சென்னை: மதுராந்தகம், தாராபுரம் ஆகிய தொகுதிகளில் இடைத்தேர்தல் வாக்குப்பதிவு இன்று (6 ஆம் தேதி) காலை 7 மணி முதல் மாலை 6 மணி வரை நடைபெறவுள்ளது. வாக்காளர் அடையாள அட்டை இல்லாதவர்கள் 12 ஆவணங்களை பயன்படுத்தி வாக்களிக்கலாம் என்று தேர்தல் ஆணையம் தெரிவித்துள்ளது.
தமிழகத்தில் மதுராந்தகம், தாராபுரம் ஆகிய சட்டமன்றத் தொகுதிகளில் இடைத்தேர்தலுக்கான அறிவிப்பை கடந்த செப்டம்பர் 7 ஆம் தேதி தேர்தல் ஆணையம் வெளியிட்டது. வேட்புமனு தாக்கல் செப்டம்பர் 9-ல் தொடங்கி 16 ஆம் தேதியுடன் முடிவடைந்தது.
மதுராந்தகம் தொகுதியை பொறுத்தவரை மொத்த வாக்காளர்கள்: 2,13,689. ஆண் வாக்காளர்கள் 1,04,886, பெண் வாக்காளர்கள் 1,08,738, மூன்றாம் பாலினத்தவர் தோராயமாக 65 பேர் உள்ளனர். தாராபுரம் தொகுதியில் 1 லட்சத்து 7 ஆயிரத்து 285 ஆண்கள், 1 லட்சத்து 16 ஆயிரத்து 13 பெண்கள், 8 திருநங்கைகள் என மொத்தம் 2 லட்சத்து 23 ஆயிரத்து 306 வாக்காளர்கள் வாக்களிக்க தகுதி பெற்றுள்ளனர். மதுராந்தகம் தொகுதியில் மரகதம் குமரவேல் (தவெக), பரந்தாமன் (திமுக), கணிதா சம்பத் (அதிமுக), சுகந்தி (மார்க்சிஸ்ட்), ஜானகிராமன் (நாம் தமிழர் கட்சி) மற்றும் சுயேட்சைகள் உட்பட 27 பேர் களத்தில் உள்ளனர். அதேபோல், தாராபுரம் தொகுதியில் சத்யபாமா (தவெக), சுகன்யா (திமுக), பானுமதி (அதிமுக), லட்சுமணன் (சிபிஐ), கார்த்திகா (நாதக) உட்பட 22 பேர் போட்டியிடுகின்றனர். தவெக வேட்பாளர்களை ஆதரித்து முதல்வர் விஜய் மதுராந்தகம், தாராபுரம் தொகுதிகளில் தலா 2 நாட்கள் பிரச்சாரம் செய்தார். திமுக வேட்பாளர்களுக்கு ஆதரவாக அக்கட்சியின் தலைவர் மு.க.ஸ்டாலின், இளைஞரணி செயலாளர் உதயநிதி உள்ளிட்டோரும், அதிமுக வேட்பாளர்களை ஆதரித்து அக்கட்சியின் பொதுச் செயலாளர் எடப்பாடி பழனிசாமியும் தீவிர பிரச்சாரம் மேற்கொண்டனர். இடதுசாரி வேட்பாளர்களுக்கு வாக்கு கேட்டு அக்கட்சிகளின் நிர்வாகிகளும், நாம் தமிழர் கட்சியின் வேட்பாளர்களுக்காக தலைமை ஒருங்கிணைப்பாளர் சீமானும் இரு தொகுதிகளிலும் தீவிர பிரச்சாரம் செய்தனர். இந்த தேர்தலில் தவெக, திமுக, அதிமுக, நாதக, இடதுசாரிகள் என 5 முனை போட்டி நிலவுகிறது. இரு தொகுதிகளிலும் தேர்தல் பிரச்சாரம் அக்டோபர் 4-ம் தேதியுடன் நிறைவடைந்தது. இதையடுத்து இடைத்தேர்தலுக்கான வாக்குப்பதிவு இன்று (6 ஆம் தேதி) நடைபெறுகிறது. இதையொட்டி இரு தொகுதிகள் முழுவதும் துணை ராணுவத்தின் பாதுகாப்பு வளையத்துக்குள் கொண்டு வரப்பட்டு பலத்த கண்காணிப்பு