சென்னை மடிப்பாக்கம் பகுதியில் அமைந்துள்ள சென்னை பெருநகர குடிநீர் வழங்கல் மற்றும் கழிவுநீரகற்று வாரிய (CMWSSB) வளாகத்தில் இன்று காலை எதிர்பாராத விதமாகப் பயங்கர தீ விபத்து ஏற்பட்டுள்ளது.
வேளச்சேரி - பள்ளிக்கரணை பிரதான சாலைக்கு மிக அருகே அமைந்துள்ள இந்த அரசு வளாகத்தில் திடீரெனப் பற்றிய தீ, அடுத்த சில நிமிடங்களில் மளமளவெனப் பரவி அசுர வேகத்தில் கொழுந்துவிட்டு எரியத் தொடங்கியது. இதனால் ஒட்டுமொத்தப் பகுதியையும் கரும்புகை மூட்டம் சூழ்ந்தது, பல கிலோமீட்டர் தூரத்திற்கு வானில் எழும்பி அப்பகுதி மக்களைப் பீதியில் ஆழ்த்தியது.
சென்னை மடிப்பாக்கம் பகுதியில் அமைந்துள்ள சென்னை குடிநீர் வாரிய வளாகத்தின் வெளிப்புறத்தில் அதிகப்படியான குப்பைகள் மற்றும் கழிவுகள் தொடர்ச்சியாகக் கொட்டி வைக்கப்பட்டிருந்ததாகத் தெரிகிறது. இந்த நிலையில், இன்று காலை அந்தப் பெரிய குப்பைக் கிடங்கில் திடீரெனத் தீப்பற்றியுள்ளது. வெயிலின் தாக்கம் மற்றும் காற்றில் வீச்சின் காரணமாக, குப்பையில் பற்றிய தீ கணப்பொழுதில் ஒட்டுமொத்த வளாகத்திற்கும் பரவியது. மிகக் குறுகிய நேரத்திற்குள் கரும்புகை அப்பகுதி முழுவதையும் சூழ்ந்ததால், அந்தச் சாலையில் சென்ற வாகன ஓட்டிகள் மற்றும் அருகில் வசிக்கும் பொதுமக்கள் கண் எரிச்சல் மற்றும் சுவாசக் கோளாறுகளால் கடும் அவதிக்குள்ளாகினர். குடிநீர் வாரிய வளாகத்தில் இருந்து கரும்புகை மூட்டத்துடன் தீ வேகமாக பரவியதைக் கண்ட அப்பகுதி மக்கள் மற்றும் சாலையில் சென்ற வாகன ஓட்டிகள் அதிர்ச்சியடைந்து தங்களின் செல்போன்களில் இந்த காட்சிகளைப் பதிவு செய்யத் தொடங்கினர். அதே நேரத்தில், விபத்து குறித்து உடனடியாகத் தீயணைப்பு மற்றும் மீட்புப் பணிகள் துறைக்கு அவசரத் தகவலும் வழங்கப்பட்டது. தகவலின் பேரில், முதற்கட்டமாக வேளச்சேரி மற்றும் அடையாறு ஆகிய பகுதிகளில் இருந்து மொத்தம் 4 அதிநவீன தீயணைப்பு வாகனங்கள் சம்பவ இடத்திற்கு மிக அதிவேகமாக விரைந்து வந்தன. தீ விபத்து ஏற்பட்ட குடிநீர் வாரிய வளாகத்திற்குள் ஏராளமான பொதுமக்களின் பழுதான வாகனங்களும், பறிமுதல் செய்யப்பட்ட சில வாகனங்களும் நிறுத்தி வைக்கப்பட்டிருந்ததாக முதற்கட்டத் தகவல்கள் தெரிவிக்கின்றன. குப்பையில் பற்றிய தீ, இந்த வாகனங்களின் மீதும் பரவி மேலும் ஒரு மிகப்பெரிய வெடி விபத்தோ அல்லது பெரும் சேதமோ ஏற்பட்டு விடக்கூடாது என்பதில் தீயணைப்பு வீரர்கள் மிகத் தீவிரமாக கவனம் செலுத்தினர். வேளச்சேரி தீயணைப்புத் துறையினர் ஒருபுறம் தீயை அணைக்கும் பணியில் தீவிரமாக ஈடுபட, மற்றொரு புறம் குடிநீர் வாரியத்திற்குச் சொந்தமான பிரம்மாண்ட தண்ணீர் லாரிகள் (Metrowater Tankers) மூலமாகவும் உடனடியாகத் தண்ணீர் கொண்டு வரப்பட்டு, தீயை அணைக்கும் நடவடிக்கைகள் நடந்தன. முழுக்க முழுக்கக் கொட்டி வைக்கப்பட்டிருந்த குப்பைகள் தான் இந்தத் தீ விபத்திற்கு முதன்மைக் காரணம் என்று தீயணைப்புத் துறையினர் தங்களின் முதற்கட்ட விசாரணையில் தெரிவித்துள்ளனர். இருப்பினும், தீ பக்கத்தில் உள்ள குடியிருப்புப் பகுதிகளுக்கோ அல்லது இதர அரசு உள்கட்டமைப்புகளுக்கோ பரவாமல் தடுப்பதற்கான முன்னெச்சரிக்கை நடவடிக்கைகளில் அதிகாரிகள் தீவிரமாக ஈடுபட்டு வருகின்றனர்.குப்பைக் கிடங்கில் தொடங்கிய தீப்பொறி
அலறியடித்து ஓடிய வாகன ஓட்டிகள்
தீயணைப்பு வீரர்கள்