சென்னை: அதிமுகவில் இருந்து முன்னாள் சபாநாயகர் தனபால் விலகுவதாக அறிவித்துள்ளார். ஏற்கெனவே முன்னாள் அமைச்சர் செம்மலை விலகியதை அடுத்து தற்போது தனபாலும் அதே முடிவை எடுத்துள்ளார்.
இதுகுறித்து தனபால் கூறியிருப்பதாவது: அதிமுகவில் எனக்கு முக்கியத்துவம் தரவில்லை. எல்லாரையும் புறக்கணித்தார்கள், இன்று அதிமுகவை மக்கள் புறக்கணித்துவிட்டார்கள்.
என் மகன் தவெகவில் இணைந்துவிட்டார், எனக்கு உடல்நிலை சரியில்லாததால் நான் வீட்டில் ஓய்வெடுத்து வருகிறேன். மனம் நொந்து அதிமுகவில் இருந்து விலகியிருக்கிறேன். நான் சைக்கிளில் பிரச்சாரம் செய்து வளர்த்த கட்சி இன்று பிளவுப்பட்டிருப்பதை பார்க்கும் போது எனக்கு வேதனையாக இருக்கிறது. இவ்வாறு தனபால் கூறியிருந்தார். தனபாலின் மகன் லோகேஷ் தமிழ்ச் செல்வன் அமைச்சராக இன்று பதவியேற்றார். இந்த விழாவுக்கு வந்த தனபால் செய்தியாளர்களை சந்தித்து இவ்வாறு தெரிவித்திருந்தார். தமிழக சட்டசபை தேர்தலில் அவிநாசி தொகுதி தனக்கு ஒதுக்கப்படும் என முன்னாள் சபாநாயகர் தனபால் எதிர்பார்த்து காத்திருந்தார். மேலும் அவருக்கு உடல்நிலை சரியில்லாததால் அவரது மகன் அந்த தொகுதிக்கு விருப்பமனு அளித்திருந்தார். ஆனால் அவருக்கு தொகுதி கிடைக்காது என்று தெரிந்ததும் அதிமுகவில் இருந்து விலகி தவெகவில் இணைந்தார். இந்த நிலையில் அவிநாசி தொகுதியை எடப்பாடி பழனிசாமி தனக்கு ஒதுக்குவார் என ஆவலுடன் இருந்தார். ஆனால் அந்த தொகுதி கூட்டணி கட்சியான பாஜகவுக்கு கொடுக்கப்பட்டது. கொங்குவில் வேறு தொகுதியாவது தனக்கு ஒதுக்கப்படும் என நம்பியிருந்தவருக்கு ஏமாற்றமே விஞ்சியது. இந்த மன வருத்தத்தை தனபாலே தனது ட்விட்டர் பக்கத்திலும் செய்தியாளர்கள் சந்திப்பிலும் தெரிவித்திருந்தார். இந்த நிலையில் தற்போது அதிமுகவில் இருந்து விலகுவதாக தனபால் அறிவித்துள்ளார். அவர் யார் என்பதை பார்க்கலாம். தமிழக அரசியலிலும், தமிழ் சினிமாவிலும் பெரும் அதிர்வலைகளை ஏற்படுத்திய ஒரு முக்கியமான ஆளுமைதான் முன்னாள் சபாநாயகர் ப. தனபால். இயக்குனர் மாரி செல்வராஜ் இயக்கத்தில், வடிவேலு மற்றும் உதயநிதி ஸ்டாலின் நடிப்பில் வெளியான 'மாமன்னன்' (2023) திரைப்படம் இவருடைய நிஜ வாழ்க்கை மற்றும் அரசியல் பயணத்தை ஓரளவுக்கு அடிப்படையாகக் கொண்டுதான் உருவாக்கப்பட்டது. அரசியல் பின்னணி: சேலம் மாவட்டம் கருப்பூரைச் சேர்ந்த ப. தனபால் (பிறப்பு: 1951), அதிமுகவின் மிக மூத்த மற்றும் தீவிர விசுவாசமான தலைவர்களில் ஒருவர். பட்டியல் இனத்தைச் சேர்ந்த (அருந்ததியர் சமூகம்) இவர், எம்.ஜி.ஆர் காலத்திலிருந்தே கட்சியில் பயணித்து வருகிறார். தேர்தல் வெற்றிகள்: சங்ககிரி, ராசிபுரம், அவினாசி ஆகிய தொகுதிகளில் போட்டியிட்டு 6 முறை எம்எல்ஏ-வாக வென்றுள்ளார். வரலாற்றுப் பதிவு (சபாநாயகர் பதவி): கடந்த 2012 முதல் 2021 வரை தமிழக சட்டமன்றத்தின் 13-வது சபாநாயகராகப் பணியாற்றினார். மாநில மறுசீரமைப்புச் சட்டத்திற்குப் பிறகு (1956-க்குப் பின்), தமிழக வரலாற்றிலேயே தனித்தொகுதியில் (Reserved Constituency) இருந்து தேர்ந்தெடுக்கப்பட்டு, சபாநாயகர் என்ற மிக உயரிய பதவியை அலங்கரித்த முதல் தலித் தலைவர் இவர்தான். அதிமுக உட்கட்சிப் பூசல்: 2017-ல் ஓ.பி.எஸ் - ஈ.பி.