சர்வதேசப் பொருளாதாரச் சூழலில் ஏற்பட்டுள்ள அதிரடி மாற்றங்களுக்கு மத்தியில், இன்றைய வர்த்தகச் சந்தையில் (வியாழக்கிழமை) தங்கம் விலையானது உயர்வைக் கண்டுள்ளது. கடந்த சில தினங்களாக உலக நாடுகளை அச்சுறுத்தி வந்த மத்திய கிழக்கு நாடுகளின் போர் பதற்றங்கள் தற்போது தணிவதற்கான தற்காலிக அறிகுறிகள் தென்படத் தொடங்கியுள்ளன.
இதன் காரணமாக உலகளாவிய பணவீக்கம் (Inflation) குறித்த அச்சம் முதலீட்டாளர்கள் மத்தியில் ஓரளவு குறைந்துள்ளதே தங்கம் விலை மீண்டும் உயர்வதற்குக் காரணமாக அமைந்துள்ளது. அதே நேரத்தில், அமெரிக்காவின் வட்டி விகிதக் கொள்கையைத் தீர்மானிக்கும் அந்நாட்டின் முக்கிய வேலைவாய்ப்புச் சந்தை தரவுகளை (U.S. labor market data) எதிர்பார்த்து உலகளாவிய முதலீட்டாளர்கள் தற்போது தங்களின் கவனத்தைத் திருப்பியுள்ளனர்.
சர்வதேசச் சந்தையில் இன்று காலை நிலவரப்படி, சர்வதேச ஸ்பாட் தங்கம் (Spot Gold) விலையானது 1 சதவீதம் வரை உயர்ந்து ஒரு அவுன்ஸ் 4,484.8 டாலராக வர்த்தகமாகி வருகிறது. அதே நேரத்தில், அமெரிக்கத் தங்க பியூச்சர்ஸ் வர்த்தகம் (U.S. Gold Futures) 0.7 விழுக்காடு அதிகரித்து ஒரு அவுன்ஸ் 4,486.84 டாலராக முன்னேறியுள்ளது. நேற்றைய வர்த்தகத்தில் அமெரிக்க டாலரின் மதிப்பு கணிசமாக வலுவடைந்ததன் காரணமாகத் தங்கம் விலையானது ஒரே நாளில் 1 சதவீதத்திற்கு மேல் சரிவைச் சந்தித்திருந்தது குறிப்பிடத்தக்கது. டாலரின் கடுமையான அழுத்தத்தைக் கடந்து தற்போது தங்கம் விலை மீண்டும் ஏறுமுகப் பாதையை நோக்கி நகரத் தொடங்கியுள்ளது. இந்திய பியூச்சர்ஸ் சந்தையிலும் தங்கம் விலை 0.41 சதவீதம் உயர்ந்து 1,59,165 ரூபாயாக உள்ளது. காலை வர்த்தகத்தில் 0.60 சதவீதம் வரையில் உயர்ந்திருந்தது. இஸ்ரேல் மற்றும் லெபனான் நாடுகளுக்கு இடையே தற்காலிகப் போர் நிறுத்த ஒப்பந்தம் (Ceasefire arrangement) எட்டப்பட்டுள்ளதாக அமெரிக்காவின் டிரம்ப் நிர்வாகம் நேற்று நள்ளிரவில் அதிகாரப்பூர்வமாக அறிவித்துள்ளது. இருப்பினும், இந்த ஒப்பந்தமானது லெபனானின் ஹிஸ்புல்லா அமைப்பு தங்களின் தாக்குதலை நிறுத்துவதைச் சார்ந்து மட்டுமே அமைந்துள்ளது. மறுபுறம், நேற்று ஈரானிய ஏவுகணைகள் குவைத் மற்றும் பஹ்ரைன் மீது தாக்குதல் நடத்தியதாக வெளியான தகவல்களும், ஹார்முஸ் ஜலசந்திக்கு அருகே உள்ள ஈரானின் கேஷ்ம் தீவு மீது அமெரிக்கா நடத்திய அதிரடித் தாக்குதல்களும் உலக நாடுகளைப் பெரும் அதிர்ச்சியில் ஆழ்த்தியிருந்தன. இஸ்ரேலியப் படைகளும் தெற்கு லெபனானில் ஹிஸ்புல்லாவின் கட்டுப்பாட்டுப் பகுதிகளைக் குறிவைத்துத் தங்களின் ராணுவ நடவடிக்கைகளைத் தீவிரப்படுத்தியுள்ளதால், முதலீட்டாளர்கள் தற்போது மிகவும் எச்சரிக்கையுடனான (Cautious) முதலீட்டு உத்திகளைக் கையாண்டு வருகின்றனர். கடந்த மூன்று தினங்களாகத் தொடர்ச்சியான விலையேற்றத்தைச் சந்தித்து வந்த சர்வதேசக் கச்சா எண்ணெய் (Crude Oil) விலையானது இன்று வீழ்ச்சியடைந்துள்ளது. இந்த விலை வீழ்ச்சியின் காரணமாக, எரிசக்தி செலவுகள் அதிகரித்து அது உலகளாவிய பணவீக்கத்தை மேலும் தூண்டிவிடுமோ என்ற பயம் சந்தையில் தற்போது பெருமளவில் குறைந்துள்ளது. இவற்றுக்கு இடையே, ஒட்டுமொத்த வர்த்தக உலகமும் அமெரிக்காவின் அடுத்தகட்டப் பொருளாதாரத் தரவுகள் மற்றும் நாளை (வெள்ளிக்கிழமை) வெளியாகவிருக்கும் அதிகாரப்பூர்வ விவசாயம் அல்லாத வேலைவாய்ப்பு (Nonfarm payrolls) அறிக்கையை மிக உன்னிப்பாகக் கவனித்து வருகிறது. நேற்று வெளியான ஏடிபி (ADP) தனியார் நிறுவன வேலைவாய்ப்புத் தரவுகளின்படி, அமெரிக்காவில் கடந்த மே மாதத்தில் மட்டும் புதிதாக 1,22,000 தனியார் வேலைவாய்ப்புகள் உருவாக்கப்பட்டுள்ளது தெரியவந்துள்ளது. இது பொருளாதார வல்லுநர்களின் கணிப்புகளை விட மிக அதிகமாகும்.ஸ்பாட் கோல்டு
இந்திய MCX சந்தை
மத்திய கிழக்கில் தற்காலிகப் போர் நிறுத்தம்
கச்சா எண்ணெய் விலை வீழ்ச்சி