இந்திய அரசியலில் கார்ப்பரேட் கலாச்சாரம்! விஜய், பிரசாந்த் கிஷோர், அண்ணாமலை காட்டும் புதிய ரூட்!

இவர்கள் வெவ்வேறு அரசியல் சித்தாந்தங்களைக் கொண்டிருந்தாலும், பாரம்பரிய அரசியல் கட்டமைப்புகளுக்குப் பதிலாக, தங்களது சொந்த அடையாளத்தைக் கொண்டு அரசியலை ஆரம்பக் கட்டத்தில் இருந்து கார்ப்பரேட் ஸ்டைலில் கட்டமைக்க முயல்கிறார்கள்.

பிரசாந்த் கிஷோர்: ஆலோசகரில் இருந்து மக்கள் பிரதிநிதி வரை

பாங்கிபூர் தொகுதி இடைத்தேர்தலில் ஆகஸ்ட் 3 அன்று பிரசாந்த் கிஷோர் பெற்ற வெற்றி, இந்திய அரசியலின் தலைமுறை மாற்றத்திற்கான முக்கிய அடையாளமாகக் கருதப்படுகிறது. பல ஆண்டுகள் தேர்தல் வியூக வகுப்பாளராகப் பணியாற்றிய பிகே, பீகாரில் 3,000 கி.மீ நடைபயணம் மேற்கொண்டு 'ஜன சுராஜ்' கட்சியைத் தொடங்கினார்.

2025 பீகார் சட்டமன்றத் தேர்தலில் அவரது கட்சி ஒரு இடத்தைக் கூட வெல்லவில்லை என்றாலும், தோல்வியிலிருந்து பாடம் கற்றுக்கொண்டு மீண்டெழுந்தார். பாஜகவின் 30 ஆண்டு காலக் கோட்டையான பாங்கிபூரை இடைத்தேர்தலில் கைப்பற்றி, ஒரு ஸ்டார்ட்அப் நிறுவனம் பங்கு சந்தையில் வேகமாக வளருவது போல தனது அரசியல் பயணத்தை நிரூபித்துள்ளார்.

விஜய்: பொலிட்டிக்கல் வெற்றி

பிரசாந்த் கிஷோர் வளர்ந்து வரும் ஸ்டார்ட்அப் என்றால், தமிழக முதல்வர் விஜய் ஒரு 'யூனிகார்ன்' ஸ்டார்ட் அப் நிறுவனத்தைப் போன்றவர். 2024-ல் தமிழக வெற்றி கழகத்தைத் தொடங்கிய விஜய், பல ஆண்டுகளாக திமுக மற்றும் அதிமுக வசம் இருந்த திராவிட அரசியல் ஆதிக்கத்தை உடைத்தெறிந்தார்.

2026 தமிழக சட்டமன்றத் தேர்தலில் 108 இடங்களைக் கைப்பற்றி ஆட்சி அமைத்ததன் மூலம், மிகக் குறுகிய காலத்தில் உச்சகட்ட அரசியல் வளர்ச்சியை எட்டிய தலைவராக வரலாறு படைத்துள்ளார். ரசிகர்கள் மற்றும் இளைஞர் பட்டாளத்தை வைத்து ஒரு அரசியல் பிராண்டை உருவாக்கி, கார்ப்பரேட் பணியில் ப்ரோமோஷன் செய்து மிக விரைவாக அதிகாரத்தைக் கைப்பற்றியுள்ளார்.

கே. அண்ணாமலை: பழைய பாதை

ஐபிஎஸ் அதிகாரி பதவியைத் துறந்து பாஜகவில் இணைந்த கே. அண்ணாமலை, கட்சியின் மாநிலத் தலைவராகப் பணியாற்றினார். எனினும் பாஜகவில் இருந்து விலகி ஜூன் 2026-ல் வீ தி லீடர்ஸ் என்ற புதிய இயக்கத்தைத் தொடங்கினார்.

ஒரு பெரிய அரசியல் கட்சியில் இருந்து வெளியேறி, 2031 சட்டமன்றத் தேர்தலை இலக்காகக் கொண்டு, புதிய அமைப்பு, புதிய கொள்கை, புதிய பாதை என்று.. அண்ணாமலை புதிய ஸ்டைலை தேர்வு செய்துள்ளார். உறுப்பினர் சேர்க்கை தொடங்கி கட்சி கொள்கையை கொண்டு செல்வது வரை அனைத்திலும் இவர் கார்ப்பரேட் ஸ்டைலையே கடைபிடிக்கிறார்.

புதிய அரசியல் கலாசாரம்

1983-ல் என்.டி. ராமராவ், 1985-ல் அசம் கண பரிஷத், 2012-ல் அரவிந்த் கெஜரிவாலின் ஆம் ஆத்மி போன்ற அரசியல் மாற்றங்களை இந்தியா பார்த்துள்ளது. ஆனால், இன்றைய டிஜிட்டல் யுகத்தில் தரவுகள், தொழில்நுட்பம், தனிநபர் பிராண்டிங் மற்றும் இளைஞர் நெட்வொர்க் ஆகியவற்றைக் கொண்டு அரசியல் செய்ய முடியும், அதில் வெல்லவும் முடியும் என்பதை இவர்கள் நிரூபித்துள்ளனர்.

சாதியும் மதமும் இந்திய அரசியலில் இன்னமும் முக்கியப் பங்கு வகித்தாலும், இந்த 'ஸ்டார்ட்அப்' தலைவர்கள் பாரம்பரிய அரசியல் விதிகளை மாற்றி எழுதி வருகிறார்கள்.