சென்னை: தமிழக அரசியலில் ஐந்து முறை முதல்வராக இருந்து, நவீன தமிழகத்தின் சிற்பியாகத் திகழ்ந்தவர் மு.கருணாநிதி. அவரது நினைவு நாளில், அவர் இந்திய அளவிலும் மாநில அளவிலும் நடைமுறைப்படுத்திய புரட்சிகரமான நலத்திட்டங்கள் தமிழக சமூக அமைப்பில் ஏற்படுத்திய தாக்கத்தை நினைவுகூர்வது மிக அவசியமாகும்.
எளிய மக்களும் ஏழை எளிய மக்களும், பெண்களும், குடும்பங்களும், தொழிலாளர்களும் கண்ணியமான வாழ்வைப் பெற வேண்டும் என்ற திராவிட மாடல் சிந்தனையே அவரது அனைத்துத் திட்டங்களுக்கும் அடிப்படையாக அமைந்தது.
சமூகத்தில் பின்தங்கிய மக்களுக்கு அதிகாரம் அளிப்பதே உண்மையான வளர்ச்சி என்ற கொள்கையில் உறுதியாக இருந்தவர் கருணாநிதி. 1989-இல் பெண்களுக்கு சொத்தில் சம உரிமை அளிக்கும் சட்டத்தைக் கொண்டுவந்து வரலாற்றுச் சாதனை படைத்தார். இது இந்திய அளவில் மகளிரின் பொருளாதாரச் சுதந்திரத்திற்குப் பெரும் வித்திட்டது. மேலும், அரசுப் பணிகளில் பெண்களுக்கு 30% இடஒதுக்கீடும், உள்ளாட்சி அமைப்புகளில் 33% இடஒதுக்கீடும் வழங்கி பெண்களை அதிகார மையங்களுக்குக் கொண்டுவந்தார். மூவலூர் ராமாமிர்தம் அம்மையார் நினைவு திருமண உதவித் திட்டம் மற்றும் கர்ப்பிணிப் பெண்களுக்கான நிதி உதவித் திட்டங்கள் மூலம் ஏழை பெண்களின் வாழ்வில் ஒளியேற்றினார். விவசாயிகளின் வாழ்வாதாரத்தை உயர்த்த 1990-ஆம் ஆண்டு இந்தியாவில் முதன்முறையாக விவசாயத்திற்கு இலவச மின்சாரம் வழங்கும் திட்டத்தை அறிமுகப்படுத்தினார். இடைத்தரகர்கள் இன்றி விவசாயிகள் தங்களின் விளைபொருட்களை நேரடியாக நுகர்வோருக்குச் சென்று விற்பனை செய்து பயன்பெற 'உழவர் சந்தை' திட்டத்தைக் கொண்டுவந்தார். உழைப்பாளர் நலனை மதிக்கும் வகையில் மே தினத்திற்கு ஊதியத்துடன் கூடிய விடுமுறை அறிவித்தார். மனிதனை மனிதன் இழுக்கும் கொடுமையான கைரிக்சா முறையை ஒழித்து, இலவசமாகச் சுழல் ரிக்ஷாக்கள் வழங்கி உழைக்கும் வர்க்கத்தின் மாண்பைக் காத்தார். ஜாதிய பாகுபாடுகளைக் களைந்து சமூக நல்லிணக்கத்தை உருவாக்க அவர் உருவாக்கிய 'பெரியார் நினைவு சமத்துவபுரம்' திட்டம் சர்வதேச அளவிலும் கவனம் ஈர்த்தது. ஒரே வளாகத்தில் அனைத்துச் சமூக மக்களும் ஒன்றிணைந்து வாழும் சூழலை இத்திட்டம் உருவாக்கிக் காட்டியது. குடிசைப் பகுதிகளை அகற்றி ஏழை மக்களுக்குக் கான்கிரீட் வீடுகள் கட்டித்தர 'குடிசை மாற்று வாரியத்தை' அமைத்ததும் இவரது தொலைநோக்குப் பார்வையின் சான்றாகும். ஏழை எளிய மக்களுக்கு உயர்தர சிகிச்சை கிடைக்க 'வருமுன் காப்போம்' திட்டம் மற்றும் கலைஞரின் காப்பீட்டுத் திட்டம் போன்றவற்றை நடைமுறைப்படுத்தினார். பள்ளி மாணவர்களுக்கு இலவசப் பேருந்து பாஸ், சத்துணவில் முட்டை வழங்கும் திட்டம் ஆகியவை ஏழை மாணவர்களின் கல்விச் சேர்க்கையை கணிசமாக உயர்த்தின. இலவச டிவி, இலவச அரிசி தொடங்கி பல்வேறு நேரடி இலவச நலத்திட்டங்களை கொண்டு வந்த முன்னோடி இவர்! அத்துடன் டைடல் பார்க் அமைத்துத் தமிழகத்தை தகவல் தொழில்நுட்பத் துறையின் மையமாக மாற்றிய பெருமையும் அவரைச் சேரும். கோயம்பேடு பேருந்து நிலையம், கத்திப்பாரா பாலம், குமரி திருவள்ளுவர் சிலை என்று தமிழ்நாட்டின் உட்கட்டமைப்பை சர்வதேச அளவிற்கு கொண்டு சென்றதும் முன்னாள் முதல்வர் கருணாநிதிதான்! தமிழுக்கு செம்மொழி அந்தஸ்து, செம்மொழி மாநாடு, தமிழ் பல்கலைக்கழகம் என்று தமிழுக்காக இவர் செய்த திட்டங்களை தனி பட்டியலே இடலாம்! இன்று கருணாநிதி நம்மிடையே இல்லை என்றாலும், அவர் உருவாக்கிய நலத்திட்டங்களின் பலனைத் தமிழகத்தின் ஒவ்வொரு குடும்பமும் ஏதோ ஒரு வகையில் அனுபவித்து வருகிறது. அடித்தட்டு மக்களின் குரலாக ஒலித்து, மாநிலத்தின் ஒட்டுமொத்த வளர்ச்சிக்கு அடித்தளமிட்ட அவரது நலத்திட்டங்கள் என்றும் வரலாற்றுச் சுவடுகளாக நிலைத்திருக்கும்.சமூக நீதியும் மகளிருக்கான உரிமைகளும்
விவசாயிகள் மற்றும் உழைப்பாளர் நலன்
சமத்துவபுரம் மற்றும் குடியிருப்புத் திட்டங்கள்
சுகாதாரம், கல்வி மற்றும் உட்கட்டமைப்பு