கிளாம்பாக்கம் போக இனி ரயிலில் இறங்கி அலைய வேண்டாம்? பொங்கலுக்கு வரப்போகும் சூப்பர் மாற்றம்

கிளாம்பாக்கம் நடைமேடை

ஆனால், நடைமேடை அமைப்பதற்குத் தேவையான நிலத்தை கையகப்படுத்துவதில் தனியார் நில உரிமையாளர்களுடன் பிரச்சினை ஏற்பட்டது. இதுதொடர்பாக சென்னை ஹைகோர்ட்டில் வழக்கும் தொடரப்பட்டது. 2025ம் ஆண்டு மார்ச் மாதம் நிலம் கையகப்படுத்தும் நடவடிக்கையில் முறையான நடைமுறைகள் பின்பற்றப்படவில்லை என்று கூறி நீதிமன்றம் இடைக்காலத் தடை விதித்தது. இதனால் கட்டுமானப் பணிகள் பாதிக்கப்பட்டன.

பிறகு நிலம் கையகப்படுத்தும் திட்டத்தில் மாற்றங்கள் செய்யப்பட்டு, நடைமேடையின் வடிவமைப்பிலும் திருத்தங்கள் மேற்கொள்ளப்பட்டன. இதனிடையே, கட்டுமானத்தின் சில பகுதிகளில் தொழில்நுட்பக் குறைபாடுகள் இருப்பதாக ஐஐடி நிபுணர் குழுவும் சுட்டிக்காட்டியது. இதனால் கூடுதல் ஆய்வுகள் மற்றும் திருத்தப் பணிகள் மேற்கொள்ள வேண்டிய நிலை ஏற்பட்டது.

ரயில்வே அனுமதியிலும் தாமதம்

நிலம் தொடர்பான பிரச்சினைகள் ஒருபுறம் இருந்தாலும், ஜி.எஸ்.டி சாலையைக் கடந்து ஆகாய நடைமேடையை அமைப்பதும் சவாலாக மாறியது. குறிப்பாக, சாலையின் குறுக்கே பெரிய தூண்கள் இல்லாமல் நீண்ட பாலப் பகுதிகளை அமைக்க வேண்டியிருப்பதால் கட்டுமானப் பணிகளை மிகுந்த கவனத்துடன் மேற்கொள்ள வேண்டியுள்ளது.

மேலும், ரயில்வே தண்டவாளங்களுக்கு மேலே பாலத்தின் இணைப்புப் பகுதியை அமைக்க தெற்கு ரயில்வேயின் அனுமதி தேவைப்பட்டது. இதற்காக ரயில் போக்குவரத்தைச் சில மணி நேரம் நிறுத்த வேண்டிய சூழலும் இருப்பதால், ரயில்வே அதிகாரிகளுடன் ஒருங்கிணைப்பதில் காலதாமதம் ஏற்பட்டது. போக்குவரத்து காவல்துறையின் அனுமதியும் கிடைக்க வேண்டியிருந்தது.

பொங்கலுக்கு திறக்கப்படுமா?

இந்தத் திட்டம் முதலில் பல்வேறு காலக்கெடுக்களில் முடிக்கப்படும் என்று எதிர்பார்க்கப்பட்டது. ஆனால், ஒவ்வொரு முறையும் ஏதாவது ஒரு காரணத்தால் திறப்பு தள்ளிப்போனது. 2026 தீபாவளிக்குள் பயன்பாட்டுக்கு வரும் என்று எதிர்பார்க்கப்பட்ட நிலையில், அந்த இலக்கும் நிறைவேறவில்லை.

இப்போதுள்ள பணிகள் குறித்து வெளியாகியுள்ள தகவலின்படி, பேருந்து முனையம் அமைந்துள்ள பகுதியில் பாலத்தின் ஒரு பகுதி கட்டுமானப் பணிகள் மேற்கொள்ளப்பட்டுள்ளன. அதன் தற்காலிக தாங்கு அமைப்புகளை அகற்றுவதற்கான பணிகளும் நடைபெறுகின்றன. தீபாவளிக்குப் பிறகு அடுத்த பகுதியை அமைக்கத் திட்டமிடப்பட்டுள்ளது.

Kilambakkam: மீண்டும் கோட்டை விட்ட சிஎம்டிஏ..கிளாம்பாக்கம் ஸ்கைவாக் இப்போதைக்கு இல்லை! தீபாவளிக்கு திண்டாட்டம்தான்

2 நீண்ட பாலப் பகுதிகள்

ஜிஎஸ்டி சாலையின் குறுக்கே அமைக்க வேண்டிய இரண்டு நீண்ட பாலப் பகுதிகளே இப்போது முக்கியமான சவாலாக உள்ளன. இந்தப் பணிகளை முடித்த பிறகே ரயில் நிலையத்துடனான இணைப்பை ஏற்படுத்த முடியும்.

இதனால், சிஎம்டிஏ தற்போது ஆகாய நடைமேடையை பொங்கல் பண்டிகைக்குள் முடிக்க இலக்கு நிர்ணயித்துள்ளது. புதிய ரயில் நிலையத்தையும் பயன்பாட்டுக்குக் கொண்டுவருவதற்கு ஆகாய நடைமேடைப் பணிகள் முடிவடைவது அவசியம். எனவே, இந்த முறை அறிவிக்கப்பட்ட காலக்கெடுவுக்குள் பணிகள் முடிவடையுமா என்பதுதான் பயணிகளின் எதிர்பார்ப்பாக உள்ளது.