல்ல, மனிதர்களைப் போல லட்சக்கணக்கான கோழிகளுக்கு தனித்தனியாகத் தினமும் ஊசி போடுவது பொருளாதார ரீதியாக சாத்தியமே இல்லாத ஒன்று. பிராயிலர் கோழிகளின் அதிவேக வளர்ச்சிக்கு மரபணு தேர்வு எனப்படும் சிறந்த கோழி ரகங்களை இனப்பெருக்கம் செய்யும் நவீன முறையும், அவற்றுக்கு வழங்கப்படும் துல்லியமான ஊட்டச்சத்து தீவனங்களுமே காரணமாகும். பிராயிலர் கோழி சாப்பிடுவதால் சிறுமிகள் மிகக் குறைந்த வயதிலேயே பருவமடைகிறார்கள் என்பார்கள். ஆனால், இதற்கு எந்தவொரு நேரடி மருத்துவ ஆதாரமும் இல்லை. மருத்துவ ஆய்வுகளின்படி, குழந்தைகள் சீக்கிரம் பருவமடைவதற்கு உடல் பருமன், மரபியல் மற்றும் வாழ்க்கை முறை காரணிகள் முக்கிய பங்கு வகிக்கின்றன. உடற்பயிற்சியின்மை மற்றும் துரித உணவுகளால் குழந்தைகளின் உடலில் கொழுப்பு கூடும் போது, அது ஹார்மோன் சமநிலையை குலைத்துவிடுகிறது.. பிராயிலர் சிக்கனை எண்ணெயில் பொரித்து அதாவது சிக்கன் 65 அடிக்கடி சாப்பிடும் போது, அது மறைமுகமாக உடல் பருமனை ஏற்படுத்தலாமே தவிர, கோழியில் ஹார்மோன் இருப்பதனால் இந்த பாதிப்பு ஏற்படுவதில்லையாம். பிராயிலர் கோழி வளர்ப்பில் இருக்கும் உண்மையான மருத்துவப் பிரச்சனை என்னவென்றால், கோழிகளுக்கு கொடுக்கப்படும் ஆன்டிபயாடிக் எனப்படும் கிருமிநாசினி மருந்துகள்தான். சில பண்ணைகளில் கோழிகளுக்கு நோய் வராமல் தடுக்கவும், சிகிச்சைக்காகவும் இந்த மருந்துகளைக் கொடுக்கிறார்கள். இதனால், அந்த கிருமிகள் மருந்துகளுக்கே பழகி விடுகின்றன. பிறகு அவை மனிதர்களுக்குப் பரவும் போது, நோய் வந்தால் பயன்படுத்தப்படும் சில ஆன்டிபயாடிக் மருந்துகள் எதிர்பார்த்த அளவுக்கு பலன் அளிக்காமல் போகலாம். இந்த பிரச்சனையே உலகளவில் AMR (Antimicrobial Resistance) என்ற பெயரில் பெரிய சுகாதாரக் கவலையாகக் கருதப்படுகிறது. அதனால்தான், இதை கட்டுப்படுத்த, கோழிகளை விற்பனைக்குக் கொண்டு வருவதற்கு முன்பாக ஆன்டிபயாடிக் பயன்பாட்டை நிறுத்த வேண்டும் என்ற நடைமுறைகளை உணவு பாதுகாப்பு அமைப்புகள் வலியுறுத்தி வருகின்றன நாட்டுக்கோழி முட்டையுடன் ஒப்பிடும்போது பிராயிலர் முட்டைகளில் ஊட்டச்சத்துக்கள் சற்றே மாறுபடுகின்றன. இயற்கை உணவுகளைத் தின்னும் நாட்டுக்கோழி முட்டையில் ஒமேகா-3 கொழுப்பு அமிலங்கள் மற்றும் வைட்டமின் A சற்றே அதிகமாக இருக்கும். இருந்தாலும் 2 முட்டைகளிலும் உள்ள புரதச்சத்து சமமானதே ஆகும். நாட்டுக்கோழி மற்றும் பிராயிலர் கோழிகளின் கொழுப்பு மற்றும் ஊட்டச்சத்து அளவுகள் வளர்ப்பு முறை மற்றும் தீவனத்தைப் பொறுத்து மாறுபடலாம். உடற்பயிற்சி செய்பவர்கள் மற்றும் உடல் எடையைக் கட்டுப்படுத்த விரும்புபவர்கள், தோல் நீக்கப்பட்ட கோழி இறைச்சியை அளவோடு சாப்பிடுவது நல்ல தேர்வாக கருதப்படுகிறது. சுருக்கமாக சொன்னால், பிராயிலர் கோழிகள் நச்சுத்தன்மை வாய்ந்தவை கிடையாது. ஆனால், அவற்றை எண்ணெயில் பொரித்து சாப்பிடுவதைத் தவிர்த்து, நன்றாக வேகவைத்து அளவோடு சாப்பிடுவதும், வாரம் ஒருமுறை நாட்டுக்கோழி, தினந்தோறும் காய்கறிகளை சம அளவில் சேர்த்துக் கொள்வதுமே ஒட்டுமொத்த உடல் ஆரோக்கியத்திற்குப் பாதுகாப்பானது என்கிறார்கள் நிபுணர்கள்.ஹார்மோன் ஊசி வதந்தி
சிறுமிகள் பருவமடைவதற்கும் பிராய்லர் கோழிக்கும் சம்பந்தம் உண்டா?
பிராய்லர் கோழி - ஆன்டிபயாடிக்குகள்
நாட்டுக்கோழி முட்டையில் அதிக சத்து?