எஸ் மோதல் மற்றும் டி.டி.வி. தினகரன் ஆதரவு எம்எல்ஏக்கள் தகுதி நீக்கம் செய்யப்பட்ட போது, சட்டமன்றத்தை மிகவும் பக்குவமாகக் கையாண்டவர் சபாநாயகர் தனபால் தான். அன்றைய இக்கட்டான சூழலில் அதிமுக ஆட்சியைத் தக்கவைக்க இவர் முக்கியப் பங்கு வகித்தார். இயக்குனர் மாரி செல்வராஜ் 'மாமன்னன்' படத்தை எடுத்த போது, வடிவேலுவின் கதாபாத்திரத்தை சபாநாயகர் தனபாலின் நிஜ வாழ்வியல் தாக்கங்களை வைத்தே செதுக்கினார். திரைப்படத்தில் (வடிவேலு - மாமன்னன்)நிஜ வாழ்க்கையில் (ப. தனபால்) மாமன்னன் 'காசிபுரம்' என்ற தனித்தொகுதியின் எம்எல்ஏ-வாக இருப்பார். தனபால் 'ராசிபுரம்' என்ற தனித்தொகுதியின் எம்எல்ஏ-வாக இருந்தார். (இயக்குனர் பெயரைக் கூட மாற்றி வைக்கவில்லை). படத்தில் ஒடுக்கப்பட்ட சமூகத்தைச் சேர்ந்த வடிவேலு, கட்சியின் மூத்த தலைவராக இருந்தாலும் மாவட்டச் செயலாளர் (பகத் பாசில்) வீட்டில் சமமாக உட்கார நாற்காலி கொடுக்கப்படாது.நிஜ அரசியலிலும் தனபால் எத்தனையோ முறை சாதிய ஆதிக்கங்களையும், உட்கட்சி அவமதிப்புகளையும் எதிர்கொண்டதாகக் கூறப்பட்டது. படத்தின் இறுதியில் மாமன்னன் தமிழக சட்டசபையின் சபாநாயகராக (Speaker) உயர்வார்.நிஜத்திலும் ஜெயலலிதாவால் தனபால் தமிழகத்தின் சபாநாயகராக ஆக்கப்பட்டு அழகு பார்க்கப்பட்டார். படத்தில் முதலமைச்சராக வரும் நடிகர் லால் (வடிவேலுவின் கட்சித் தலைவர்), இடைவேளைக்கு முன்பு வடிவேலு மற்றும் அவரது மகனுக்கு (உதயநிதி) ஆதரவாக நிற்பார். சாதிய ஆதிக்கக்காரரான பகத் பாசிலை எதிர்த்து, வடிவேலுவையே மீண்டும் வேட்பாளராக அறிவிப்பார். இது நிஜ வாழ்க்கையில் ஜெயலலிதா செய்த ஒரு துணிச்சலான சம்பவத்தின் பிரதிபலிப்பு என்று அரசியல் வட்டாரங்களில் பேசப்பட்டது. நிஜ சம்பவம்: கொங்கு மண்டலத்தில் சாதிய ஆதிக்கம் மிகுந்த ஒரு காலத்தில், தனபால் போன்ற ஒடுக்கப்பட்ட சமூகத்தைச் சேர்ந்த ஒருவரை சபாநாயகர் நாற்காலியில் அமர வைத்தார் ஜெயலலிதா. அதுமட்டுமன்றி, சட்டசபையில் தனபால் உள்ளே நுழையும் போது ஜெயலலிதா உட்பட அனைத்து அமைச்சர்களும் எழுந்து நின்று அவருக்கு மரியாதை செலுத்த வேண்டும் என்ற விதியை மிகக் கண்டிப்பாகப் பின்பற்றச் செய்தார். ஆதிக்கச் சமூகத்தினர் பலருக்கு இதில் விருப்பம் இல்லையென்றாலும், ஜெயலலிதா தனது அதிகாரத்தின் மூலம் சமூக நீதியை நிலைநாட்டினார். மாமன்னன் படம் ரிலீஸான போது, 'வடிவேலுவின் கேரக்டர் நீங்கதானா?' என்று செய்தியாளர்கள் தனபாலிடம் கேட்டனர். அதற்கு அவர், "படத்தில் காசிபுரம் என்று வைத்துள்ளார்கள். நான் ராசிபுரத்தில் வென்றவன். படத்தின் க்ளைமாக்ஸில் சபாநாயகர் ஆவது போலக் காட்டியுள்ளார்கள். என்னை சபாநாயகராக்கி அழகு பார்த்தவர் ஜெயலலிதா. படத்தை மக்கள் பார்த்துக் கொள்வார்கள்" என்று மிகவும் பக்குவமாகப் பதிலளித்தார். படம் வெளியான பிறகு, தனபாலின் அரசியல் வாழ்வை இன்றைய தலைமுறையினர் பலரும் கூகுளில் தேடிப் படித்து, அவருக்குப் பின்னால் இருந்த சமூகநீதி வரலாற்றைத் தெரிந்து கொண்டனர் என்பது குறிப்பிடத்தக்கது.1. யார் இந்த முன்னாள் சபாநாயகர் தனபால்?
2. 'மாமன்னன்' கதையும் தனபாலின் நிஜ வாழ்க்கையும்
3. மாமன்னன் படத்தில் ஜெயலலிதாவின் பாத்திரம் (முதலமைச்சர் லால்)
4. படம் வெளியான போது தனபாலின் ரியாக்ஷன் என்ன?