வார்த்தையை விட்ட நிர்மல் குமார்.. பவுடர் உடைத்த உங்க அமைச்சரை கேளுங்க.. அவையில் உதயநிதி சரவெடி!

தொடர்ந்து, எதிர்க்கட்சித் தலைவரும் திமுக இளைஞரணிச் செயலாளருமான உதயநிதி ஸ்டாலின், அமுதன் கொலை தொடர்பாக கொண்டு வந்த சிறப்பு கவன ஈர்ப்பு தீர்மானத்தின் மீது பேச அனுமதி வழங்கப்பட்டது.

அவையில் அனல் பறக்கப் பேசிய உதயநிதி ஸ்டாலின்:

100 நாள் சாதனை என்று பெருமை பேசும் தவெக அரசு, இந்த நூறு நாட்களில் தமிழ்நாட்டின் சட்டம் - ஒழுங்கு எந்த அளவிற்குப் படுமோசமாகச் சீரழிந்துள்ளது என்பதையும் கவனத்தில் கொள்ள வேண்டும். கல்லூரிகளில் போதைப் பொருள் பயன்பாட்டிற்கு எதிரான தீவிர விழிப்புணர்வு முகாம்களையும், மாணவர்கள் மத்தியிலான வன்முறையைத் தடுக்க முறையான ஆலோசனைகளையும் தொடர்ந்து வழங்க வேண்டும்.

கோவையில் ஒரு கல்லூரி மாணவர் கொடூரமாக அடித்துக் கொல்லப்பட்டுள்ள நிலையில், துறை சார்ந்த அமைச்சர் இதனை ஏதோ இரு கோஷ்டிகளுக்கு இடையேயான மோதல் என்று மிக எளிதாகக் கடந்து செல்லப் பார்ப்பது கண்டனத்துக்குரியது. இது சாதாரண மாணவர் மோதல் அல்ல, போதைப் பொருள் நெட்வொர்க்கை வெளிப்படுத்தியதால் நடந்த ஒரு கொடூரப் படுகொலை, என்று ஆவேசமாக வாதிட்டார்.

போதைப்பொருள் பின்னணியும் விஸ்வரூபமெடுத்த சர்ச்சையும்

கள்ளக்குறிச்சியைச் சேர்ந்த மூன்றாம் ஆண்டு பொறியியல் மாணவர் அமுதன் (19), கல்லூரி வளாகத்திற்கு வெளியே சக மாணவர்களால் கொடூரமாகத் தாக்கப்பட்டு உயிரிழந்தார். கல்லூரி விடுதியில் நடக்கும் கஞ்சா மற்றும் போதைப் பொருள் பயன்பாடு குறித்து நிர்வாகத்திடம் தகவல் தெரிவித்த காரணத்தினாலேயே அவர் திட்டமிட்டு படுகொலை செய்யப்பட்டதாக அவரது பெற்றோர் மற்றும் மனித உரிமை அமைப்புகள் குற்றம் சாட்டியுள்ளன.

இக்கொலை தொடர்பாக 17 வயது சிறுவன் உள்ளிட்ட கல்லூரி மாணவர்கள் கைது செய்யப்பட்டுள்ளனர். இந்த வழக்கை சிபி-சிஐடி அல்லது சிபிஐ வசம் ஒப்படைக்க வேண்டும் என மாணவர் அமைப்புகளும், பாஜக, நாம் தமிழர் கட்சி உள்ளிட்ட எதிர்க்கட்சிகளும் வலியுறுத்தி வருகின்றன.

அமைச்சருக்கு உதயநிதி ஸ்டாலின் கொடுத்த அதிரடி பதிலடி

உதயநிதி ஸ்டாலினின் குற்றச்சாட்டுகளுக்குப் பதிலளித்துப் பேசிய தவெக அமைச்சர் நிர்மல் குமார், "கடந்த 5 ஆண்டுகால திமுக ஆட்சியில் தான் போதைப்பொருள் புழக்கம் விஸ்வரூபம் எடுத்தது. போதைப்பொருள் கடத்தல் வழக்கில் கைதான ஜாபர் சாதிக் என்பவருடன் ஸ்டாலின் குடும்பத்தினர் மிக நெருக்கமாக இருந்தனர்" என்று குற்றம் சாட்டினார்.

இதற்கு உடனடி மறுப்பு தெரிவித்து அதிரடி பதிலடி கொடுத்த எதிர்க்கட்சித் தலைவர் உதயநிதி ஸ்டாலின்:
"ஜாபர் சாதிக் மீது சந்தேகம் எழுந்த உடனேயே, முன்னாள் முதல்வர் மு.க.ஸ்டாலின் தலைமையிலான அரசு மிகக் கடுமையான சட்ட நடவடிக்கைகளை எடுத்தது. ஆனால், ஐபிஎல் கிரிக்கெட் மைதானத்தில் போதைப் பொருள் போன்ற ஒரு பொடியைப் பயன்படுத்தியதாக வீடியோ வெளியாகி சர்ச்சையில் சிக்கிய தவெக அமைச்சர் சரத் மீது இதுவரை முதலமைச்சர் எந்த நடவடிக்கையும் எடுக்காமல் மௌனம் காப்பது ஏன்?" என்று சரமாரியாகக் கேள்வி எழுப்பினார்.

இந்த காரசார விவாதத்தால் சட்டப்பேரவை வளாகம் முழுவதும் பெரும் பரபரப்பு ஏற்பட்டது.