ஏற்பாடுகள் மேற்கொள்ளப்பட்டுள்ளன. தொகுதிகளில் உள்ள வெளியாட்கள் முழுவதுமாக அங்கிருந்து வெளியேற்றப்பட்டுள்ளனர். இடைத்தேர்தல் நடைபெறும் இரு தொகுதிகளிலும் அமைக்கப்பட்டுள்ள வாக்குச்சாவடி மையங்களில் பதற்றமானவைகளாக கண்டறியப்பட்டுள்ள வாக்குச்சாவடிகளில் கூடுதல் போலீசார் மற்றும் தேர்தல் பறக்கும் படையினர் பாதுகாப்பு பணிக்கு நியமிக்கப்பட்டுள்ளனர். 2 தொகுதிகளிலும் பாதுகாப்பு அறையில் வைக்கப்பட்டிருந்த மின்னணு வாக்குப்பதிவு இயந்திரங்களில் நேற்று வேட்பாளர்களின் பெயர் மற்றும் சின்னங்கள் அடங்கிய தாள்கள் பொருத்தப்பட்டு சரிபார்க்கப்பட்டன. தொடர்ந்து வாக்குப்பதிவு இயந்திரங்கள் மற்றும் தேர்தல் உபகரணங்கள், வாக்குச்சாவடி மையங்களுக்கு அனுப்பி வைக்கப்பட்டன. மதுராந்தகம் தொகுதியில் 285 வாக்குச்சாவடி மையங்கள் உள்ளன. இதில், படாளம், மேலவலம் உட்பட60 வாக்குச்சாவடிகள் பதற்றமானவையாக கண்டறியப்பட்டுள்ளன. தாராபுரம் தொகுதியில் மொத்தமுள்ள 320 வாக்குச்சாவடிகளில் 18 பதற்றமானவையாக அடையாளம் காணப்பட்டுள்ளன. அவற்றில் கூடுதல் பாதுகாப்பு அளிக்கப்பட்டுள்ளது. இருதொகுதிகளிலும் தேர்தல் நடத்தை விதிகள் மற்றும் பணப்பட்டுவாடாவை கண்காணிக்க பறக்கும் படைகள், நிலையான கண்காணிப்புக் குழுக்கள் மற்றும் வீடியோ கண்காணிப்புக் குழுக்கள் தீவிர ரோந்துப் பணியில் ஈடுபட்டுள்ளன. இடைத்தேர்தல் வாக்குப்பதிவு காலை 7 முதல் மாலை 6 மணி வரை நடைபெற உள்ளது. வாக்குப்பதிவுக்கு முன்பாக கட்சிகளின் முகவர்கள் முன்னிலையில் மாதிரி வாக்குப்பதிவு நடத்தப்படும். வாக்காளர்கள் அரசு ஆவணங்களுடன் வாக்களிக்கலாம். வாக்குப்பதிவை முன்னிட்டு மதுராந்தகம், தாராபுரம் ஆகிய 2 தொகுதிகளுக்குட்பட்ட பகுதிகளில் இன்று பொது விடுமுறை வழங்கப்பட்டுள்ளது. பள்ளிகளில் 2 நாட்களுக்கு விடுமுறை அளிக்கப்பட்டுள்ளது. தொடர்ந்து வாக்கு எண்ணிக்கை வரும் 9-ம் தேதி நடைபெறவுள்ளது. வாக்காளர் அடையாள அட்டை இல்லாதவர்கள் ஆதார் கார்டு, புகைப்படத்துடன் கூடிய வங்கி அல்லது அஞ்சல் கணக்கு புத்தகம், மருத்துவ காப்பீடு ஸ்மார்ட் கார்டு, ஓட்டுநர் உரிமம், பான் கார்டு, ஸ்மார்ட் கார்டு, பாஸ்போர்ட், ஓய்வூதிய ஆவணம், பணியாளர் அடையாள அட்டை, மாற்றுத்திறனாளி அடையாள அட்டை உட்பட 12 ஆவணங்களை பயன்படுத்தலாம் என்று தேர்தல் ஆணையம் தெரிவித்துள்ளது.வாக்காளர்கள் எண்ணிக்கை
வேட்பாளர்கள்
அனல் பறந்த பிரச்சாரம்
இன்று வாக்குப்பதிவு
தேர்தல் பணிகள்
வாக்குப்பதிவு
எந்தெந்த ஆவணங்களை பயன்படுத்தி வாக்களிக்கலாம்?