சென்னை: தமிழ்நாட்டில் புதிதாகப் பொறுப்பேற்றுள்ள முதல்வர் விஜய் தலைமையிலான தமிழக வெற்றிக் கழக (TVK) அரசு, முந்தைய திமுக அரசால் அறிமுகப்படுத்தப்பட்ட 'தமிழ்நாடு உறுதி அளிக்கப்பட்ட ஓய்வூதியத் திட்டம்' (TAPS)ஐ கைவிடலாம் என்ற தகவல் அரசு ஊழியர்கள் மற்றும் ஆசிரியர்கள் மத்தியில் பெரும் பரபரப்பை ஏற்படுத்தியுள்ளது.
கடந்த ஜனவரியில் முன்னாள் முதல்வர் மு.க.ஸ்டாலின் தலைமையிலான திமுக அரசு, அரசு ஊழியர்களின் நீண்டகால கோரிக்கையை ஓரளவு நிறைவேற்றும் வகையில் TAPS திட்டத்தை அறிவித்தது. பங்களிப்பு ஓய்வூதியத் திட்டம் (CPS) மற்றும் பழைய ஓய்வூதியத் திட்டம் (OPS) இடையேயான சமரசத் திட்டமாக இது கருதப்பட்டது. இத்திட்டத்தின்படி, கடைசி மாத சம்பளத்தில் 50 சதவீதம் ஓய்வூதியமாக உறுதி செய்யப்படும். ஆனால் ஊழியர்களின் 10 சதவீத பங்களிப்பு தொடரும் என்ற விதி இடம் பெற்றிருந்தது.
எனினும், தேர்தல் பிரச்சார காலத்தில் தமிழக வெற்றிக் கழகம் உள்ளிட்ட எதிர்க்கட்சிகள், "அரசு ஊழியர்களுக்கு முழு OPS திட்டத்தை மட்டுமே அமல்படுத்துவோம். அரைகுறை திட்டங்கள் தேவையில்லை" என்று தெளிவான நிலைப்பாட்டை வெளியிட்டிருந்தன. இப்போது முதல்வர் விஜய் பொறுப்பேற்ற பிறகு, வருவாய்த்துறை ஊழியர் சங்கம் (FERA) உள்ளிட்ட பல்வேறு அரசு ஊழியர் அமைப்புகள் OPS திட்டத்தை உடனடியாக மீட்டெடுக்க வேண்டும் என வலியுறுத்தி வருகின்றன. நிர்வாக வட்டாரங்கள் தெரிவிக்கும் தகவலின்படி, TAPS திட்டத்தை முழுமையாகச் செயல்படுத்தினால் அரசுக்கு கணிசமான நிதிச் சுமை ஏற்படும். முதற்கட்டத்தில் ரூ.13,000 கோடியும், பின்னர் ஆண்டுக்கு ரூ.11,000 கோடியும் கூடுதலாக ஒதுக்க வேண்டிய நிலை உள்ளது. தமிழ்நாட்டின் மொத்த வருவாயில் ஏற்கனவே சுமார் 62 சதவீதம் சம்பளம், ஓய்வூதியம் மற்றும் வட்டிக்காகவே செலவிடப்படுவதால், புதிய அரசு பிற மக்கள் நலத் திட்டங்கள் மற்றும் தேர்தல் வாக்குறுதிகளை நிறைவேற்ற நிதி திரட்டும் அழுத்தத்தில் உள்ளது. இதனால் முந்தைய அரசு அவசரமாகக் கொண்டு வந்த TAPS திட்டத்தின் விதிமுறைகளை இன்னும் அரசிதழில் முழுமையாக வெளியிடாமல் நிறுத்தி வைத்திருப்பதாகக் கூறப்படுகிறது. இந்தச் சூழலில், TAPSஐ முழுமையாகக் கைவிட்டு, மத்திய அரசின் ஒருங்கிணைந்த ஓய்வூதியத் திட்டம் (UPS) போன்ற மாற்று வழிகளை நோக்கி விஜய் அரசு நகரலாம் என்று அரசியல் விமர்சகர்கள் கருதுகின்றனர். அல்லது OPSஐ முழுமையாக அமல்படுத்த நிதியாதாரங்களைத் திரட்ட கால அவகாசம் கோரலாம் என்பதும் பேசப்படுகிறது. சமீபத்தில் அரசு ஊழியர்களுக்கு 2 சதவீத அகவிலைப்படி (DA) உயர்வு அறிவித்து முதல்வர் விஜய் நம்பிக்கை அளித்திருந்தாலும், ஓய்வூதிய விவகாரத்தில் இறுதி முடிவு என்ன என்பது இன்னும் தெளிவாகவில்லை. TAPS திட்டம் முற்றிலும் கைவிடப்பட்டால், அரசு ஊழியர்கள் மீண்டும் போராட்டத்துக்கு தயாராகும் சூழல் உருவாகலாம் என்பதால், கோட்டை வட்டாரங்கள் மிகுந்த எச்சரிக்கையுடன் செயல்பட்டு வருகின்றன. தற்போது அரசு ஊழியர்கள் மத்தியில் கலந்துரையாடல்கள் தீவிரமடைந்துள்ளன. பலர் "தேர்தல் வாக்குறுதியை நிறைவேற்ற வேண்டும்" என வலியுறுத்துகின்றனர். முதல்வர் விஜய்யின் இந்த முடிவு அவரது அரசின் முதல் பெரிய சவாலாகவும் மாறியுள்ளது.நிதிச் சுமை பெரும் சவால்!
அரசு ஊழியர்கள் மற்றும் ஓய்வூதியர்களின் நிம்மதியை உறுதி செய்யும் வகையில், பழைய ஓய்வூதியத் திட்டம் (OPS) அல்லது புதிய மாற்றுத் திட்டம் எது என்பதை முதல்வர் விஜய் விரைவில் அதிகாரப்பூர்வமாக அறிவிப்பார் என எதிர்பார்க்கப்படுகிறது. இந்த முடிவு தமிழ்நாட்டில் லட்சக்கணக்கான அரசு ஊழியர்கள், ஆசிரியர்கள் மற்றும் அவர்களது குடும்பங்களின் எதிர்காலத்தை நிர்ணயிக்கும் முக்கியமான ஒன்றாகப் பார்க்கப்படுகிறது.