சென்னை: கிளாம்பாக்கம் ரயில் நிலையம் தீபாவளிக்கு முன்போ அல்லது பின்போ திறக்கப்படும் என்று சென்னை ரயில்வே கோட்ட மேலாளர் சைலேந்திர சிங் தெரிவித்துள்ளார்.
தலைநகர் சென்னையில் போக்குவரத்து நெரிசலைக் குறைக்கும் வகையில், வண்டலூரை அடுத்த கிளாம்பாக்கத்தில் புதிய பேருந்து நிலையம் அமைக்கப்பட்டு கடந்த 2023 ஆம் ஆண்டு டிசம்பரில் திறக்கப்பட்டது. சென்னையில் இருந்து தென் மாவட்டங்களுக்கு செல்லும் பெரும்பாலான அரசு மற்றும் ஆம்னி பேருந்துகள் இங்கிருந்து தான் இயக்கப்படுகின்றன.
சென்னையின் உட்புறப் பகுதிகளில் இருந்து கிளாம்பாக்கத்துக்கு செல்ல நகர பேருந்து வசதி மட்டுமே உள்ளது. ரயில் வசதி நேரடியாக இல்லை. இந்த பேருந்துகளில் எப்போதும் அதிகளவிலான கூட்டம் இருந்து வருகிறது. விழா காலங்கள் மற்றும் விடுமுறை நாட்களில் நகர பேருந்துகளில் அதிக கூட்டம் இருக்கும். கிளாம்பாக்கம் பேருந்து நிலையத்தின் அருகில், தாம்பரம் - செங்கல்பட்டு ரயில் பாதை இருக்கிறது. இருப்பினும், கிளாம்பாக்கத்தில் ரயில் நிலையம் இல்லை. இதனால் இங்கு மின்சார, விரைவு ரயில்களை நிறுத்த முடியாத நிலை இருக்கிறது. இங்கு ரயில் நிலையம் அமைக்க பயணிகள் தரப்பில் தொடர்ந்து கோரிக்கை விடுக்கப்பட்டது. இதையடுத்து, ரூபாய் 20 கோடி மதிப்பீட்டில் வண்டலூர் - ஊரப்பாக்கம் இடையே கிளாம்பாக்கத்தில் புதிய ரயில் நிலையம் அமைக்கப்படுவதற்கு தெற்கு ரயில்வே சென்னை ரயில்வே கோட்டம் கடந்த 2024 ஆம் ஆண்டு அக்டோபரில் ஒப்பந்தப்புள்ளி கோரியது. இதையடுத்து, ஒப்பந்தம் வழங்கப்பட்டு, ரயில் நிலைய கட்டுமானப் பணிகள் தொடங்கி, அனைத்து பணிகளும் நிறைவடைந்துவிட்டன. கிளாம்பாக்கம் பேருந்து நிலையத்திலிருந்து 500 மீட்டர் தூரத்தில் இந்த ரயில் நிலையம் அமைக்கப்பட்டுள்ளது. புதிய ரயில் நிலையத்தையும் ஜிஎஸ்டி சாலை யின் மறுபுறம் அமைந்துள்ள கிளாம்பாக்கம் பேருந்து நிலையத்தையும் இணைக்கும் வகையில், பிரம்மாண்ட ஆகாய நடை மேம்பாலம் அமைக்கும் பணி நடைபெற்றது. இந்த நிலையில் இன்று சென்னையில் செய்தியாளர்களைச் சந்தித்து பேசிய சென்னை ரயில்வே கோட்ட மேலாளர் சைலேந்திர சிங், "மூன்று நடைமேடைகளுடன் ரயில் நிலையம் கட்டும் பணி நிறைவடைந்து இருக்கிறது. தண்டவாள பணிகளும் நிறைவடைந்து விட்டது. தற்போது ஆகாய நடைமேடை அமைக்கும் பணி நடைபெற்று வருகிறது. இதுவும் 30 சதவீத பணி நிறைவடைந்து விட்டது. இதை மாநில அரசு செய்து வருகிறது. வரும் தீபாவளி பண்டிகைக்கு முன்னரோ அல்லது பின்னரோ இந்த ரயில் நிலையம் பயன்பாட்டுக்கு வருவதற்கு வாய்ப்பு உள்ளது. ரயில் நிலையம் திறந்த பின்னர் அதை பராமரிப்பதற்கான ஒப்பந்தம் மேற்கொள்ளப்படும்" என்று தெரிவித்துள்ளார்.